1 I pol jujuhu ku juk ma moon ku sati' a yo ku mur shi'ilah, a yoi i wu gir ma rum ghishi ma shimai baa a girsa. 2 A sa kum bee taah ma a li'iri twala yooho kun puh shi'ila. 3 A bor ku bee bum shi'ila a doo kum bee loh yir Yeso wo puhu sa. 4 Gir mini maa, chim ya wo suhu i yir, a sun wu bapina baring nsaa-puru chele pwer iya, aa yiinsa gul-twan ba i mur ta'aha kyelek. 5 Nzi'irih bol bee wu mahm, a doh murya su'ula mashen nsaah; acheu wa wu bee mahm, ne, "I lan waa mur pee baa ii chimi ku chiri wu baa a wa'aha ma? 6 I doo ha ni sa, a lu'ansai! Wu re'eshe ne wu lo'oh wunu maa i shi ku Galili, 7 Ne, mun-bapina ninghai kper ne a ho wari pah, waa baa paa-girbiwa, a ho ge'eri,kujuk missa ma tarung ko bunuyere la'ahu." 8 Wu mahm ma re'eshe bee lo'oh Yeso ma; 9 A bunuyer i yoo mbana ba a wu lisai, a cheu gir mani waa muna yeele-yeelei lum kuni mo'on, i wu gamuring wu bapina. 10 Wu maryamu magdaliya, i Ju wanna, i Maryamu ngi Yakubu, i wu gamuring wu mahm baa a wu ho i ya a sa cheu wa magani gir mani bwang. 11 Bee lo'oh ning waa bee manzani bene lo'oh wu munamun, a doo pah ngichewe i wu bee mahm sa. 12 Bitrus ka la'ahu yiwa, mbang mashen bee mur-shiila, sa chele, sun mban ho ku bum shi'ila, ka sun twan baa a wu lisai iyi gbira. Bitrus ka bunuyere mashen li, i mom chii sai, i gir ba paana. 13 Sunu, wu baring i yo chiri ya mur shen mashen mba magina ai chu'uli ne Immawus, juhi bili, bee mbanai i guli (mel) tangnsa baring i gamuring mashen Urushalima. 14 A mur regee i yirya wu gir ba a mur pa'a. 15 A shi ho mur regeeh i yirya, a mur mohee yirya Yeso i ka'amuri chuh puru wo mbaya, a bu'uru shere bwang ya. 16 Mis-ya wu kussu baa a doo nghi she'eli sa. 17 Yeso cheu wa ne, "Man ba wu baring wun wa mur shene looh ku muri?" A chele kiring i chimya suha. 18 Mo'on ya, lu'uli kilyobas, yer yi ne, "We, loh ha chiri Urushalima baa a doo shiila gir ba pa'ana ku juk missai baa a bwala ma sa?" 19 Yeso ka cheu wa ne, "Wu gir man? " A yer yi ne, "Wu gir ku mur Yeso ma Nazarat, yi wu baa sun-dwa, i paa gir ma mom chii sai, i looh ma Baku mashen pau bapina bwang. 20 Wu njeh su i mu'ara baa nsa-nsah a boli wara paana ne, a ge'erih wolo. Su wo mur ma'a chimsu ne, yini ko ra,atsa buh Israilla, Inaa, i wu gir mani, lina juk missa ma tarung baa wu gir mini paana. 22 Ningha bwa, gamuring wu mahm ku chiri su, pa'ana gir fah kunu, a wo la'ahu shen mur shi'ila yi, i jujuhu bit. 23 Aa shene sa doo kum loh yiri ho sa, a bunuyere cheu ne, a s suna nzaah ma shimai mau maleka baring baa a cheu wa ne ii chimi. 24 Wu gamuring wu mbura baa a wu ho i su, ala'ahu shen bee mur-shi'ila, a sa kum mban bene ba wu mahm a wo chewe. A wu doo suni sa." 25 Yeso ka cheu wa ne, "Ka'a gbuchuk wu bapina, i sulor-chimu ku pah ngichewe ku mur gir bwang ba wu baa sun-dwa luana ku murya! 