¹ Amaro ukara se u wa wake, Paule wa nyaka rituma ra atuma amaro se ma mase ubənu nan ŋe, ma goŋ ŋe mana ŋana enze ma deke ŋe da ma wame enyimi Macedonia. ² Uca ogeme se ma mase o pete a turara tegeme konzen mana biyə ŋi agaŋgaŋ cebete, ma ra Greece. ³ Amaro se mana ŋuna ti bərmə ti taro ageme, maraa nara u yira okoŋgo a waŋa Syria enze ti Jews ta ka tǝsǝ da ŋa me me, enze ma kuri ma tiya Macedonia. ⁴ Ano ageme se ŋa tarse me geten əsuru a Asia ŋanze Sopater vana u Pyrrhus əsuru a Berea; Aristarchus nan Secundus, zale ǝsuru a Thessalonian ŋanze ano u yiya birwa; Gaius ono Derbe; Timothy; nan Tychicus nan Trophimus əsuru a Asia. ⁵ Konzen ano a giya ŋana ruku u dura bata woro, konzen ŋa ra pawo ohodo a Troas. ⁶ Woro pete okoŋgo i dura əsuru a Philipi amaro ti muru ti borode u dira odeke, enze ənyimi timuru shibi woro ra a ŋe ənyimi Troas. A regeme ze i cikǝ tittiyə sunare. ⁷ Oŋmwe u dinka ənyimi sunare, se a gurna zale da pose a borode, Paule wə bənu nan ano u yiya birwa. Ma raa gusa ətiyə u tarse me mara ŋana, nane ze ma me ubənu a ka deŋe bi zate bə ǝtitiyǝ. ⁸ Ura wə wərənu cebete ənyimi ugura aza a regeme se awa gurna. ⁹ Ənyimi uwundu uyu ono maŋina wərənu se agusen me Eutychus, ma pete an roo ma sololo. Nane se Paule bənu sololo, ono maŋina ogomme ma geme an roo, nze ma ka suru uwundu ugura u taro aza ma gara anyaŋa a yiza e keze ze. ¹⁰ Enze Paule tu, ma witi rete areme aza ahame, enze ma shipi mi. Enze ma go, "Tago i kerkene ne, baka ma dan ruma." ¹¹ Enze ma nya aza ugura me konzen ma pore reborode ma wushi. Se ma mase ubənu nan ŋe ara zene a sane, bata ma dura. ¹² Ŋa kuri nan vana me nan ruma enze iruwa eheŋe rusu. ¹³ Woro nan ate ahado i wa gəti Paule əji okoŋgo u səru enze iwame a Assos, ara ageme se woro wara nara ita wame nan Paule anu. Igiya enze emme nan rete areme ma raa barsa ma ta wuza, bakase ma ra barsa ma taa wame a nyaŋa. ¹⁴ Se ma mura do a Assos, Iwa wame nan me ənyimi okoŋgo u səru enze i wame a Mitylene. ¹⁵ Nze i wame okoŋgo əsuru a regeme enze i ka deŋe ətiyə u tarse me garere nan nyaŋa ma zate manyi ma Chios. Ətiyə u tarse me i ka deŋe an nyaŋa ma zate manyi ma Samos, ətiye a vento wa wake i ra ape a Miletus. ¹⁶ Paule wa cuwale ma wake ma wame a Ephesus, baka tago ŋa dakano a Asia ne; bakase ma ra conno da ma wame a Jeruselem baka ətiyə Pentecost, ngase inin ŋuna mme ma wuza nane. ¹⁷ Əsuru a Miletus ma time ano a waŋa Ephesus enze ŋa tisa a me a rete ano aŋono a church. ¹⁸ Se ŋa ra ame, ma goŋ ŋe, "ŋŋi nan ate ǝhǝŋi ŋi ru, ətiyə ageme se in bura u yiya ubuna ənyimi Asia, nane se in rase in dakano nan ŋi. ¹⁹ In wa wuzuza ituma Ədəshəri nan zale u dutu rete nan məjəji, nan u shǝ kpai se a wuzan me baka ri nyarna ri ti Jews. ²⁰ Ŋi ru nane se in wa taa kuru nan amaro aza u biyǝ eme geme se inin male ŋi ni, konzen nane se in wa bezezze ŋi a zate ano konzen əsuru ətitəu a waŋa ətitəu, ²¹ əbiyə mi a zale ti Jews nan ti Greeks aza u kawə Ədəshəri nan u ziya birwa ənyimi Aco ohodo Yeso. ²² Wagiya nərə, Min ra wame a Jeruselem, Uvunu nə təsə, in tə ru eme geme se ira mura ohoŋ a geme ne, ²³ Uvunu nə shə u biyǝ mi imi a kuya ape nane se magwaiwa nan makpai ma raa pa ohoŋ. ²⁴ Bata in dan yita ruma aron iyabo ze imi ni, ngase nin date in mase te son teme konzen in gura ituma egeme se in wa kai əsuru a Yeso Aco, dan in biyə nlen ma ogwene Ədəshəri. ²⁵ Wa giya nərə, Na ru se ŋi zale, ənyimi ano ageme se in wa wame in yisu epe tegomo, ŋa damaa ni inmwinyu a man konzen ne. ²⁶ Baka nane na buki ŋi kane, enze saŋsaŋ in damen macara ma owe ne. ²⁷ Bakase in wata yi a riya aza u biyǝ zale emegeme se Ədəshəri ra barsa me ne. ²⁸ Baka nane ipəpəi nan ate ǝhǝŋi, nan zale a za itan egeme se Uvunu u Saŋsaŋ wa ŋuna ŋi ano u nərə mi. Ipəpəi nan ono u məntə church uwə Ədəshəri, ogome se ma nuzi nan mənyi a ma me. ²⁹ Na ru amaro u ŋana o hoŋ, iwashe uja ira ra ənyimi əhəŋi konzen ŋa da maa deke itan me ne. ³⁰ In ru se əsuru ənyimi əhəŋi awe ra ra ŋa kate magaŋgaŋ baka da ŋa wuŋki atuma ŋa tarse ŋe. ³¹ Nane ze a ŋi pəpəi ni. Dunza nane se a siwai si taro in wata tore nan ubənu nan kəvi ənyimi əhəŋi nan məjəji, ətittiyə nan oŋmwe. ³² Wagiya na deke ŋi a tare tə Ədəshəri nan nlen ma ogwene o home, se ma date ma piyə ŋi derte konzen da ma nyaŋi umura ənyimi Zale ano ageme se a kwiji ŋi. ³³ In dan ŋuna birwa a silver, gold né tommo te owe ne. ³⁴ Nŋi nan ate ǝhǝŋi ŋi ru se tare ti giya ti ŋizan emegeme se in ra barsa me nan emegeme se ano ageme se ŋa ze nan mi ŋa ra barsa me. ³⁵ Ənyimi te gogoro zale na nyaŋi imu tarse nane se ŋi nin mala ano u dira agata na ituma, nan nane se ŋi nin dunza nlen ma Yeso Aco, nlen ma geme se emme nan rete areme ma go: "Eze nan taye cebete da ŋo nyaka nan se da ŋo ka." ³⁶ Amaro se mana biyə nane, enze mǝ gurwǝnǝ ma ŋuna taye nan ŋe kweren. ³⁷ Izama wərənu cebete enze ŋŋe takalake nan Paule enze ŋa cinji ŋi. ³⁸ Ŋa ze nan u cərə puru kweren baka emegeme se ma buki, se ŋa dama kuru ni nmwinyu a mame konzen ne. Enze ŋa ka te me okoŋgo u səru.