¹ Enze u priest u səru go, "Tegogoro ti giya Gaŋgaŋ me ze?" ² Stephen go, ayeno nan an Dada, kunanni: Ədəshəri wa yoŋko a Dada o hodo Abraham uca ogeme se ma ra Mesopotamia, bata mǝ cikǝ a Haran; ³ enze ma gomme, 'Deke nnyaŋa a mai nan reno a re, u wame an nyaŋa mageme se in ra beze o hoi,' ⁴ Enze ma deke nnyaŋa ma Chaldeans mə cikə a Haran; Əsuru a regeme, amaro u wənə Aco ohome, Ədəshəri wa rai nan me ənyimi nyaŋa ma agiya, aregeme se ŋi ze nan u cikǝ Wagiya. ⁵ Ma ta nya owe ome uga umura o home ne, o o, u ta deŋe ukape ne. Bata ma, buki—nan u ru se Abraham ma ta ze nan vana ne yəi—se ma ra nyakan nyaŋa ma me uga tommo a me konzen a abiya a hame a mara a hame. ⁶ Ədəshəri wa ra bənu ame nane, se bi ruza be me ŋa ra ŋuna timuru bate an nnyaŋa mə kəi, konzen anon nyaŋa mame ŋuna o hoŋe ŋa cikǝ arere na ra wuza o hoŋe i buru a siwai sinu i turu naze. ⁷ 'Bata ra biyə nlen azan nyaŋa ma geme se ŋa na wuza re rere reme,' ubuku Ədəshəri, konzen a maro nane ŋa ra suru ŋa rai ŋa gurwǝnǝn u tidara u giya.' ⁸ Enze Ədəshəri ma a nya Abraham məkiri mǝ utuzu, nane ze Abraham ma cikǝ aco Isaac enze ma mamare me ətiyə a uru; Isaac wə cikǝ aco Jacob, enze Jacob aco a abiya rikuri. ⁹ Baka se abiya wa ra reze Joseph (ono ədimu o hoŋe), ŋa rəsi mi ǝnyimi Egypt; bata Ədəshəri wa ze nan me ¹⁰ enze ma zuzi mi ənyimi Zale arezekoŋ. Maa nya Joseph mənyi ma wuma nan rekese əji a Pharaoh, ogomo u Egypt, ono ogome se ma ŋuna me u gumina aza Egypt konzen aza zale akura a hame. ¹¹ Wagiya ekomo wa rai aza zale Egypt nan Canaan, makpai ma cebete, konzen ano aco a hado tan date ŋa mura imu wushu ni. ¹² Konzen Jacob wa kone se ira wa raa Egypt, enze ma tome ano aco a hado a tano ti ubura te me. ¹³ A tano te o repo teme enze ma beze ano wanome rete a reme, Konzen uca ogeme ze Pharaoh wa ru ano akura Joseph. ¹⁴ Joseph wa kursi ano wanome nan rituma da ŋa goŋ Jacob aco o home da ma rai a Egypt, nan zale reno a reme, ano kusun ŋa ze i turu sunare nan shibi. ¹⁵ Nane ze Jacob wa wame ənyimi Egypt, konzen mǝ wənə, mme nan ano aco a hado. ¹⁶ Ə zəki ŋi a waŋa Shechem enze a ka luta me isau egeme se Abraham wa kwe nan silver a biya Hamor a Shechem. ¹⁷ Se uca ogeme se a yiya u wara deŋe, amelo nane se Ədəshəri wa yiya nan Abraham, ano me wa bare cebete a Egypt, ¹⁸ a ka deŋe a uyuca ogome se a ŋuna oyo gomo a Egypt, ogomo ogeme se ma ta ru owe se a gusan me Joseph ne. ¹⁹ Ogomo ovento u giya ma waŋare ano a hado konzen ma ŋuna ano a hado ŋa shi kpai, ŋa ŋuna ano aco a hado kake ŋa bursi abiya a haŋe riwuza ri buru, nane se ŋa tan deke ŋe nan ruma ne. ²⁰ Uca ogome a ana yoo Moses; maaze kima derte a Ədəshəri konzen ə mənti mi ti bərmə ti taro a kura aco me. ²¹ Se a aka suntare me əkəi, ugalla o yoo Pharaoh ma yete me