Udaraŋa u 5

1 In ra bunku tenoŋono anyima ŋi, Mmi, se nze onoŋono. In kon ze unu biyǝ nlen mu shiyǝ makwai ma Ukase, konzen in ze onanyimi uyisiza ogeme se u sa ra. 2 Aza nane, In ra bunku huŋi, tenoŋono. Mǝntǝ ŋe kima, Dan bakase a na wuna ŋi a nu ne, ama bakase ŋi na barsa, nan ugara Ədǝshǝri. Mǝntǝ ŋe, dan baka iru ni, bata nan birwa bevento. 3 Tago I wuza se ticakura aza ano ageme se ara Tara ti ŋi. Ama, cikǝ ni imu massaza ano cebete. 4 Inze uca ogeme se Unu mǝntǝ kuwavi ra, ŋi nin kai imu mura iwu yisiza i suŋ. 5 Uruna ogemme, ŋi ano miŋina, nyaka retǝ a tenoŋona tiŋi. Zaluŋi, pate ni apuŋa ha ŋi nan udutu rete nan rere rǝ apun. Baka Ədǝshǝri nyamene anu yisiza ate, bata Ma nyaka ogwene Anu dutu rete. 6 Bakan nane, dutu retǝ riŋi adizi tare ta Ədǝshǝri da Ma via ŋi ucu wuma. 7 Kunku ni zale iwi I hiŋi a Me, baka se Me Ma barsa ŋi. 8 Cikǝ ni kima, pǝpai ni. Onu nyamene ŋi, Shetan, ma ra liŋarzu ŋi uga binama buja, a giŋǝrǝ ono geme se ma nin jankala. 9 Tore ni aza hame, Uyiya birwa biŋi cikǝn agata. Ŋi zin u ru si anuwanoma haŋi anyimi uyiya birwa a massano ra mutǝnǝ ze ushiyǝ makwai a magem mame konzen. 10 Amaro ushiyǝ makwai mageme se ma tin dakano ne, Ədǝshǝri Ono ogwene, on tisu huŋi uyisiza of home u suŋ ayimi Ukase, nin we ŋi kima, iza ŋi, konzen Ma nya ŋi agata. 11 Ame ze ucikǝ u suŋ nan suŋ. Nan Taya te. 12 Ina yita Silvanus uga oyeno u yiya birwa, konzen Ina darsa a ki ŋi bateke asuru a me. In ra bunku ŋi konzen In ra bi mi ŋi se eme geme se In darsa enze Ogwena Ədǝshǝri u ganka. Tore ni a nu. 13 Uwai ogeme se ma ra Babylon, Ono geme se awa zake me nan ŋi, In ra gusan ŋi kukwan. 14 Gusan apuŋa haŋi kukwan nan utilala tubarsa. Taya ton tenze da I cikǝ shammo zalu huŋi ana geme se ŋa ra anyimi Ukase.