Pala 1

1 Yeso kha kyori ɗoh kha weh lenya an kurbe weh sobgi baikozun tiya ma'aji. 2 Khere kha weh pomun weh mannaro muro, mata an kenni mata sobpo anini pelleu tiya tassa. 3 Khere kha teɓani, "Ta kikhei ni ɗita teɓama, pomun khei weh anghai kha mannaro khobe ma pehp. 4 Lenya khei pehp munwo tiya meni ɓong weh mikhei kham kha tehn. Amma pomun khei, munwo tiya kenniro non kurbero pehp weh mata munwo." 5 Khigi yaɗɗa weh lenya tebgi paro wab Yamba, weh yiwehni kyollom kha panni weh walla kha baye-baye, kha teɓani, 6 "Khiɗan wukhei weh wau pikki ɗita wattu weh anghai panni kho monni weh ta kyari tikhu molli weh ari dukri kukkim." 7 Mikhei kha mazi poni, ta, "malam, ɗimin khiɗan wukkei ta wattu? ani ɓiran alama tikhu wukkhei weh ta wattu?" 8 Yeso kha meni, "Mayi yung rosso ma lenya kha ɗuklema lenya gbo weh ta wattu tiya sommoni, kha teɓi, non neh si, panan keran pikki wanna nimmi maga ɗab pizun. 9 Mara khiri pari ɓure kha paro-paro, ɗiyo dole khidan wukkhei ta wattu pikham, amma pogo ari wattu bomi-bomin. 10 Khere kha tebzun, alumma ta kheri tikhu alumma,duktei ta kheri tikhu duktei. 11 Ta yi gɓuɗe ɓabi khuyel, piɗi dam-dam ɓiran ta yi kuzam kha anoba. Ta yi weh munni kyo kha gɓuɗe alama weh munni kyo ti gak. 12 Amma tikhu wukkhei pehp, mikhei ta khebezun, mikhe ta sanan tahma, mikhe ta mune ma tiya piɗi wab Yamba kha mina kurkuku, mikhei ta wattun kha ma ɗoh an kuppina kha gwamnoni elenkhu sommono. 13 Ta ɗiye ma piɗi kini pok. 14 Elenkhu khei ma li tiya ɓong mari amsi parom, 15 non neh weh na mumma ar paro kha yung ya rosso weh pehp mikiyama ari kheri khe kɓuɗe mam. 16 Amma pehp khama an laih mun khama molli khama khere mikhei ta mune ma, kha tukkuri issi ma. 17 Lenya ta khuɗe ma elenkhu sommono. 18 Amma anghai kho suk khuma weh ta kyeikkɗom. 19 Tiya yung rosso ma ribanto khiga. 20 Kalang ma wau Urshalimakolou kha an kheri kyonno ɗan ma peni ta suger ma you nimmi. 21 Panan lenya we ɗigi ti Yahudiya ma mikhei tanu weh wori khu teɗa, lenya weh ɗigi tiya talla mina ɓiran khoɓo, ma mikhei kha wossi lenya weh ɗigi ti mina yokkol rirum. 22 Ti ya pikki khei weh khara mawan kha ɗen, elenkhu pehp weh ɓallo ta kemi. 23 Kaiton lenya an pule an muni wuɗi tiya sun khei! ta sei bonne piɗi, kha ɗen weh wori pi lenya khei . 24 Mikhei ta sugi elenkhu ɓang po ta kobi ɓiran ta worezun piɗi bonne ti piɗi pehp, al'ummai ta tappori Urshaslima, yar weh pari kheran pikki al'ummai yu. 25 Ta weh alama tiyapikki kha tere kha ɓajal ti khu pehbe ɓiran, al'ummai ta sei bonne, mikhei ta kyagi elenkhu eleh negeh kha rakumi ya am. 26 Lenya ta kyol rossozun elenkhu kyo kha ɓal ya ɓong weh tikhu pehbe. Gama ta yengiɗi ɓong gak. 27 Panan mikhei ta weh miya ɗita kyaru tiya kergu kha ɓang kha pawuni weh gɓuɗe. 28 Ti ya kheran pikki weh wukkei ta kheɓi si potu, kyeru ɓangi mama kyokri khama ti gak, elenkhu meri pok ma pona nimmi." 29 Yeso kha muni misali, "Ɓani ɓuro duss, pehp issi ɓuro. 30 Kha kheran pikki weh mikhei pergin kha alau, mara weh kha khuma ta puzo pona nimmi. 31 Kikhei ɓiran, mama wau khiɗan wukkei farigi mama peni ta ɗuktei Yamba pona nimmi. 32 Kikhei ni ɗita toɓema, khu peno khei ari temminam sai pehp wukkei faro pikan. 33 Gak kha khuyel pehp ta temmina, amma parono ari temminam. 34 Amma mama ɓani khuma, elenkhu ma poɗi khuma kayi weh ɗing gama pikki ta wattu anghai shirim. 35 Khigi ɓara, ta wattu ta khui kho non weh kham khigi ti ɗoh pebe. 36 Mama ɗiyo tiya liyaɓong ti kho ɗimin ma ɗimmi Yamba elenkhu ma weh ɓang suwani ti khu pehp wukkei weh ta wattu, kha yaɗɗa weh mara kheri ti ɗoh miya." 37 Kha pikki khere ɗita kyuɓam tiya mina Yamba pehp peɗi ɓiran ɗan khobi ya panni weh yegi zaitun. 38 Pehp lenya mikhei kha wattu pini elenkhu ma mikhe kereni kha liliou tiya mina Yamba.