Udaraŋa u 14

1 I waze ti muru te repo ti nǝ ruku da a wuza izalla u pəri konzen remeze ri imu wushu udira yeast. Ogomo ti priest nan ano bezezze makiri ŋa raa giŋarə nane se ŋa nin me Yeso rikəri ri mi enze ŋa woo me. 2 Baka se ŋa ra gusa, "Dan uca izalla ne, tago u kara yere ənyimano ne." 3 Uca ogeme se Yeso ma ra Bethany ənyimi a kura Simon okoto, Mme a wushi mu wushu a table, enze uyu uwai rawa me nan maneŋe maa alabaster u caro, ma geme se aa panaka kima, konzen maze nan iru. Nze uwai me pore u caro maneŋe ma me, ma kuŋki mi ma me a rete. 4 konzen awe wərənu se ŋa kone u cərə puru. Nŋe ə bənu nan ate a haŋe a gusa, "Baka iya ze araa sore me? 5 Maneŋe mu unya o loo ugiya, atinin rəsə ma me nan iru i kira ti dinarii sinu si taro, enze a ware ano tiyan me." Nze ŋa kone u cərə puru nan uwai me ŋa mee ogogomozo. 6 Bata Yeso go, "Deke me ni. Baka iya ze ŋi ra ginǝrǝ ome nan betoi? Manā wuzan imi wuma. 7 Kiyya uca ŋi zi nan ano tiyan teme, konzen nan ciyu zi ŋi naa wuna birwa da ŋi wuza ŋe imi wuma, bata dan kiyu uca ze ŋi nin muran ne. 8 Mana wuna eme geme se ma date: Manaa wozo ripuŋa ron baka riwase. 9 Gaŋgaŋ Naa buka ŋi, kiyyu uca ogeme se ara yisu nlen ma giya ənyimi masano zale, eme geme se uwai u giya naa wuna ǝrǝ biyǝ mi, da a dunza me." 10 Enze Judas Iskariot, ono vento ǝnyimi ano rikuri, ma wame aa ogomo ti priests daa ma ka ginǝrǝ uruna ogome se nee manin nyaka me aa ŋe. 11 Uca ogeme se ogomo ti priests kone nane, enze ŋa kone olome ŋa gomme ŋaraa nyome iru. Enze ma me u ginǝrǝ u wǝri daa ma nyaka me aa ŋe. 12 Ətiyǝ u bura se ŋaa wame a gore imu wushu upǝri rii, se ŋa naa mase u tuzu bitan bi u nyaka, atuma ahame gomme, "Aaba ze ŋo raa barsa o hodo i wan i mamare, daa ŋo wushi imu wushu upǝri? 13 Ma tome atuma ahame a repo enze ma goŋ ŋe, " Wǝnni ǝnyimi ape, konzen owe se mǝnǝ zǝkǝ u caro manyi u sǝru mara muru huŋi. Tarse me. 14 Are geme se ma pete ǝtitau ǝnu, tarse me ǝnyimmi enze ŋi goŋ onaa kura ageme, 'Obeze naa guna, "Ugura regeŋa roŋ uyu, aregeme se nin wushu imu wushu upǝri rii nan atuma ahaŋ?'" 15 Mara beze u huŋi u gura u yake aaza me, u sǝru, ogeme se ana gore ome. Mamara do kiyammo ara me." 16 Atuma me dura enze ŋa wame ǝnyimǝ ape. Ŋa mura ki yammo uga nane se mǝ buki a ŋe, konzen ŋa mamare emete izalla uu pari rii. 17 Nan ucu wǝru, ma rai nan ŋan ka rikuri regemme. 18 Se ŋa raa cikǝ a tabul a wushu imu wushu, Yeso go, "Gaŋgaŋ nǝ buki ŋi, ono vento ǝ nyimi ǝhǝŋi se iraa wushu mi nan me mara nyaka o hoŋ." 19 Kweren o hoŋe ŋa kuna ucaro me, kuyyǝvi buki ma gomme, "Gaŋgaŋ, tǝ mǝnyi a man ne?" 20 Yeso gare enze ma gon ŋe, "Ono vento uwano rikuri rimi, ono ogeme se iraa wushu mi nan me eso vento. 