¹ letsatsi la bo masome a mabedi le bongwe, kgwedi ya bosupa, lefoko la ga Modimo Yawe la tla ka moporofeta Hagai le re, ² "Bua le molaodi wa Juta, Serubabela morwa Shaletela, le moperesita mogolo Joshua morwa Jehosataka, le batho ba ba setseng. O re, ³ 'Ke mang yo o setseng mo go lona yo o boneng kgalalelo ya ntlo e ya pele? Le e bona entse jang jaanong? A ga go tshwane le sepe mo matlhong a lona? ⁴ Jaanong, nonofa, Serubabela! - se ke mafoko a ga Modimo Yawe- nonofa, moperesita mogolo Joshua morwa Jehosataka; nonofang, batho botlhe mo lefatsheng!- se ke mafoko a ga Modimo Yawe- le bereke, gonne ke na le lona!- se ke mafoko a ga Modimo Yawe wa masomosomo. ⁵ Se ke kgolagano e ke e simolotseng le lona fa le tswa kwa Egepeto, le Moya wame o ntse o na le lona. Se boifeng! ⁶ Gonne Modimo Yawe wa masomosomo a re: mo nakong e khutshwane ke tlaa tshikinya magodimo le lefatshe gape, lewatle le lefatshe le le omeletseng! ⁷ Ke tla tshikinya tshaba nngwe le nngwe, tshaba nngwe le nngwe e tla tlisa dilo tsa bone tse di ntle kwa go nna, ke tla tlatsa ntlo e ka kgalalelo, go bua Modimo Yawe wa masomosomo. ⁸ Selefera le gauta ke tsame!- se ke mafoko a ga Modimo Yawe wa masomosomo. ⁹ Kgalalelo ya ntlo e, e tla nna kgolo kwa isagong go na le kwa tshimologong, go bua Modimo Yawe wa masomosomo, ke tla neela kagiso mo lefelong le!- se ke mafoko a ga Modimo Yawe wa masomosomo." ¹⁰ Ka letsatsi la bo masome a mabedi le bone, kgwedi ya borobabongwe, ka ngwaga wa bobedi wa ga Tariase, lefoko la ga ¹¹ Modimo Yawe la tla ka moporofeta Hagai, le re, " Modimo Yawe wa masomosomo a re: botsa baperesita ka ga molao, o re, ¹² ' Fa motho a tshotse nama e e beetsweng Modimo Yawe mo momenong wa seaparo sa gagwe, abo momeno o kgoma borotho kana nama, mofine kana mafura, kana mofuta ope wa dijo, a di nna boitshepo?'" Baperesita ba araba ba re, "Nyaa." ¹³ Jalo Hagai a re, "Fa mongwe a se phepa ka ntlha ya loso a tshwara nngwe ya dilo tse, a di a itshekologa?" Baperesita ba araba ba re, "Ee, ga di phepa". ¹⁴ Jalo Hagai a araba a re, " Go ntse fela jalo ka batho ba le ka tshaba e fa pele ga me!- se ke mafoko a ga Modimo Yawe- go ntse fela jalo le ka sengwe le sengwe se se dirilweng ka diatla tsa bone: se ba se nneelang ga se phepa. ¹⁵ Jaanong, akanyang mo ditlhaloganyong tsa lona ka tse di fetileng mme di gogela mo letsatsing le. Pele ga letlapa le pegwa mo go le lengwe mo tempeleng ya ga Modimo Yawe, ¹⁶ e ne e ntse jang nako ya teng? Fa o solofetse selekanyo sa masome a mabedi sa mabele, di ne di le lesome fela; le fa o tla kwa swaking ya mofine go gelela selekanyo sa masome a matlhano, se ne se le masome a mabedi fela. ¹⁷ Ke le tlhokofaditse le ditiro tsotlhe tsa diatla tsa lona ka malwetse a dijalo, mme ga le a ka la boela kwa go nna- Se ke mafoko a ga Modimo Yawe. ¹⁸ Elang tlhoko go tswa letsatsi le go ya pele, go simolola kgwedi ya borobabongwe e tlhola malatsi a le masome a mabedi le bone, go simolola letsatsi le motheo wa tempele ya ga Modimo Yawe o neng wa bewa. Elang tlhoko! ¹⁹ A go santse go na le peo mo mabolokelong? Moretlwa, setlhare sa mofeige, garenata, setlhare sa olife ga di a ungwa! Mme go simolola letsatsi le ke tlile go le segofatsa!" ²⁰ Lefoko la ga Modimo Yawe la tla labobedi kwa go Hagai ka letsatsi la masome a mabedi le bone la kgwedi le re, ²¹ "Bua le molaodi wa Juta, Serubabela, o re, 'Ke tla tshikinya magodimo le lefatshe. ²² Gonne ke tlaa thankgola terone ya bogosi ya magosi le go senyaka nonofo ya magosi a ditshaba! Ke tlaa thankgola dikoloi tsa ntwa le bapagami ba tsone; dipitse le bapagami ba tsone ba tlaa wela fa fatshe, mongwe le mongwe ka ntlha ya tshaka ya morwaraagwe. ²³ Ka letsatsi leo- se ke mafoko a ga Modimo Yawe wa masomosomo- Ke tla go tsaya, Serubabela morwa Shaletela jaaka motlhanka wa me- se ke mafoko a ga Modimo Yawe. Ke tlaa go dira jaaka palamonwana ya segosi, gonne ke go tlhophile!- se ke mafoko a ga Modimo Yawe wa masomosomo!'"