¹ Yeso wosso piɗɗi kha woreni khu minna Juda khama ti piɗiwo ti yappi negge Jordan, lenya kha wattu pini ɓiran kheri ta suppozun ɓiran. Yaɗɗa wo kheri yigi. ² Pen Yambam wana piniya tumponi kha paro ta, "Wala ma kpattin ɗoɗ khira kha mannani?" ³ Kheri kha ɗeɓani ta,"Dimani wo Musa supe ma tama yu. ⁴ Mikhe kha ɗeɓani ta Musa menemu piɗi ta mu ɓala alagara kappi ɗiga mun mun ti manna muma moti khobo," ⁵ Lunkhu wo ma ɗigi kha ya rossowo ɓang kheri kha ɓallema ɗoka khei, "Yeso kha tepzun. ⁶ Ta pari khui ru khupebe, 'Yamba yuwezun kpaten kha pomon.' ⁷ Lunkhu khe meya ta wosi ɗahni kha nani kha laɓɓani ti sini mannani. ⁸ Pello mikhe ɗa ɗiya sik monni. Mikhe a ɗiya pello ɓiran, ama sik momi. ⁹ kikhe wo Yamba khawo monni angige an khapani." ¹⁰ Wo mikhe ɗigi ta minna siɓɓa yaɗoni mazani ɓiran kha paro khe. ¹¹ Kheri kha tepzun ta, "Kho nong kha pau ɗiga mannani kha ɗig manni pomonnikheri yo jiro tu khuri. ¹² Ma moti khapo ɗiga kha mannaro moto yo giro." ¹³ Mikhe kha wattu kha siɓɓa sun nyititi tisi tama kheri lun kherani ti kuzun amma siɓɓa yaɗoni kha khaizun. ¹⁴ Wo Yeso peno kikhe, kheri a naptomonni kha tepzun, "Ma wosi siɓɓa ma wattu peno, maga khaizanim lunkhu ɗungɗeni mina Yamba weni siɓɓa kikhei. ¹⁵ Khulli-khulli ni tepama, miya wo ar khep ya ɗegɗeni Yamba khigi siɓɓa nyititi kikhei ta khulli khulli ar ruwani." ¹⁶ Kheri kha khep siɓɓa ta khirani soɓon pokngɓang. ¹⁷ Wo kheri kheppo si mereni mani miya kha peron kha tana ta peni kha ɗunghani ta ɗoni, kha yi maza, "An supiparongɓang, woni wona yi naga we rosson gɓang?" ¹⁸ Yeso kha tepni "Ta yaghai khi waweno ngɓang? angige miya wo walla sai kheden Yamba. ¹⁹ Khi peno ar kherparoni Yamba kha tuk khemem, kha yi girom kha yi khiriri kha yi paro kyaɓɓa, kha yi khimemi mungɓuɗe ti ɗahgo kha na go,: ²⁰ Miya kha teɓani, ansupiparo, pehp khe ni kpaɗi you ɗan ni ɗita yere," ²¹ Yeso nigheni kha menni kheri kha tepni, "Ta wemoni wekha waum khira pilkha we wokhi ɗiogin khate khi mun an khenni, ɗankhiri we kpaɗi ti khergu panan khi watau ɗabru pini. ²² Lunkhu pari khirei kha kherani kha ɓalyaɓong kha khoɓe ni kha sugan sik, lunkhu kheri kham kha we ɗaggam. ²³ Yeso kha ɓani jeɗini kha tepti siɓɓa ya ɗoni, "Ta taɗiya kha ɓonne wo an kpaɗa ti ri ya ɗukte ni Yamba! ²⁴ Ma siɓɓa yaɗoni kha yi mamaki kha paroni khe. Yeso kha tepzun ɓiran ta, "Siɓɓa ta ɗiya ɓang ri ya dukte ni Yamba. ²⁵ ta yi khumun we tellu ta ri pisi aro yiri kha wo an kpada to ri ya dukteni Yamba," ²⁶ Mikhe kha yi mamakikha teɓani ti saɓ ta, ɗima an nog we ta khanna?" ²⁷ Yeso kha nighe zun kha teɓani kha "Lenya aryim kha Yambam, pehp we ti pini Yamba ti yi walla. ²⁸ Bitrus kha kheɓsi yini paro, "Ɓano mun wosim wi mun pehp mung ɗabru pego," ²⁹ Yeso kha tebzun "Khulli ni teppema, angige te talla ma wo wossina minnani, kha molli, kho mulmo pomin kho nani kho Dahni, kho siɓɓani, kho khuyel lunkhu paro Yamba, ³⁰ Wo ar minna, kha an moli, moli pomon, kha nah, kha siɓɓa, kha khuyel,kha khiɗam bone khe kha kupeɓi ɗita wattu, ɗeɗukte. ³¹ Dakgam wo ɗigi ti tom taɗina ta phi, wo ti ya ti yaphi ta ɗinato yaɗo. ³² Mikhe ɗigi ti kokko, ta wur Urshalima Yeso kpaɗi piɗi khopou yaɗo. Siɓɓa yaɗoni kha yi mamakhi, mikhe wo ɗita ɗappini tayi ɗiya yi kyo. Yeso kha taɗ gbummo tura peeleukhe ti jele kha kepsi tepzun we wota weni. ³³ "Ɓano munɗa ammi Urshalima ta wora mun Lahni miya ti kup an kpaga kha an balla, mikhe ta yim kon muro kha muni ti lenya wo apen Yambam. ³⁴ Mikhe ta zole ni ta muro amma ti khu son pelleo kheri ta illina." ³⁵ Ma Yakubu ya Yowanna, lahni Zabadi kha ammur peni kha teɓani, "Ansuɓir, mun mengi khi yemon kho weni womun mazekho". ³⁶ Kheri kha tepsu ma mongi wona yima?" ³⁷ Mikhe ta, wossemun mu ɗiya kha ti khu khiran khizaugo. ³⁸ Yeso kha ɗeɓezunta, "Mapen weh mara mazeni mara wawu suwani ti ya ɓiɗum wo nase kha mara wawi khum rosso kha pina am wo wota penan nenou?" ³⁹ Mikhe kha ɗiɓani ta sunɗa wawina." Yeso kha tepzun ta," laɓiɗum wana se mara se kha pana am wo na pinna mara pinna. ⁴⁰ Amma miya wo ta ɗim ti khu khiran kheweno kho ti khiran khizauna na an munezum, khe ɗigi ti mega wo kpaɗipiɗi kyakkeni." ⁴¹ Wo issi piɗɗi siɓɓa yaɗoni kuzun gɓummo khiro paro khe, mikhe kha khepsi yi ɗen ti khuni Yakubu kha Yowanna. ⁴² Yeso kha yerezun ti pinni kha tepzun, "ma peno mikhe wo menon khasuta sun an kupina mir Gentile kyou khuzun. Khama mikhe wo digi ti ya ɗoka kha ɓang ti khuzun. ⁴³ Arɗiya kikhe ti talla ma. Ma miya mengi ɗiya gɓuɗe ti talla ma ta ɗiyan suran ma. ⁴⁴ Ma khonong mengi ɗiya ti tommon ta ɗina kheɓe ti pepma. ⁴⁵ Lahni miya wattu lunkhu ma yi ni ruzam, amma makhe yi ruzan lunkhu ma khe ri mon khigani wo appi khul pehp." ⁴⁶ Mikhe kha wattu Jeriko wo mikhe wosso Jeriko kha siɓɓa ya ɗonni kha lin ya gɓoh, Lahni Timacus, Bartimacus . an banpok an pugum ɗigi ti jele kokko, Kokko, ⁴⁷ Wo kheri khiro ta ni Yeso kheri kha khepsi yi ɗimma kha paɗi ta, "Yeso Lahni Dauda, ɓaneno kha arongɓong! ⁴⁸ Lenya ɗagan ta khai an pugumi tama pemo assi ya poni phei, kheri kha ɗita yi paro kha paɗɗi, khere you khui pehp, "Lahno Dauda, baneno kha arongɓong!" ⁴⁹ Yeso kherau kha teb tama yereni. Mihei kha yeru miya an pugammi, ta lunɗogo illo kheri ɗita yego." ⁵⁰ Kheri kha weri soɓani kha illani kha wattu pini Yeso. ⁵¹ Yeso kha menani ta, khi mengi ni yigo wuni? miya an wallani mengi we yapiɗi. ⁵² Yeso kha teɓani ta worego li morggo sauwego khumun khumun kheri kha we yapiɗi kha ɗappini ti kokko.