¹ Se woro wa dura i deke ŋe enze i ka gore o koŋgo, enze e me tano i ka deŋe ape a Cos, ǝtiye u tarse me i wa wame ape a Rhodes, konzen əsuru a regeme i wa wame ape a Patara. ² Se i wa mura o koŋgo u səru u pəri a wame a Phoenicia, i wame u gillu i ka gore okoŋgo. ³ Amaro u dura ulu Cyprus, a odeke me ulu u biguli, i dura okoŋgo a waŋa Syria enze ŋa ka tunu an nyaŋa ma Tyre, ara ageme se okoŋgo me wa ra dutu ti Cargo a teme. ⁴ Amaro se iwa mura atuma, iwa cikǝ ageme ti muru sunare. Ənyimi Uvunu ŋŋe əbiyǝ mi a Paule tago u wame a Jeruselem ne. ⁵ Se timuru a tedo ta wake a gemme, i wa deke a gemme i dura a tano a tedo, enze ŋŋe kweren, agura awai nan abiya, tarse əsuru ape me. Enze i gurwənə aza ikiki i manyi, enze e remmo, ⁶ enze e go ina ŋana ə ku əvi. Enze woro waŋ i ka pete okoŋgo u səru, ŋŋe konzen ŋa kuri ətitəu. ⁷ Se i mase tano a tedo əsuru a tyre, i wa deŋe a Ptolemais. Agemme ze iwa dare i goŋ ayeno koo enze i cikǝ nan ŋe ətiyə avento. ⁸ Ətiyə u tarse me i deke ara me i wame a Caesarea. Woro wa pete a kura a Philip, ono biyən nlen ma Yeso, ono vento ənyimi ano sunare, enze i cikǝ nan me. ⁹ Ono ugiya maze nan a galla a naze ageme se ŋa tə ru ano a rome ne se ŋa biyǝ tegogoro tə əji. ¹⁰ Se woro wa ŋuna timuru a rame, uyu tuma wa ra əsuru a judea se a gosemme Agabus. ¹¹ Ma ra a woro enze ma yete rimin (belt) ru təsu Paule. Nan reme renze mə təsi atau a hame nan tare enze ma go, "Uvunu u Saŋsaŋ na guna, 'Nane ze ti Jews tinə təsə ono rimin rimi ənyimi Jerusalem, enze ŋa nyaka o home ənyimi tare ta ano əpəŋ."' ¹² Se woro wa kuna tegogoro ti giya, woro zale nan ano ageme se ŋa ze nan u cikǝ ənyimi ara me ŋa vale Paule tago ma wame a Jeruselem ne. ¹³ Enze Paule gare, "Iyaze ŋi ra wuza me, a riwa nan u pusa o hoŋ mənyi? Baka mina goro, dan baka ara təsə o hoŋ base ne, se konzen dan wənə a Jeruselem baka riji ri Yeso Aco." ¹⁴ Dan ago Paule wa giŋərə da a nyame kpai ne, woro wa tuna nan u guna, "Deke imu barsa Aco a wuza." ¹⁵ Amaro ti muru ti geme, iwa zəki tommo a tedo enze i wame a Jeruselem. ¹⁶ Aya tuma əsuru a Caesarea ŋa wame nan woro konzen. Ŋa ra nan owe se a gosemme Mnason, ono u suru a Cyprus, atuma u bura, nan me ze woro rə cikǝ. ¹⁷ Se woro wa deŋe ənyimi Jeruselem, ayeno wa kai do nan birwa bi ruŋ. ¹⁸ Ətiyə u tarse me Paule waŋ nan woro a Jamese, konzen zale ano aŋono ŋa rənu. ¹⁹ Se ma gusan ŋe koo, enze ma me u biyǝ mi a ŋe tente- tente tegogoro tegeme se Ədəshəri wa woze ənyimi ano əpəŋ baka ituma e heme. ²⁰ Se ŋa kone nane, enze ŋa yiza Ədəshəri, enze ŋa gomme, "Ŋo na nərə, oyeno, ti gu ti nyano tenze tina waŋaro ənyimi ti Jews. Ŋe zale ŋana gara da ŋa mənti Makiri. ²¹ Ə biyə ŋi epe he, nane se ŋo bezezze zale ti Jews te geme se te ze nan u cikǝ ənyimi ano əpəŋ da ŋa deke Moses, konzen ŋo wa goŋ ŋe tago a tuzi abiya te shoro ne, konzen tago ŋa tarse ri