enze ma mənti mi uga vana ohome. ²² Moses waze nan uru a kweren rekese ri Egyptians, konzen ma kerne nan uru nlen mu biyə nan ituma e heme. ²³ Uca ogome se ma ze uga siwai akuru naze, iwa rai me a birwa da ma ka nǝri reno, abiya a Isreal. ²⁴ Se mə nəri nane se ara wuza me nan u Israelite, enze Moses kai me, ma dope me me mme se u Egyptian wa noke me: ²⁵ Maa ra gusa nee reno a reme rinin ru se Ədəshəri nan rete reme ma ra zuzu o hoŋe, egeme wa taa ra a ŋe a birwa ne. ²⁶ Ətiyə u tarse me maa rai a awe ano Isreal nane se ŋa ra wolomozo; enze ma conno mə rusi ŋi da ŋa cikǝ shammo nan ku avi; ma go, 'Ano arome, nŋi reno renze; baka iyaze ŋi ra a carsa əbuŋ əhəŋi iruwa?' ²⁷ Bata ono ogome se ma na cara ono ohome ǝpuru ma yere ma tipi mi, enze ma go, 'əvizi na ŋunai bi kimu nan ono u biyǝ nlen aza a hado? ²⁸ U raa nara uwuna o hoŋ, uga nane se u ti wuna u Egyptian nan ŋǝru?' ²⁹ Se ma mase u kuna nane nze ma some; mə kə cikǝ ono u pən an nyaŋa ma Midian, a geme se ma ka cikə aco a biya a repo. ³⁰ Uca ogome se siwai ituru naze wa wake, u maleka wa yonke rete a reme ame ənyimi u uja o Owoo u Sinai, ənyimi nlen mu ura uja. ³¹ Se Moses wǝ Nǝrǝ ura, ma kuna iwi enze ma wame nan o kerkene ara u ra me; se mme a deŋe da mǝ nǝri o me, enze remelo ri suri a Aco, a gusa, ³² 'Mi zi Ədəshəri anoco ye, Ədəshəri a Abraham, nan Isaac, nan Jacob.' Moses kerkene konzen ma ta date mə nəri ni. ³³ Enze Aco gomme, 'Zuzu ti ŋaforo a ŋo atau, baka ara ageme se ŋo ra a tore ənu anyaŋa a saŋsaŋ ze. ³⁴ Mi na a nii ikpai egeme se ano a haŋ ŋa ra kuna me ǝnyimi Egypt; Na kuna izama e heŋe, konzen nǝ tunu dan zuzi ŋi; wagiya ra, Mi raa tuma o hoi a Egypt.' ³⁵ Moses u giya se nyamene, se ŋa go, 'ǝvizi na ŋanai bikimu nan ono u biyǝ nlen?'—manze ma ze ono ogome se Ədəshəri wa tome kusun bikimu nan ono u zuzu. Ədəshəri wa tome me u ware u umaleka ogome se u wa yonko a Moses ənyimi uja. ³⁶ Moses wa zuzi ŋi əsuru a Egypt, amaro u wuza tegogoro te geme se a dawa nii ni nan ti runa cebete a Egypt nan rii re jete, nan ənyimi uja uca u siwai ituru naze. ³⁷ Moses ogomme ze wa goŋ ano Isreal, 'Ədəshəri ra yiza utuma bakan ŋi ənyimi reno a riŋi, utuma uga mmi.' ³⁸ Ono u giya manze ma ze ənyimi ano u gurna ənyimi uja nan umaleka ogome se u wə bənu nan me aza Owo Sinai. Ono u giya manze ono ogeme se ma ze nan ano aco ado; ono u giya manze ma kai nlen ma ruma da ma nya do. ³⁹ ono u giya manze ano aco a hado wa nyamene da ŋa tarse me; ŋa tipi mi a rekero əsuru ənyimi ahaŋe, nan ənyimi iruwa e heŋe ŋa waŋere ti maro a teŋe a Egypt. ⁴⁰ Uca ogome ŋa goŋ Aaron, 'Ruza do ədəshəri ageme se a nin tarse nan woro. Baka Moses u giya, ono ogome se ma tarse nan woro ǝsuru an nyaŋa ma Egypt, woro dan ru eme geme se ina mura me ne.' ⁴¹ Nane ze ŋa ruza risunu ə timuru te geme konzen ŋa rase nan tegogoro ti u nyaka nan u runtu birwa aza eme geme se ŋa ruza nan tare a teŋe. ⁴² Ədəshəri waŋaro enze ma nyaka ŋe da ŋa gurwənə ewewero ədəshəri, uga nane se a darse u takadda uwa atuma, 'Ŋi na tuzun inama nan tegogoro ti u nyaka a siwai ituru naze ənyimi uja, ətitəu Isreal? ⁴³ Ŋi na gara nan ka gura ka Molech nan ewewero iwə ədəshəri Rephan, nan ti gogoro te geme se ŋi na ruza da ŋi gurwǝnǝ teme: konzen ra zakə uhuŋi peu a wake Babylon.' ⁴⁴ Ano aco ahado ŋa ze nan ka gura ka imu buku ǝnyimi uja, nane se Ədəshəri wa buki uca ogeme se mə bǝnu nan Moses, da ma mammare ome uga isana ogome se mə nəri. ⁴⁵ Ka gura ka giya kanze se ano aco ado wa zəki nan ŋe, enze ŋa rai nan no ənyimi nyaŋa ma me nan Joshua. Əji ano aco ado, te gogoro ta anon nyaŋa se Ədəshəri wə zuzi ǝsuru an nyaŋa ŋa yete uga tommo te teŋe tenze. Ka gura ka me kə cikǝ ənyimi nyaŋa ma me se uca u David, ⁴⁶ se ma mura urəzə əji Ədəshəri enze ma saŋare nee ma nin mura ara u cikǝ Ədəshəri a Jacob. ⁴⁷ Konzen Solomon ze wə piyə akura Ədǝshǝri. ⁴⁸ Ezen ni zi, Ogomo ədəshəri cikə ənyimi ugura ogome se ono nə piyə nan tare a teme, nane se utuma wa buki, ⁴⁹ 'ədəshəri zi ridirəŋ a ron, konzen anyaŋa anze bi ruza bi u kape atau a haŋ. Iya isana akura anze anin piyən mi? ubuku Aco, nee iyaze ara u cikǝ o vonke o hoŋ? ⁵⁰ Dan tare a ton tenze ta ruza tegogoro ti giya zale ne?' ⁵¹ Ŋi ano ageme se ŋa ze gbau-eshepe me nan udira u mammara iruwa nan te toŋe, kuyya uca ŋi nyamene Uvunu u Saŋsaŋ; ŋi deme nane uga Ano aco ǝhǝŋi. ⁵² Utuma u yu onze ano aco ǝhǝŋi wata nyame kpai ne? Ŋa wuza atuma ageme se ŋa bura o yoŋko bata ura ono Magaŋgaŋ; enze wagiya nŋi na cikǝ ano u nyaka aano u wuna ohome konzen, ⁵³ ŋŋi ano ageme se ŋi wa kai makiri ma geme se ti maleka ta ruza, bata ŋi dan mənti ni." ⁵⁴ Wagiya uca ogeme se ano u cikǝ u tidara wa kone tegogoro ti giya, aa gware ŋe adodonzo a haŋe, enze ŋa me u gursa tini ateŋe a Stephen. ⁵⁵ Enze mme, se maze nan ubinja nan Uvunu u Saŋsaŋ, ma iza əji uga ma ta ze ənyimi ədəshəri enze mǝ nǝri agata Ədəshəri; enze ma nəri Yeso u ware bilai bə Ədəshəri. ⁵⁶ Stephen go, "Nərə, Nə nərə ədəshəri nan u pəni, konzen Vana Ono a tore u ware bilai bə Ədəshəri." ⁵⁷ Aza igiya ano u cikǝ u tidara ŋa pate tetoŋe a teŋe, konzen a jarama, kweren o hoŋe ŋa wame aza hame. ⁵⁸ Ŋa zuzi mi ənyimi ape me aregeme ze ŋa me u gisə ohome nan azuwa, enze ano u nərə mi ŋa zuzi tommo a teŋe enze ŋa luta a laken atau ono maŋina se a gusan me Saul. ⁵⁹ Se ŋa ra gisə Stephen, ma ra tisiza Aco konzen a gusa, "Yeso Aco, ka uvunu o hoŋ." ⁶⁰ Mə gurwənə enze ma tisa nan remelo ri kpai, "Aco, tago u mənti macara ma giya aza haŋe ne." Uca ogeme se mə buki nane, enze ma ŋunan ro.