¹ Tunki shandal so hoti tono yo sommoɗi babilo, nzuni ndano bei bures 'e, ndano ki mi atursa so nzu ramtankoi 'e. ² Bolano tubanko gosho bo bures 'e. ³ Nzuni ranko tong burei 'e, me bolangko zug Bomu a bano Yeso bu. ⁴ Hala ka'a, ta tun nzu tong damto ki ka ei 'e, ka moɗi, goraji bolo erno gyengyasuk karei talshu. ⁵ Ki ka mondes ngamansuk zuba kubangko kasu eli, znuni anangkok ,mondei, "Ki ka miya ngu gyala a zau hawok ana mato 'e" ⁶ Si wonɗe bu, me juktani! Dibah ei si angku ɗo ngu Galili, ⁷ anshe ta kaba na onangko lah ngo sara ana zunhu ke longkini, ke bei goli kunu juktini. ⁸ `Mondei diɓangko eni ni, ⁹ ke ma su ki gyem bures 'e ani ei woi shaf ki dirmoɗi ki ma'ato shaf. ¹⁰ Kauso Maryamu Magadaliya, Yuwana ki Maryamu nonti Yakubu ki monɗes gyemansu anagko ei woi ki ana ɗeino kusani. ¹¹ Dinɗoi ɗeiko kit 'ya bu gyem ana ɗeino kusani, ke nzuni onanko jire ka eni mondei bu. ¹² shaf ki ka'a Bitrus hinɗa,'ejujo bei bures 'e, erko moiko hawoto, si moiko kaba suba malu moɗabi. Bitrus ma banoni, monmoni ka ei hala. ¹³ Kaba, bolo hawonsu go su gyenga hara moɗi sunto Imuwasu. ¹⁴ Nzuni enik zehe ka shaf ki ei hala. ¹⁵ Dinno, ɗo nzuni ka to enik zehe, Yeso kani nza'ano ke some marshek nzuni. ¹⁶ Me idasu heno ta kada nzu mante si bu. ¹⁷ Yeso ansu ta, "Ngu anshe miya ka billes 'e" Erangko kit 'yak jigyayi. ¹⁸ Moɗi hawosu suni Kiliyobas, lafni ta, "Ko moɗako ɗo hawok Urshalimayo man ei hala bu sommoɗi wonse 'e?" ¹⁹ Yeso ansu ta, "Ei miya?" Nzuni anita, "Ei ka Yeso ngo Nazaret, si Nabi, na'a ko tong rutak eni dom Ndeyi ki algi shaf, ²⁰ ke billei ma'i malumshek koknakun mu onanako ɗo dugini mato ke longkini. ²¹ Me mu zeshe tili ta si ne a wangu Israila. Ka'a dai, shaf ki bei ei woi, kauso sommoɗi kunu so hele shaf ki ei woi'e. ²² Harkauso me, mondei hawo mu ma'atoimu 'yak monmoni, ta zuni ndanko bei bures ki bedebi. ²³ Ɗo nzu wano gubuni bu, nzuni mano, anshe ta nzu moyano Taktakashei shei yo anansu ta si an zau. ²⁴ Goraji ma'ato hotonmu yon gyema mu danko bei bures 'e , ke bolangko kit yo mondes anangko. Me nzu moyangko si bu." ²⁵ Yeso ansu ta, "Nguni yaknaku ki tili mure ona jire tong shaf ki eni Nabaku! ²⁶ Ta a ɗeya kaba na Kiristi sa ei mamaye bu, ki bei ro tong nama kani? ²⁷ Si some tinki Musa go shaf ki Nabaku, Yeso wangle su hawo shaf ki ei so hala kani tong eni Ndeyi. ²⁸ Ɗo nzu nzaɗa no nem ki gyenga harai, Yeso tamsu kit si gyeɗani dom. ²⁹ Nzuni me zob si. anshe ta, " Ɗetik muni, ki ka bozoni ito ke goli wuyato." Ki ka ka'a Yeso nduko ɗo si ɗeyik nzuni. ³⁰ Kauso, ɗo Yeso ɗe iko bei tishi, si namko sinakir, zob to di barka, dahte,si onsu. ³¹ Ki wonɗe idasu ahani, nzuni manoni, ke siboinik idansu. ³² Nzuni ananko zehe ta,Tilimu ito holom bu, ɗo si ishenmu eni ka bille, ɗo si ehemu eni Ndeyi 'e? ³³ Nzuni hinɗangko Jujim woi'e, ma su Urshaima. Nzuni bolangko dir moɗi dahino bei moɗi, ki shaf ki biyai gyemansu, ³⁴ anshensu ta, "Bomu a bano hinɗini an tabababu, ke si tam ko kanik Saminu." ³⁵ Nzuni ani su ei hala ka bille, ki billai toma yo Yeso bei daha sinakir. ³⁶ Ɗo nzuni kato ana ei woi, Yeso kani erko tintilsu, si ansu ta, "Deino lahiya ɗeyi gyemenku." ³⁷ Me nzuba ngahinsu, tamshe ta nzuni moyanko kelu. ³⁸ Yeso ansuta, ki ka miya ngu damtanku 'yo? ki ka miya ngu dolshe tong tilingku? ³⁹ Moya sarano ki shekenno, ta woi ne'ek kano. Saha ne ngu moyi. Ki ka keluan lu ki oso bu, kit yon moishe ne andi." ⁴⁰ Ɗo si angko ei mamaye, si tomsu sarani ki shekenni. ⁴¹ Shaf ki ka'a nzuni onanko jire bu ki ka kuyu, ke nzuni monmoni. Yeso ansu ta, "Ngu an tishi?" ⁴² Nzuni oni kine kerwo yo woɗangko, ⁴³ sinamko ha'ako domsu. ⁴⁴ Si ansu ta, "Ɗon gyemaku, ne anku shaf ki ei yo turangko hwaaok uhe Musa ki Nabaku ki Zabura kanno kaba na ngam ko." ⁴⁵ Si ashensu diɓnan su, ta ɗo nzu we hawo eni Ndeyi. ⁴⁶ Si ansu, "Turangko, ta kaba Kiristi sa maito,ke juktinik mato bei sommoɗi kunu. ⁴⁷ wanglu yahe zunhu a ina wa'azunto tong suni a shaf ki eli, somak Urshalima. ⁴⁸ Ngumoyangko 'yei mamaye. ⁴⁹ Moi, Ne sarku ei bono zobko tilio oku. Me ɗeya tong gyabani kaba na walangku geɗok ɓaɓa" ⁵⁰ Yeso namino nzuni kori kaba nzu ndano nem ki Betanya. Si hafta sarani,zubsu barka. ⁵¹ Woi hala, ɗo si kato zub shensu si barka, si wus nzuni a nami ni ɓaɓa. ⁵² Nzuni some nama kani, ke men su Urshalimaki kuyu shei. ⁵³ Nzuni lei tamiya ban Ndeyi namshe ka Ndeyi.