21 Nane ze Vana Ono raa tarse me uga nane se nlen ma me maa buki aza ahame. Konzen imi jai ze aza ono ogeme se ana nyaka Vana Ono bakan me! I raa kira ame, se a ti tin nin yoo me ne." 22 Se ŋa raa wushu mi, ma yete borode, ma nyaka taye aza me, konzen ma pose aa me. Ma nyaŋe enze mago, "Yita i giya. Ripuŋa ron renze ri giya." 23 Ma yete koso, Ma go kukwan, enze ma nyaŋe, enze ŋa shi zale, ǝnyimmi. 24 Ma goŋ ŋe, "Mǝnyǝ man manze ma giya se ǝ buki, mǝnyi ma geme se nǝ kuŋku baka ano cebete. 25 Gaŋgaŋ Naa buki ŋi, in dǝmǝ shǝ manyi ma iburi titi konzen ne se ǝtiyǝ ageme se Mi raa shǝ ma sau ǝnyimi te gomo tǝ Ədǝshǝri." 26 Uca ogeme se ŋa mase u gusa irina, enze ŋa suri ŋa waŋ owoo olives. 27 Yeso goŋ ŋe, "Zale u huŋi ira deko hoŋ, baka a darse, 'Ra wuna ono ri nyaŋana reme enze itan me ra sarmo.' 28 Konzen amaro uyira ohon, Ra waro uhuŋi a pete a Galilee." 29 Peter gomme, "Ngase adaŋara me ra sarmo, min dama wuna nane ne." 30 Yeso gomme, "Gaŋgaŋ naa buki ŋi, nan ǝtitiyǝ a giya, be goro bi nin kazu tuŋara ka repo, ŋo ra meshe magita mu ru ohoŋ ka taro." 31 Konzen Peter go, "kake se minǝ wǝnǝ nan ŋo, min da maa meshe magita mai ne." Ŋa buki nane kwere ohoŋe. 32 Enze ŋa ra aregemme se agosen no Getsemani, enze Yeso goŋ atuma a hame, "Cikǝ ni a rigiya a min ka remmo." 33 Ma yete Peter, Jamese, nan Jone nan mme, ma kuna u caro me konzen birwa ǝpinju. Mǝ buki a ŋe, "Birwa bon binǝ tǝsǝ mi ǝ pinju. 34 Ma goŋ ŋe, "Birwa bon beze kpai kpai gaŋka, aa binu bu wǝnǝ. Cikǝ ni a rigiya a rinyaŋana." 35 Yeso maa vǝti o shokko bate, ma gara anyaŋa, enze ma remmo mago taa go inin wuna, uca ugiya tini waka a me. 36 Mago, "Abba, Dada, kuyya iwu wuna ze nan ŋo. Katara iso igiya aza han. Dan u barsa o honne, se o hoi." 37 Ma kuri enze ma mura ŋe an roo, enze ma goŋ Peter, "Simon, ŋo ran roo? Ŋi ta date i woze tunərǝ ti uca vento ne? 38 Nǝrǝ konzen i remmo tago ŋi pete a rikunuŋa ne. Uvunu u giya abarsa me, konzen ripun rina nyamene." 39 Konzen ma kuri a remmo, enze ma kuri ma duri isana a melo ageme se mata na biyǝ. 40 Konzen ma rai ma mura ŋe an roo, ǝji a haŋe na wuna denden nane se ŋa tan date ŋa ru eme geme se ŋa nin buku a me ne. 41 Ma kuri u taro enze ma goŋ ŋe, "Ŋi zini idan roo konzen a vonke ene hiŋi? Inaa bare ŋi! Uca me naa deŋe. Nǝrǝ! Ana nyaka Vana ono a tare ta ano macara. 42 Yira tore; a woro dura. Nǝrǝ, ono ogeme se mara nyaka ohoŋ mana deŋe voto." 43 Se maa da əbǝnu, Jada's, ono vento ǝnyimi an ka rikuri rimi, ma deŋe, enze ano cebete ŋa ze nan me nan ti vira nan ti bita, a suru o ogomo ti priest, ano bezezze makiri nan ano aŋono. 44 Wagiya ono u nyaka o home ma na nyaŋe konzen ma beze ŋe, a gusa, "Ono ogeme se ŋi nii se in cujju mi, manze ono me. Anyaŋana me konzen ŋa dura nan me." 45 Se Judas wa deŋe, ma wa wake cas a waŋa Yeso enze ma go, "Rabbi," enze ma cunju mi. 46 Enze ŋa tare taare aame konzen ŋa dura nan me. 47 Enze ono vento ǝnyimi a haŋe a tore voto ma zuzi u vira ma gware orere o ogomo ti priest, enze ma ka tare me o toŋe. 48 Yeso goŋ ŋe, "Ŋi nā suru, uga ano meshe ǝkǝri, nan ti vira a gura ti bita da ŋi meyon? 