1 Amaro nane, Aco me zake aya Atuma bituru ka u rũ, Ma tomeŋe anka repo repo aja me a ka petǝ tugwiri tugwiri tegeme se mara waŋ. 2 Ma gonŋe, "tikwake ti bare, ano tikwake teme na yi. Baka nane, saŋara ni Adǝshǝri a ma tome baka tikwake tigiya nan anituma ara tikwake teme. 3 Wanni imi hiŋi, nǝrǝ ni ina tuma ŋi uga ibiya anyimi iwashuja. 4 Tago i yita ashoko awi iru ni, né ashoko tǝno, né tiŋaforo ne, tago i gon owe ko uruna ne. 5 Atauwa geme se i pete, bura guna, 'ira taye ti ishammo akura giya!' 6 Inga ono telo ranyima tau mi, telowa tiŋi ti nin tu ame, ingase babo, telowa tiŋi ti nin kuru iŋi. 7 Cikǝ ni ayitau mi, i wushi iko i shi zale emegeme se ŋa nya ŋi, baka unituma wushi riwuza reme. Tago dangaro a tikura tikura ne. 8 Zale ugwiri ogeme se e pete, i wushi ni zale emegeme se ŋa nya ŋi, 9 e ko i wǝme anu makwene ara me. E gonŋe, "tegomo tǝ Adǝshǝri ti nara voton ŋi." 10 Tu gwiri tegeme se e pete ŋa tǝ kaiy ŋi ni, suru ni uruna u saru u gwiri e go, 11 'ko uturu uwa atawa hado ina sarka aza haŋi! Ama ru igiya: Tegomo tǝ Adǝshǝri tina rawa rigiya.' 12 Dikan buki ŋi se atiya u massa massano, ano Sodom nin kira ano tugwiri tigiya a mura ugwene. 13 Kanja iŋi, Chorazin! kanja iŋi, Bethsaida! Tago se ituma isǝru igiya se ana wuza ŋi ana wuza eme a Tyre nan Sidon, ŋa tǝnǝ nara ugwene tun, u cikǝ oŋe annto nan tɔbɔ. 14 Baka a nin kira kuna ijai iwano Tyre nan Sidon atiyǝ umassa massano aza haŋi. 15 Ŋi ano Capernia, i ni uga asa zaki ŋi a ka adaishari? Babo sam, asa tipi ŋi Hades. 16 Anageme se ŋa kuna u huŋi, ŋa na kunaŋ ze, konzen anu nyamenu ŋi, ŋa na nyamenon ze, iga ŋa nyamenon ŋa na nyamene ono geme se ma wa tumaŋ." 17 Atuma bituru ka sunare me kuru izalle, agusa, "Aco, har tuvunu tebɔ tiwa gurwǝnǝ aza rija re." 18 Yeso gonŋe, "Na nǝrǝ Shetan a garasa uga umalmu bura asuru adaishari. 19 Nǝrǝ, ina nya ŋi tegomo ti ijaji nan Iwǝ nan Ilakara, konzen nan agata aza zale anu nyamenu ŋi, iyiyabo icaron kuyyu runa se itarse i tin mura ŋi ni. 20 Sabo nan nane, tago izalla ihiŋi tore igiya base, se ana nya ŋi uvunu isansan ne, ama vati ni izalla baka sija siŋi ana darsa a adaishari." 21 Uca ovento me, ma ko ma kuna malo ma uvunu isansan, mago, " Na yisizai, Acowa haŋ, Adǝshǝri awa nyaŋa nan adaishari, baka una pǝte imigiya a ano rekese nan anu ru, nze O beze anu diru ru, uga abiya a bate bate. Na gara, Aco, se i wa lo ina ko i reze aŋo aji." 22 Iwa mura kuyyiya a sura Acowa haŋ, owe tǝ ru vana me ne se Aco, konzen owe tǝ ru Aco mene se vana me nan anageme se vana me zake da ma beze ŋe." 23 Ŋa waŋaro ŋagon Atuma me, "ano taye ze anageme se ŋa na nǝrǝ tegogoro te geme se nŋi na nǝri. 24 Na buki ni, Atuma cebete nan Agomo na nara unǝrǝ tgogoro te gemse ŋi na nǝrǝ, konzen ŋa dan nǝrǝ ni, né ŋa na kuna emegeme se nŋi na kuna, ŋa dan kuna ne." 25 Nze owe onu bezezze makiri ma ti Jews here ma tore da a gǝllǝ mi, mago, "Onu bezezze, iyaze in nin wu na dan mura ruma ri-suŋ?" 26 Yeso tare mago, "Iyaze ana darsa a yimi makiri? nŋo biyǝ nni zi?" 27 Ma gara mago, "u nin barsa Aco Adǝshǝri a hai, nan zale birwa be, nan zale ruma re, nan agata hai, nan adodonza hai, konzen anu lake a hai uga retǝ re." 28 Yeso gon me, "una tare kima. Wuza igiya, u nin mura ruma." 29 Bata, ono bezezze me, baka ma repe ugara nan retǝ reme, ma gon Yeso, "Avizi unu laken mi?" 30 Yeso gare konzen mago, "Owe wa meshe uruna a sura Jerusalm a ka Jeriko. Nze akari tura me, ŋa kai emegeme e mazenno, ŋa tari mi, uga ŋa in wuna me. 31 Nze amaro me oyu Priest wara waka uruna me, nze ma nimi, mawa wake a re rekero ma ŋana eme heme. 32 Nane me, oyono Levite wara waka uruna me konzen, se ma ti deŋe ara me ma ni mi, ma wake a rekero ma dura eme heme. 33 Bata, oyono Samaritan, anyimi tǝnǝ teme, ma deŋe ara ono me. Se ma ti nimi, nze ma kuna ijaiye me. 34 Ma wame ma ka male ono me ma tǝsi te-rekwene teme, ma we maneŋe nan manyi mu titi anu. Ma zaki mi aza imi tǝnoa teme, ma waŋ nan me akura haya, ma manti mi kima. 35 Ara ti sana eze ma nya una kura me ti dinari te repo, mago, 'wushaji a manto me, ngo i yii kweren emegeme se una wursu inga inra i nin nyai zale.' 36 Avizi anyima an ka taro me, nŋo nin go, manze unu lake o nogeme se ma ti gurna nan akari mi?" 37 Ono bezezze me go, "Onu kuna ijaiye me." Yeso gonme, "waŋ u ka wuza nane." 38 Waja se ŋa te me tǝno, ŋa ka pete a uyu gwiri, uyu wai se agosen me Martha kaiye ŋe a mǝ tau. 39 Mazen uyu nadimu se agosen me, Mary, se ma ti cikǝ a laken tuva tǝ atau tǝ Aco a rusa otonŋe anleŋa mame. 40 Bata Martha, wa ra chonno da ma shira ŋe imunshu. Nze ma waŋ voton Yeso ma go, "Aco, u dan damo se unadimu ohon na dekon teton nan ituma iwu shiru ŋi imunshu? Baka nane, buka me a ma ra ma malon." 41 Nze Aco gara me mago, "Martha Martha, una damo aza tegogoro cebete, 42 bata eme vento nze kira. Mary na zake i wuma me se owe tin kai a me ne."