¹ Do hoti subdu gyeɗai, Maryamu Magdaliya ki Maryamu nonti Yakubu, ki Solomi, mokano karei atursa, ɗo gomi zuk gubu Yeso. ² Ki babaɗi saf hotis tono tong sommoɗi, ndangko bure's ɗo hoti heteno. ³ A anshek zehe ta, "A tubemu gosho's lok bo burese?" ⁴ Do moyangko ɓaɓai yo'oto tubak goshos a genga, me na'ako yam. ⁵ Nzuni rangko bure's nami moi lah bunga tong karei yo hetre, ɗeino lahai tina, zuba ngaheinsu. ⁶ Si ansu, "Ngu 'e zuba bu. Ngu gyala Yeso, ngoi Nazaret, yo longkang ko Si. Si hinɗinnikk mato! A wonɗebu. Moyai be'is gendang ko Si. ⁷ Me dai, anak Majirakuni ki Bitirus ta gyaɗanni domku gonni Galili. Wonding go moya Si shida yo si angku." ⁸ Hatangkok Jijok bo bures; a kuyu ki monmoni. Anangko 'ei woi ki ngo bu ki ka'a nzuni zuba yam. ⁹ Ki bebedi saf hotis tono tong somodi babilo, si hinɗa, tamko kannik Maryamu Magdaliya, yo ho'oko maskaku babilok zugonto. ¹⁰ Te nduko anik beyai gyamani, ɗo a ka ola yadonik bele. ¹¹ Nzuni kolangko ta an zau jo ta te moikosi, nzuni me onangko jire bu. ¹² Ki bei 'ei mamayei si hatak biya bolo tong subai gedgede, ɗo nzuni marshe hawok gyabani. ¹³ Nzuni ndanko nami anik kine majirakuni, me kudangkok ona jire. ¹⁴ Yesok bei hatak dirmodi ɗo kosangko tishi, si gilla kasu ka mure onajiresu ki mure gyeɗok tilunsu, kika nzuni onangko jire ka 'ei biyaye moyangkok bei hinɗanik matos bu. ¹⁵ Si ansu ta, "Nda tong dunya shaf, ng 'e wazuk somos zei ki dunya shaf. ¹⁶ Ngoi na ongko jire ke 'yanitik baptismai a waltini, ngoina ongko jire bui me a wala bu. ¹⁷ Shida kabtu mamayei a gok mayei onangkok jirei 'e. A tong suno a soma hoda singkau. A ina enik linso hoyo. ¹⁸ A nama sammak sarasu, ke na sangko sirkai a isu 'yabu. A zena sara ka ana golla, ke a darisu." ¹⁹ Ki bei bomu'abano taka eniniy, namani ɓaɓa a ɗeino saras tinak Ndeyi. ²⁰ Majiraku, laktangko a akna eni Ndeyi lei tiya, Bomu'abano rutak nzuni ke haftansu her ngaudo su ki 'yak doboi a marshek nzuni.