26 I wu ningha ne, yi bee Kristi li lulu wu gir mani, ne ka bor chiri rung-jung bo nghoi?" 27 I yoo mur Musa, yo njina mur wu baa sun-dwa, Yeso bunuyere i mur balwa gir ba wu punzeme Baku luana ku muri. 28 A wu tah pwer i mu-ram baa a shen mashen ho, Yeso ka paa bene i po'olo mashen dwa. 29 A mi'i, ne "Ning ha ni i su juhu ka tono, missa rege kwahma." Yeso ka war taa ya sa ning i ya. 30 I wu ning naa, ne, ka sa ning su'ula i ya ku nda li billa, ka toh fo'ofa, nere Baku, ka bongho pawa. 31 Nyaa mis-ya ka fah, a she'eli, ka borso wa ku misya. 32 A cheu wa yirya ne, "chimsu wo mur su'uru, baa wo mur lo'oh i su ku ngi-shere, i mur nsah su wu punzeme Baku?" 33 A la'ahu i missa bili, bunuyere mashen Urushalima. A sa kum wu lum kuni mo'on ma a kahmah murya mban mo'ona,i wu baa a wu ho i ya. 34 A mur cheu ne, "Baanjeh, lu'ama ma ngichewe, i pura i Siman." 35 A cheu wa wu gir ba pa'ana ku ngishere, i baa Yeso rumaya ku mbana ba i mur bongo fo'ofo pawa. 36 A wo shi ho mus lo'oh cheu gir mani; Yeso i ka'amuri puru chele ho ku chiri ya, ka cheu wa, ne, Girshima ning i wun." 37 Bee gir nzi'iriya, a bang nzi'iri, a sun bene a suna mbilar. 38 Yeso ka cheu wa ne, "I lan wa mur suhu chim wun? I lan ka mohe-mohe a mur la'ahu ku yoo chim wun? 39 Wu sun buham, i gbaam, mih i ka'amuram, mu dji ham sunu. Mbilar i doi ngham yiri sa, ke mo'oho bene baa wu mur sunam i yi." 40 Cheu wa bene bili, kaa rum ya i ba'ah buhi, i wu gbi'ih bwa. 41 A doo shi paangi-chewe sa, cheu bong-bum ya, a ningnghi fa'aha kaa kunya bwa. Yeso cheu wa ne, wui gima bah ma li?" 42 Aa pi chiha nshih. 43 Ka yaa bee chiha nshih ma she'eh ho dumya. 44 Ka cheu wa ne, "Missai baa wu ha i wun, wo cheu wun ne gir ba a gwaa'la ku muram bwang ku pir-ham ma Musa, i mau baa sun-dwa, i zabura a ho yoo puru bwo'olo." 45 Ka fah chim ya, ne a she'ele bee wu bunzeme Baku. 46 Ka cheu wa, ne benr baa a gwa'ala, ne Kristi ko li lulu, ka ho bunuyere la'ahu i yoo wuh ku missai ma tarung. 47 Nzinghi gir biwa i zus gir biwa na ma a renghe ku chiri lu'ulu Yeso wa tahramuan bwang, a puk i yo Urushalima. 48 Wu ningha baa pa-sheele ku mur wu gir mani. 49 Wu suns, mu mur chum wun bene baa Dah pana kuni. Wu ning ho ku chiri ram ta'ara, a ho shi pa wun nghar-ngha iyo kalang. 50 Yeso ka kwa ku dwa ya puru sa taa pwer i Baitanya. Ka toh buhi yiwa, ka pa-kuni ma shimai ku murya. 51 I wu ho ma'a buhi ku murya i pa kuni ma shimai bwa; ka la'ahu nzinghi ya a toli mashen kalang. 52 A ninghi so'o nsa pi, a bunuyere mashen Urushalima i bong bum ya. 53 A ninghi wa ho ku ka'ana nere Baku a mur so'o nsa, i pa kunya ma shimai yi Baku.