49 Uca ogeme se i waze nan ŋi Konzen a masa u huŋi a kura Ədəshəri, owe ti ta meyon ne. konzen i giya ana wuna da a binja nlen ma geme se awa buki." 50 Kweren ano ageme se ŋa ze nan Yeso ŋaa deke me ŋa some. 51 Oyono maŋina, se ma soke udi linen base se mana liŋərə ə ripun ŋa reme, a tarse Yeso. Se ano me ŋa me me 52 enze ma deke ŋe nan udii linen mi ma some ma deke ŋe e shape me. 53 Ŋa waŋ nan Yeso a ti priest ti səssəru. Zale nan a gomo a ti priests nan anaŋono, nan ano obezezze makiri wa binja a rame. 54 Peter me u tarso ŋe a tamaro, a ya yau nan u tidara u biyǝn nlen ma u priest u Sǝssəru. Ma cikǝ ənyimi a nyaŋana, se ŋa ra kuna ura da ripun rewe kpai. 55 Wa giya Ogomo ti priests nan Kweren ano ə sǝssǝru a ti Jews ŋa ra ginərə imu buku aza Yeso daa ŋa mura ŋa woo me. Konzen ŋa ta mura iyabo evento ne. 56 Nane ze ano cebete ŋa ra nan eboze en pore aza hame, bata eme geme se ŋa buki aa ta gara ne. 57 Awe yere ŋa tore enze ŋa rai nan agangan an pore aza hame; ŋa go, 58 "Woro na kuna me a gusa, 'Ra wirti u gura u ja se a piyǝ nan tare, konzen in piyǝ ənyimi ti muru ti taro Mmi ra piyǝ mi dan nan tare ne."' 59 Zalen nane nlen ŋa maŋe ma ta gapana ne. 60 U priest u sǝru ma yere ma tore ənyimi a haŋe enze ma saŋare Yeso, "Udamen imu buku ni? 61 Iyaze eme geme se ano agiya na buku aza a hai?" Enze mago wete ma taa buku iyabo ne. Konzen u priest u sǝru u saŋare me, mago, "Ŋo ze Ukase, Vana Ono taye?" 62 Yeso go, "Mi zi; konzen ŋi ra nii Vana Ono uca ogeme se mənə cikǝ u ware bilai nan agata enze konzen ma tu nan tewero ta ədəshəri." 63 U priest u sǝru ma darse udii nze ma go, "Ezene i daa ginərə ano u buki iyabo aza ahame? 64 Ŋi na kuna macara ma me. Iyaze ze anin wuna?" Zale ohoŋe ŋa nyamene me uga ono ogeme se ma na wuna eme geme se e deŋe u wənə. 65 Awe me u kuŋku o home taye ŋa pate me inmwinyu enze ŋa cuta me konzen ŋa gomme, "Nyaka re rituma!" Anon tuma ŋa yete me enze ŋa tari mi. 66 Se Peter wara ədizi ənyimi a gawa awa aru biyən nlen, aya rere a galla aa priest u sǝru ŋa raiy a me. 67 Ma nii Peter a tore a kuna ura, enze ma wame voto ma nəri mi. Enze ma go, "ŊŊo naa ze nan Ono Nazareth, Yeso." 68 Enze ma nyamene, a gusa, "Idan rawon aa birwa nee in ru eme geme se ŋi rə biyə mi ni." Enze ma suri əkəi aru biyən nlen ma me. 69 Orere, u galla nəri mi konzen enze ma me u biyə mi a ano ageme se ŋa ra tore a rame, "Ono u giya mərə nyima ahaŋe!" 70 Enze ma nyamene konzen. Se a dakano bate ano ageme se ŋa ra tore a rame ŋa me u gusan Peter, "Nane ze ŋo ra nyimi a haŋe, ŋŋo ono Galilee zi." 71 Enze ma me ubənu buu, konzen a tonozo, "Min ta ru ono u giya se ŋi ra bənu a za me ne." 72 Enze be goro bi wa tuŋare o repo. Bata Peter dunza amelo a geme se Yeso wa buku aa me: "Be goro binin ka zu tuŋara ka repo, u raa meshe magita mu ru ohoŋ ka taro," se ma ru se ma nə yii enze ma me u riwa.