1 Tago inwa bi nan eboze ano né i Ti-malika. Bata ingase in watǝ ze Nan tubarsa ne, Ina cikǝ remelo ru uganga né utere biru. 2 Tago in zen unyaka ubuku emegem se adawa nǝrǝ ni konzen uru zale magangaŋ mageme see was pate, se konzen ago in zen uyiya birwa be geme se in nin vika tewö. Bata in damen tubarsa ne, In dame azi iyabo ne. 3 Tago in wa nyaka kusun emegeme se in zenno dǝ nya ano tiyaŋ, nze in kun nyaka retǝ ron dǝ a dishi. Bata ingase in damen tubarsa ne, in dawa mura iyabo be. 4 Tubarsa te zen ishammo Nan ishawo. Tubarsa ti damen uyiyaji ni né utere begesen ne. Ti damen ukara né 5 magunta. Ti ta zen ituma rete ne. Ti ta zen ucara birwa sassa ne, né ti ta yiya abaro udangalo ne. 6 Ti damen izalla udira magangaŋ ne. Bata, ti woze izalla a magangaŋ. 7 Tubarsa ti manti kuyyiya, ti garan kuyyiya, ti zin agata awu garan epe zale tegogoro, konzen ti mutǝnǝ a kuyyiya. 8 Tubarsa ti ta massozo ne. Ingase awa buki emegeme se adawa nǝrǝ cebete, in ni waka. Ingase a zen eboze cebete, I nin wuri. Ingase a zen uru, I nin waka. 9 Baka woro ru a uyulu konzen ibi a uyulu. 10 Ama uca ogeme see unu binja me raiy, egeme se i dawa binja ne nin masso. 11 Uca ogeme see in wa ze vana, in bǝnu uga vana, in adodonza uga vana, rekesa ron uga vana. Nze uca ogeme se in wa cika ono, in wa kuki rinabiya. 12 Baka wajiya in nǝri ken ayimi ururu, Bata in tuni aji nan aji. Wajiya in ru kusun kandogeme se in zen u ru cebete. 13 Ama wajiya imi taro igiya na ruku: Uyiya birwa, Agata ugara imu ra, nan tubarsa. Bata i sǝru anyimi igiya enze tubarsa.