1 Igiya enze u bura u yisun nlen ma Yeso, Ukase, manze Vana Ədəshəri. 2 Uga nane se ezen u darsa ənyimi Isaiah u tuma. "Nərə, Mmi ra tuma u tuma o hoŋ aa rawa iŋi əji, Ono ogeme se ma nin mamara ŋi u runa. 3 Remelo ro ono a tisiza ənyimi uja, 'mamara uruna Aco; mamara u runa o home u waŋ cass."' 4 Jone wa ra, a zoroso ǝnyimi uja konzen aa yisun nlen ma o zoro a ano ageme se ŋana ka a isa macara maŋe. 5 Zale nan innyaŋa ma Judea nan Kweren ano Jerusalem ŋa suri a waŋa ame. Maa zoro ŋe a əyimi Rii ri Jordan, ə biyə macara ma ŋe. 6 Jone maa tasu nan rikaza ri bi rankome nan ri kwararran ə təsə u tinu, Konzen imu wushu e heme benyeme benze nan mato. 7 Maa yisu, "owe ra ra amaro a han, ono ogeme se ma kiran nan agata, ono ogeme se in taa date in taze u jankalan u nyaforo o home ne. 8 Na zoro ŋi nan manyi, emme, mara zoro u huŋi nan uvunu u sansan." 9 I wa wuna ənyimi ti muru te geme se Yeso wa rai əsuru aa Nazareth u Galilee, enze Jone zoro me ənyimi rii ri Jordan. 10 Se Yeso suri ənyimi manyi, nze ma nii ədəshəri warna, əpǝnu, enze ma nii uvunu ə tunu aa rawa a me uga biwurəi. 11 A kone u bukǝnu ǝ əsuru ǝdǝshǝri, o go "Nŋo ze vana o hoŋ. Birwa bon te tete nan ŋo, gaŋka." 12 Nze uvunu mi u zuzi mi a wame ǝnyimi uja. 13 Ma ka cikə ǝ nyimi uja, ti tiyǝ ǝ kuru naze, shitan a kunuza o home. Emme nan i nama uja, konzen ti malika a wuza o home rinyaŋana. 14 Amaro se a me Jone, enze Yeso rai ǝnyimi Galilee a yisun nlen mǝ Ədəshəri, 15 a gusa, "Ti muru ti na binja, konzen te gomo tǝ Ədǝshǝri tina deŋe voto. Kǝ ni konzen i gare nan nlen ma giya." 16 Se maa raa ŋana a rekero ri udandale manyi ma Galilee, nze ma nii Siman nan Anduru u wanome Woman me aa kuŋku o renge ǝnyimi u dandale, baka se ŋa ze ano o meshe iginu. 17 Yeso goŋ ŋe, "Ra, tarson ni, raa wuna u huŋi i cikǝ ano u meshe ano." 18 Nze ŋa wa deke te renge a te ŋe, ŋa tarse me. 19 Se Yeso ŋaŋka ǝji bate, ma wa ziya a Jamese vana u Zabadi nan Jone u wanome, nŋe o koŋgo a mammara te renge. 20 Ma tisa ŋe nze ŋa deke Aco o hoŋe, Zabadi ǝ nyimi o koŋgo nan ano i tuma e heme ŋa tarse me. 21 Nze ŋa rai ǝnyimi Kaparnahum, konzen ǝtiyǝ o vonke, Yeso wame ma ka pete a synagogue enze ma bezezze ŋe. 22 Ŋaa kuna malo ma ri masa a reme, ma bezezze ŋe uga ono ogeme se ma zen gata dan uga ono o bezezze ne. 23 Aa aregemme, owe ǝnyimi synagogue se ma ze nan uvunu u buru mǝ sǝkǝnǝ, 24 iyammo ze nin wuna nan ŋo, Yeso u Nazareth? Ŋo na ra da ŋo woze do? Min ru ono ogeme se ŋo ze. Ŋŋo ono u sansan, ono Ədəshəri! " 25 Enze Yeso jarame uvunu ɔbɔɔ enze ma go, "Guna wete konzen suru ame!" 26 Enze u vunu u dira sansan u vǝti mi anyaŋa enze u suri a me emme i zama, ǝsǝnǝ gaŋka. 27 Kusun ano me wa kuna iwi, enze ŋa saŋare a puŋ ahaŋe, "Iyaze i mi giya? U masa nan agata? Mme konzen ma bukənu nan u vunu u dira ma sansan Konzen ŋa kone me!" 28 Nlen aza hame ma sarmo a kuya ba, Zale ǝnyimi nyaŋa ma Galilee. 29 Se ŋa mase usuru a synagogue, nze ŋa rai ǝnyimi akura a Simon nan Anduru, a gura James nan Jone. 30 Wagiya uwame Simon wa ra luta baka u dira gayan, enze ŋa bukǝnu nan Yeso Aza hame. 31 Enze ma rai, ma me me u ware, ma yiza me ma tore; enze makwene ma me ma sope me, ma me u dima. 32 Ətiyǝ ageme nan u wǝru, se oŋmwe na tunu, ŋa rai nan zale ano ageme se ŋa ta ze gayan ne nan ono u vunu ɔbɔɔ. 33 Ano ape me wa duri zale ŋa raiy ŋa tore ǝrǝ kǝi. 34 Ma wuna ano cebete, ano makwene kekeŋ kekeŋ ŋa wamo konzen ano cebete ma zuzi ŋi u vunu ɔbɔɔ, ma ta gare ma deke u vunu ɔbɔɔ me u bukǝnu ni, baka se ŋa ru mi, 35 Ma yere nan u cinju pin pin, nan ara duru duru; mǝ suri ma wame a riya tenteme enze ma ka remmo. 36 Simon nan ano ageme se ŋa ze nan ŋe ŋaa giŋǝri mi. 37 Ŋa ka mura me, enze ŋa gomme, "Kuyyǝvi rǝ ginǝrǝ o hoi." 38 Ma goŋ ŋe, "ndu ni a wame a riya, a tuŋara te geme se te ze voto, da min ka yisu nlen ma me konzen. Baka nane ze maa suru ǝ kǝi in ra a rigiya." 39 Ma suri ma ŋana ma tangaro zale ǝnyimi Galilee, a ŋana u yisun nlen ǝnyimi ti kura tǝ Ədǝshǝri a teŋe konzen a zuzzuzi u vunu o boo. 40 Okoto wa rai a me. Mme a riwa i zama; Ma gurwǝnǝ aa nyaŋa nze ma gomme, "Ngase ŋo gare, u visikun." 41 Nze ma binja nan ijai, Yeso durku voto ma dupa u ware o home, a gusan me, "Na gara, visuku." 42 Ara agemme rekoto reme re deke me, konzen a wuna ma visuku. 43 Yeso bǝnu a me, ma gomme a ma ŋana . 44 Ma gomme, "Pǝpǝi tago u buki iyabo owe ne, ŋana, waŋ ka yonke rete a re aa Priest, konzen u nyaka iyabo baka u visuko ye uga nane se Moses wa buki, i cikǝ imu biyǝ a ŋe." 45 Se ma suri enze ma me u biyǝ mi ano, enze ma me u biyǝ nlen mame nane se Yeso tan kuna malo ma opese a te pe-pe ne. Baka nane, ma suri ma ka cikə a riya tenteme, enze ano rase ame ǝsuru a ti rarra.