¹ Bitrus, a sarnik Yeso kiristi, godi gya biyai bu'uno Yo zaɓeno, Yo a tong Buntus, Galatiyaku, kappadokiyaku, Asiya, ki Bintiniyaku. ² Kika woi a ɗeyinni gya Bomu abano, ki gya keluy bu' uno ki ladab yo kasa dom Yeso kiristi-tili moɗ i ke ɗeyi hototku. ³ Barkak Ndeyi Bomu abano Yeso kiristi, ki Jig-yayinnis shei si omu le'is hoyo ki zoha tili ka gyado, gyados wonses me a onatek bei hindu Yeso kiristik mato. ⁴ Gyados wonses me an bo ernoto bu, ke a yabta bu, so a za'ita te ɓaɓak kammu. ⁵ Nguni ki mene Ndeyi so a deita kika ona Jire, ki wangu so a imu a tong sombodiy isno. ⁶ 'Ya kuyu ka woi ye'e, lei ta deyinni kauso mu se yabtu tili tong lei shida bones siya ke. ⁷ Kika woi a deyi ka manta ona jire so gyeɗa dinar darja yo a yabtanni lei kabtangko tek yesi, woi a hele aka ona jiretku a elletu, nama ka ki mene a sommodi yo Yeso Kiristi nditu. ⁸ Ngu moyangko si bu, me ngu ndalanko si. Ke ngu moishe si bu kauso, me ngu onangkok jire kanni. ⁹ Kauso ngu biskak katku rutai zina ngu 'yangko yo ona Jiretku, kika kelungku we wangu. ¹⁰ Nabaku gyazangko tong danum do mante wangu woi ye 'e, a ka tili modi yo a deya yoku. ¹¹ Nzuni gyaza ndalangko manta aka tami na kelu kiristi yo a hawosu lna enik nzuni. Woi a hele kit yo si ansu woi hele a tong sommodi si ansu kit shida bones kiristi sa, ki nama ka so a ɗahe-tu bei. ¹² Anangkok woi ta nzuni ishek kasu bu, me ishengku, woi shida ei nzuni ishe kit yo anangku, ki gya biyai 'yangku wazuk somos zei yo keluy zina sarnok ɓaɓa woi 'ei malekaku ndalangko moishe. ¹³ Aka woi fa ngu mate kelungku. Ngu zof tilingku ka tili modi yo nditu gemkuk gya Yeso Kiristi. ¹⁴ kit millai ana ɗaha eni Ndeyi kada ngu ɗahe ei tilingku ndalo ki yo ɗeinotku tong mure mantu. ¹⁵ Me kit yo wunda nguniy si bu'uno, nguni ke, ngu ɗeyi bu'uno tong shafki rutai ngu ishe. ¹⁶ kika tureno ta "deya bu'uno kika ne'en bu'uno". ¹⁷ kika na ngu wunda si "Boti" si yo ishe sheryak leilo ke a tong rutai si iko, ke ngu 'e deinotku tong rutai si iko, ngu 'e deinotku tong zuba ki ona na'ako. ¹⁸ Ngu manangkoti ta ki azurfa do dinar yo a yabtanni wango ngunik tong hali yakna yo gyadotkuk gya bobengku. ¹⁹ Kika ka, a wangangko ngunik dom Kiristi yo darja, yo an nangka kit yo lah gyam bu. ²⁰ Kiristi yo zabangko si tin kabui a 'e dunya, me a bo teke sommodi a tamkutik kanni. ²¹ Ki gemni ngu onangko jire ka Ndeyi, si yo hinɗak mato si angkok mene kika ona Jiretku ki kola zei ngu deyi tong Ndeyi. ²² Kika ngu buɗangkok zau ku tong ona katku jirei a moka nguni tong ndaltu yagyenaku, ngu ndalte sha'engkuk tili jire. ²³ Kika le'yango ngunik shidai a yabta bu, me ki tong shidai a ɗafta bu, ke jok gya eni Ndeyi. ²⁴ Kika "shafki zugoi kit santa, shafki darjanni me kit bi'itek santai a ngetenni eli," ²⁵ me eni Bomu abano gede bu. "Woi somos zei so 'yangku wazuto".