1 Se Yeso wazen Riyǝgǝ ra ano cebete, a kuna nlen ma Adǝshǝri se ma wa ra bezezzoŋe, Mme a tore a laken Riyi. 2 Nze ma nǝri aye a mishi ginu, ŋana masa ohere ŋadan mura iginu mini, se ŋati masa o iya tekongo tu-pari riyi, nŋe a kwiji emu meye iginu mi. 3 Nze Yeso ŋya aza okongo me ovento u Siman magonme, a ma we okongo me a rekero ri maŋi mami. Se Siman te we meme, nze ma cikǝnu ma me obezezzeno aza me. 4 Se mati mase obǝnu, nze ma gon Siman, "ra peta okongo hoi, wame anyimi riyi rimi, vati eme meyi eginu mi anyimi, ura me iginu cebete." 5 Siman gare mago, "Ina here vari eme omey iginumi idan me ko ne, ama dikan guda kando gemese una buki mi." 6 Se Siman vati eme omey iginu mi anyimi iginu i mumuru wa pete anyimi har i gamene u wonku. 7 Nze Siman tisa udaŋara me a ŋa ra ŋa male me. Ŋa wa ra ŋa wunki eme ŋa inja te-kongo teme nan iginu i mumuru har te-kongo teme ti wa ri pu dumalu. 8 Simon Peter se mati ni emegemese ŋana mura, ma gurwǝnǝ a nyaŋa, magon Yeso,"Dura o dekon, mmi unu macara ze, Adǝshǝri a han." 9 Bakase mme nan udaŋara me ti kuna malo nan iwi aza ecebete iginu egemese ŋati zaki. 10 Arene a Siman teze, Jamese nan Johne, abiyǝ Zabedee. Nze Yeso gonŋe, "tago i kuna iwi ni, bakase a surǝ kane, ira me omeyano ze. dan iginu ni." 11 Se ŋa ti masa u yiya te-konga teŋe, nze ŋa teke kuyya se ŋa zenno ŋa tarse me. 12 Ma ti ka deŋe ariya anyima epeme, ma gurnan owe se ma zin okwene u garsanyaŋa, nze ono gurwanǝ anyaŋa ma gonme, "Aco, ingase u gara, wunan an wamo." 13 Nze Yeso witi uware ohome ma gonme,"na gara wamo." Dad aregemme matiwa wamo. 14 Ma wuna me tago ma buki owe ne, ama magonme,"wame u beze retare a Priest, konzen a ma nyaka taba ti taye tu-kwiji retǝ, kandogemse Moses wa beze ano, aza u kassa. 15 Nze Ano vatu ukuna me cebete, ŋa ra re-riyǝgǝ reme, a ma beze ŋe ŋa kuna nleŋa mame, nan unara uwamo a tekwena teŋe. 16 Ama uyu ca Ma suru ma waŋa rekero ma remmo. 17 A temuru tegeme se ma wara bezezzano, oyu Pharisis wa ra cikǝ aregeme onu bezezze makiri, se mana tangaro asurǝ tegwiri cebete, ulu galilea, nan Judea, konzen ulu Jerusalem. Ma wazen agata surǝ Adǝshǝri awu wuna ano a wamozo. 18 Nze awe rai, se ŋa nǝ zaki owe opeŋe, onu diru atawu ŋana, ŋawa jinarǝ aro pete a ŋa luta me aji Yeso. 19 Ŋa wată mura aro pete ne, baka riyǝgǝ rano riwa kerne, nze ŋa nya a kayaza ugurame a rewo ŋa tudi ono me opeŋe me a zatano aji Yeso. 20 Se Yeso wa ni uyiya birwa beŋe, Mago,"Ono ana yitai macara mai." 21 Nze anu ru makiri nan ti-Pharisis me agangaŋ aza megemese ma wa buki, ŋago,"Avizi onu giya se mara biyǝ ucara makiri? Avizi onu yita macara ingo dan Adǝshǝri base ne?" 22 Se Yeso, se ma wa ru emegeme se ŋara biyǝmi, ma garaŋe,"baka iyaze na wuna se nŋi ra adodonzo ageme i ŋi a birwa? 23 iyan kira isauwu a buku mi, 'ana kaiye macara mai,' né, uguna,'hira u woze tǝno?' 24 Bakan nane ni ru, se vanono zen agata a massano awu yita macara, Na gonŋo,'hira u yita opeŋo hoi u waŋa atauwa hai.'" 25 Sassa, ma here aja haŋe, ma yete opeŋo gemese mati tetǝnu. Nze ma mesho uruna a ka yitauwa me, a yisiza Adǝshǝri. 26 Kwavi arame wa meyanu, ŋame uyisiza Adǝshǝri. Iwi wa meŋe, nŋe a gusa, "Ina nari imi sau i sassaru temuru tiga." 27 Amaro tegogoro tigiya, Yeso wa suru nze ma waŋa riya nze ma gurna nan uyu onu kassa iru inyaŋa, sa gosenme, Levi mme a cikǝ ugura u kassa iru inyaŋa. Ma gonme,"tarson." 28 Nze Levi deke kuyyiyawe me amaro ma tarse me. 29 Levi wa nyaka aruwushu imunshu u Yeso. A rame ăyănu kassa iru inyaŋa wa ra te-tu-kujira tu-wushu imunshu nan ŋe. 30 Nze anu ru makiri nan ti-Pharisis te me agangaŋ a Arera hame, nŋe a gusa,"baka iyaze mara wushimunshu anyimi anu kassa iru inyaŋa nan udaŋara anu macara magiya?" 31 Nze yeso gara magonŋe,"anu makwene ze ajiŋara onu tuka, ana wuma tă damo ne. 32 In tita ra dan tisa anu dira macara ne, ama dan tisa anu macara a ŋa deke macara maŋe." 33 Nze ŋagonme,"Atuma a John ono zoro, wa meyanu, ŋa remmo kuyyuca, Atuma a ti-Pharisis wa woze nane. Ama Atuma a hai se tiwushu-wushu tenze ŋa ra nu." 34 Yeso gare mago,"Avin nin we ano umeyanu ara remeze ra aŋya, ingase onaŋya zenŋe? 35 Atiyǝ nen deŋe, se onaŋya nen dekeŋe, nze ŋa nin meyanu ŋa ko ŋa remmo." 36 Nze Yeso ko ma buki ugǝmǝrǝ. Mago,"Owe tin dare udidi u saw, ma ka duza udi u kozo nan no ne. Ingaze ma we nane, udidi u saw me ten wuna daidai nan udi o kozo mene. 37 Né, avin nin ka binja obere u saw idǝkǝ obere o kozo. Ingase ma we nane, obere me nin nen here ubinja idǝkǝ me har o kuki anyaŋa, idǝkǝ me nin ko i bursaru. 38 Baka nane obere u saw, a we a idǝkǝ i saw nan sansan. 39 Owe tin shi obere u ŋono, ma ku ma barsa u saw ne, baka ma nin go, 'o ŋono kiralo.'"