¹ Enze amaro si wai rikuri nan se repo (14) In kurin nya a Jeruselem nan Barnabas, In yete Titus ma tarson. ² In wa nyana baka eme geme se enze in wǝ nəri uga tero se na biyə nlen a ŋe Konzen na yisu ma me ənyimi ano əpən. In wə bənu nan ka vevento ano ageme se in nǝri ano əsəssəru zi, in mutana tago ŋa ni uga ra suma— nee in dan suma ne—zale lallawai ze. ³ Dan baka Titus ni, se ma ze nan mi Konzen ono Greek, awa ŋuna a zene ǝ tuzi mi oshoro. ⁴ Ayeno an pore ŋa pete shauwo i tǝndǝsi egeme se woro zenno ənyimi Yeso Ukase. Ubarsa o hoŋe ze woro tə cikǝ arere, ⁵ konzen woro dan deŋe u nyaka a ŋe ne, da magaŋgaŋ ma nlen mǝ cikǝ nan ŋi. ⁶ Konzen ano ageme se ŋa nǝri se ŋa ze ano əsəssəru (eme geme se ŋa ze dan iyabo ze imi ni, Ədəshəri ta bezezze Ubarsa rete ne)—ano ageme, se ŋa nǝri ŋŋe ano a karantan ze ita vati iyabo imi ni. ⁷ A uyu ulu, ŋa nǝri se ana nyaŋ u yisu nlen a ano ageme se a dan tuzi ŋi te shoro ne, uga nane se a nya Peter u yisu nlen a ano ageme se a tuzi ŋi te shoro. ⁸ Ədəshəri ageme se a wuza ituma a Peter se utuma ze a ano ageme se a tusi ŋi, nane ze ira wuza ituma imi a ano əpən. ⁹ Se Jamese, Cephas, nan Jone, ano ageme se a ru ŋanze ŋa piyə church, ŋa kuri ŋa ru ogwene se a nyan, ŋa nyaka dondon u ware belai u gurna a Barnabas nan mi. Ŋa wuza igiya zale da woro wame a ano ǝpən, nan nane se ŋa nin wame a ano ageme se a tusi ŋi. ¹⁰ Ŋa saŋare do se woro nin duza nan ano u dira nee ano tiyan, eme geme se in wara barsa in ta wuza egeme. ¹¹ Konzen ngase Cephas ra a Antioch, Min ra buku mi ame əji bakase a pəni nlen ma me se ma care. ¹² Da awe kazu guna a ŋa rai ǝsuru a Jamese, Cephas wara wushu imu wushu nan ano əpən. Se ano ageme rai, ma tura enze ma zuzi rete a reme ənyimi ano əpən. Ma ra kuna iwi iwa ano ageme se ŋa ra nara ata tusu ŋe te shoro. ¹³ Konzen a daŋara ti Jew ŋa pete isana ibiti egeme. A gura Barnabas a waŋare me ma tarse isana ibiti eheŋe egeme. ¹⁴ Se In wa nǝrə se ridima a reŋe ra ta tarse uruna magaŋgaŋ ma nlen ma me ne, enze In buki a Cephas a zate ano kweren, "Ngase ŋŋo u Jew ze enze ŋo ra wuza uga ono u pən dan uga u Jew ni, nnizi ŋŋo nin ŋuna kake nan ano ǝpǝn da ŋa wuza uga ti Jew? ¹⁵ Woro nan ate a hado ti Jew tenze ara ɔyɔɔ konzen dan ano ǝpǝn ano macara ne; ¹⁶ bata woro ze nan u ru se ono dama mura o pete baka ituma i makiri ni se u yiya birwa ǝnyimi Yeso Ukase. Woro konzen i wa mura u yiya birwa ǝnyimi Yeso Ukase da a mura opete baka u yiya birwa Konzen dan baka ituma i makiri ni. Baka ituma i makiri ripun ri dama mura opete ne. ¹⁷ Konzen ngase, woro ra giŋərə ogwene ənyimi Ukase, akura mura do ano macara konzen, Ukase me wa rai ma yisu epe macara? Dan nane ze ne! ¹⁸ Ngase in kurin piyə tegogoro te geme se in wa deke, Nan rete aron na cikǝ ono u pura makiri. ¹⁹ U runa makiri, na wənə a makiri, baka da min cikǝ Ədəshəri. ²⁰ Immi, a garon nan Ukase. In ta da nan agata a rete a ron ne, baka ruma ri Ukase ri ri imi. Ruma regeme se in zenno wagiya ripun renze enzenno baka u yiya birwa bon a Vana Ədəshəri, ono ogeme se ma bezon ti barsa konzen ma nyaka rete a reme bakam mi. ²¹ In dan kuŋki ogwene Ədəshəri ni, ngase ma gaŋgaŋ umura ze baka makiri, nane uwənə Ukase dan iyabo ze ne!