¹ Wagiya, mira darsa me ā rawā ŋo, ono u barsa, ugiya o repo ze, nga ŋo dunza dan vati u piyǝ birwa be bi magaŋgan, ² baka da ŋo dunza ubǝnu o hodo ogeme se ū wana waka u wā tuma Ədǝshǝri nan ri tuma rā Co nan unu kasa se ā nyaka ā tare ta tuma Yeso. ³ Ā ŋi ru igiya yai, se ano rikunuŋa ŋara rā ū maso masano, ŋara kunuza u huŋi konze ŋa woze imu barsa birwa be ŋe. ⁴ Ŋara guna,"ubǝnu ogome se mā biyǝ, ago mǝrǝ kuru, mayu? Ā suru ara ageme se ano-cowo hodo wa wiju, zale tegogoro tina cikǝ uga nane se teze, ǝ̄ suru ū bura bi ruza bi masano". ⁵ Ubarsa birwā beŋe ŋā wǝpi se ǝdǝshǝri nan ā nyaŋa ā ruza ā suru ā manyi konzen , nan u dakano, nan remelo ra ǝdǝshǝri. ⁶ konzen ǝ nyimi tegogoro ti giya, masano mā uca ogeme ǝ̄ burkǝlǝ. Manyi mā kanke. ⁷ Bata ma wa giya, Aza nan masano ana nika ā pawu ra konzen nan remelo re vento re gemme. Ana nika ŋe a wame oŋmwe onlen ma u wuza ano nan udira ribiu ri wuma. ⁸ Ŋo tan mazaro ne, uwanon, baka ətiyǝ vento nan Aco uga siwai ugū zi, kozen siwai ugū uga ǝtiyǝ vento ze. ⁹ Aco ma taze shauwo a remelo a reme ne, uga nane se awe na ita se maze shauwo. Nane, maze shauwo baka nŋo ze. Bakase matā barsa owe ǝnyimǝ ŋi ma dere rumā reme ne, konzen, dā kǝvi mura uruna u kawo me. ¹⁰ Nā buki ŋi, oŋmwe uwa Co, u ra rā uga ukǝri zi, ǝdǝshǝri ra waka nan u gurumu u kpai. Zale tegogoro arǝ pusu mi nan ura, nan masano, nan riwuzā reme se renze ara pǝrsi mi. ¹¹ Ngase, zale tegogoro ti giya tenze ara wirti, a pose uga nane, i ya isanano ze ŋi ra cikǝ mi? ¹² Ā ŋi cikǝ u pa nan u wuna birwa ōŋmwe u rǝwǝ Ədǝshǝri. Atiyǝ agemme, ǝdǝshǝri ara wirtu, a pose nan ura, konzen, zale tegogoro tira saro ǝnyimi makpai ma cebete. ¹³ Konzen aza remelo a reme, woro ra pā ǝdǝshǝri ā sau nan masano mā sau, āra ageme se magaŋgaŋ mara cikǝ suŋ. ¹⁴ Baka nane, awanon, ngase ŋiru tegogoro ti ja, mantǝ ni, i wuza iwuma gaŋka tago a mura ŋi nan ti lǝmu, nan eme tewō ǝ̄mǝji ni, i cikǝ shammo. ¹⁵ Konzen, tinka remo, iru cikǝ shammo uga Acowo do se mā cikǝ ono u kaso do, uga nane u wanoye barse. Paul mā darse ā rawa ŋo, baka re- kese regeme se awa nyame. ¹⁶ Paul wa buki tegogoro ti giya zale ū darsa e reye me, egeme se te tegogoro ti rǝnu te geme se teze gbau dā ru. Udira uru nan ano ā balan- balan ŋa kate tegogoro ti ja, uga nane se ŋa wuza nan u daŋaran nlen mame, dā nŋe nan ate a haŋe ŋa bishi. ¹⁷ Baka nane, awanon, nane se ŋi rū tegogoro ti giya, mǝntǝ ni ate ǝhǝŋi tago owe takare ŋi nan ā yayau awa no ū dira uru makiri i zine dere u yiya birwa bi ŋi. ¹⁸ Ā ŋo bare ǝ nyimi ogwene nan u ruwa Aco, Yeso Kristi. Da agata me ǝ cikǝ nan me kusun nan usuru ā kane ā waŋa suŋ. Amen!