wuza re kozo ne. ²² Iyaze woro nin ŋuna? Ŋa ra kuna me se ŋo na ra. ²³ Baka nane wuzan emegeme se woro ra buku ma ŋo. An ka naze rənu se ŋa kai otono. ²⁴ Yita ano a giya u kwiji rete a re nan ŋe, enze u nuzi eme geme se ŋa na wuna, baka da ŋa turuki ate a haŋe. Nane ze ku əvi nin ru se tegogoro te geme se əbuki aza hai empore manze. Ŋa nin ru konzen se ŋo tarse makiri ma me. ²⁵ Konzen baka ano əpən se ŋa gare, woro wa darse i nyaŋe a ŋa zuzi ate a haŋe ǝnyimi tegogoro te geme se a ŋiza risunu, əsuru ə mənyi, nan binama be geme se ana takara, nan akwaro rijama." ²⁶ Enze Paule yete ano me, ətiyə u tarse me, ma visiki rete a reme nan ŋe, ma pete ənyimi ugura Ədəshəri, ǝ yisu uca u tittiyə ti u visuku ti mi, a ka deŋe uca ogeme se u nyaka me aŋiza baka kuyyu ono ǝnyimi a haŋe. ²⁷ Uca ogomme se timuru sunare ta rai voto da ti maso, te ti Jews əsuru a Asia, Se ŋa nǝri Paule u gura Ədəshəri, enze ŋa brukəli zale riyǝgǝ ri mi, enze ŋa tare taare aza a hame. ²⁸ Ŋe ə sənə, "Ano Isreal, male do. Ono u giya manze ma bezezze ano kweren a ku aba tegogoro te geme se ano ta barsa, makiri ni, nan ara agiya. Ken nan nane, ma naa wuŋku ti Greeks ənyimi akura Ədəshəri konzen mana cara ara a saŋsaŋ agiya." ²⁹ Baka se ŋa wana ni Trophimus ono Ephesus nan me ənyimi ape, konzen ŋa ra gusa Paule wa rai nan ŋe ənyimi ugura Ədəshəri zi. ³⁰ Ape me zale iruwa wa runtu ŋi, enzen ano a toson kweren konzen da ŋa ka me Paul. Ŋa zuzi mi ənyimi ugura Ədəshəri əkəi, enze ŋa wa pate ti rəkəi ti mi. ³¹ Se ŋa ra nara owo o home, enze nlen ma me ma rai a tetoŋe ti ogomo ti suja u a ano rinyaŋana se zale Jerusalem waze hooo. ³² A regemme ma wa yete ti suja konzen riyǝgǝ ri rinu enze ŋa ka pete ənyimi riyǝgǝ ra ano. Se ŋa nǝri ogomo ti suja nan ti suja teme, enze ŋa deke u tǝrǝ Paule. ³³ Enze ogomo ti suja wame ma me Paule, enze ma go ə təsi mi nan magwaiwa ma repo. Konzen ma saŋare manze əvi nan iyaze mana ŋuna. ³⁴ Awe ənyimi riyǝgǝ ri mi ŋa rǝ sənə aza tegogoro buu. Nane se u kaptin mi tan date u buki iyabo ne baka unai kweren ara me, enze ma ŋuna a waŋ nan Paule u tidara. ³⁵ Se ma deŋe a tira ti u nyana, enze ti suja ti zəki mi baka ukara riyǝgǝ ra ano. ³⁶ Bakase riyǝgǝ ra ano ŋa ra tarse o hoŋe amaro ǝ sənə, "A dura nan me!" ³⁷ Se Paule a ra nara u zuzu ome ənyimi u tidara, ma goŋ ogomo ti kaptin, "Min buki iyabo a ŋo?" U kaptin go, "Ŋo bii i Greek? ³⁸ Dan ŋo ono Egypt zi ni, Dan ŋŋo ze wa gura ukara konzen dan ŋoŋ waze əji ano 'Assassins' ti gu ti naze se a zuzi ŋi a waŋ ənyimi uja ne?" ³⁹ Paule go, "Mmi u Jew zi, əsuru ape a Tarsus ənyimi Cilicia. Mmi onon nyaŋa ma geme se aru ma me ze. Na saŋare ŋi, dekonni an bukənu nan ano." ⁴⁰ Se u kaptin me wa nyame ara a mə bənu, Paule wa tore a tira ti ukape enze ma beze ano nan uware. Uca ogeme se ano wa wuna wete, enze ma bənu nan ŋe nan eboze i ti Hebrew. Ma go,