¹ Bulus, majiri Kiristi Yeso ki gem Ndeyi, godi gya mayei zeno gengak ka Ndeyi tong Afisa ki mayei ana ona jire ka Kiristi Yeso. ² Tili modi deyik nguni, deinok lahiyak gem Ndeyi Bomu ki Bomu abano Yeso Kiristi. ³ Erai Ndeyi ki Boti Bomu abano Yeso Kiristi we nama ka. Si zofmutik barkak kelui bu'uno k baba tong Kiristi. ⁴ Kabui kena dunya, Ndeyi tamko muni yom onangko jire tong Kiristi. Si tamko muni mu deyi bu'uno wara 'yak huli idani. ⁵ Kika ndaltu Ndeyi tamko munim millani ki gem Yeso Kiristi. Si iko ka 'ai e ei tilini ndalo. ⁶ Kika mu nam kannik ka modik tilini. Woi ei omuk ka Laniy ndalo. ⁷ A hawok Yeso Kiristi mu anan wangu ki gem domni ki yahuk zunhu, mu anan woi kika sheiki tili modini. ⁸ Si omutik tili modi wonses a tong mantu ki asum. ⁹ Ndeyi tammutik ei bungkeno hawok tilini, a ka ei zina yo tamko hawok Kiristi. ¹⁰ Na sommodi ngamta 'ya woi ndinoi, Ndeyi moktu lei miya hawok baba ki eli tong Kiristi. ¹¹ Kiristi tamko tingki marei. Woi ruta ngoi yo a ishe lei miyak be'i mantuni. ¹² Ndeyi iko woi do mu deyimmu ana wena gyado kika nama ka. Munim anan zoha tili tong Kiristi, woi mu deya 'yak nama ka na'akonni. ¹³ Ki gem Kiristi yong kolangko eni jire, wazuk wangungkuk gem Kiristi. Ngu onangko jire kanniy zohingku tong kelui bu'uno. ¹⁴ Kelui bu'unoi yo jire yo gyadommu kaba nam wangko gyadommu. Woi kika nama kanni. ¹⁵ Kika woi, tingki sommodiy ne kolko ka ona jiretkuk Bomu abano Yeso ki ndaltungkuk mayei zansu gengak kanni, ¹⁶ Ne damba ershek donsha Ndeyik katku bu ken akna sungku tong donshu no. ¹⁷ Ne donshu do Ndeyik Bomu abano Yeso Kiristi, Boti ona jiremmu, a ongku kelu mantu ki asum. ¹⁸ Ne donshu ida tilingku ehe, ngu mante zoha tilimu ka wunditku ngu mante sheiki nama ka ki gyado hotok maye bu'uno zansu gengak Kanni. ¹⁹ Ne donshung mantitik na'akok gedonni tong mayei onangko jire. Na'ako wonses so tama ruta gedok be'i gedonni. ²⁰ Woi gedos so a ruta tong Kiristi jajum yo Ndeyi jugta sik mato ka modi ke a deino sarannis tina tong baba. ²¹ Si zatkok Kiristi gera baba ka ma'i, mene, gedo, ka lei shida sun miya ke. Zatkok Kiristi kika sommodi woi bu, me shaf ki dom. ²² Ndeyi zofkok lei miya elelik sheke Kiristi zohini baba ka lei miya tong ban donshu. ²³ Zuguniy ban donshu, ngamyanni ngamtak lei miya shaf.