¹ Pe ndhi asih, gih kihme yarkaam villing wukwa ma, daga, ghi ndhi ghi phi na bis, pe bis ndhi ghi naa nshikshik megwo, bhi ghi phi naa nsihsak duk. Pe gwo ndhi ni phi naa wubis fee, ni phi shin bi wunyee mu duk. ² Ana mu man ndhi biss ndhi Naan phi naa fee bhi a khi yarkaam zeen in kat taa khidel nyen ndhi mu phi shin shiit khi zen. ³ Ana ghi naa mihsih, daga, ghi ndhi phi naa wubis khi nyen ndhi mu phi shin fee, duk khi ndhi ghi ma phi shin fee duk. Ghi makpe del phi na wubis (judgement) khi Naan ha? ⁴ Kot ghi shin leng lee det khi kaa khisher zuhum khi muk, khi yaa lee khi horo, khi mokhor khi muk eh? Ghi man ndhi zuhum khimuk a pee dee nghi tihwap di ma? ⁵ Ama khi kee akih baal bihzung khi nyen tihwap fhik ndhi ghi phi den a sherem khi tukhurnung Naan npee par bit ndhi khi nin tukhurnung fini, wato, par ndhi mu khi woo tok dyel nphi Naan mhi zenzen. ⁶ khi kwat gurum mu duk mhi kee khi bii ndhi mu shin. ⁷ Khi mhi nyen ndhi khi kee khi daar mhi shiit wuret bhi mu tang yon, saam sihm, khi shin wuret, bhi khi shin petong wuret ndhi khi lat lat ma. ⁸ Ama npe nyen ndhi mu phi dem kasut, ndhi mu phi dem bii zeen ma, ama mu bii binohot nzen, tukhurnung khi dyel mhi Nda Naan ni nwul. ⁹ Nda Naan khi wul khi shwajel khi mhilip yakkal shuwal khi del duk duk khi gurum mu ndhi mu shin shikbiss, she khi Yahudawa mu yakkal Grik mu. ¹⁰ Ama shin yon, saam sihm khi tong shakhap khi kat ko wane gurum ndhi shin wuret, she khi Yahudawa mu, yakkal Grik mu. ¹¹ Pee ndhi Naan ni khi dem kaa ma. ¹² Npee yon khi gurum mu ndhi mu shin shikbis baa akhi yarkaam warr ma, bhi mu khi dwam baa a khi yarkaam warr ma, yakkal bwer ndhi mu shin shikbis khi yarkaam warr, bhi mu khi tok dyel mu khi yarkaam warr fee. ¹³ Pee ndhi a nyen ndhi mu phi khiling warr fee bhi amu phi shin wurret ntihim Naan ma, a nyen ndhi mu phi bii yarkaam warr fee mu khi naa shinzen khi mu. ¹⁴ Pee ndhi jentiils (al'ummai) mu, ndhi mu khi warr fee ma, bhi mu shin bii khi yarkaam wu sihkir yad ndhi warr den di, bhi mu a warr shi ka suut, duk khi ndhi mu khi warr fee ma. ¹⁵ Pe ndhi asih bhi mu nin a dhi bii ndhi warr phi dem fee bhi a wurihran nbhizung mu, yakkal leng nohok khimu kat shin biss mu ma bhi daar mu npee kasuut ¹⁶ yakkal npee Naan duk. Mhisih khi taa par ndhi Naan khi tok dyel khi bii ndhi ko wane gurum sok nbhizung ni, yad ndhi bhilip Naan fhin sat, khi yarkaam mhi Jesu Kristi. ¹⁷ Ama in kat ghi yong kaasak ngu Yahudawa yakkal ghi den nohok ghi a khi kaa warr yakkal ghi shai asihm Naan, ¹⁸ yakkal ghi man bii ndhi ni phi dem, yakkal ghi nin dem npee bii wu mama sar ndhi warr nin asih; ¹⁹ yakkal nohok fhik dem ndhi ghi ma a ngu nin yarkaam nwuvuhum, a bii nape nyen ndhi mu nkwo, ²⁰ Ngu kamkam nyen wu yokhor mu, ngu kam kam njep wu dyen mu, yakkal ghi khi ni nbut warr fee nkaam man yakkal mhi zen, bhi a khi yar ndhi me ndhi bhim petong khi yil fhik eh? ²¹ Ghi ndhi ghi phi kam kam ngurum mu, bhi ghi phi kam kam nkaasak ma a? Ghi ndhi phi lap bhilip Naan Khi kaa nyen wat ma, ghi phi nwan wat ah? ²² Ghi ndhi phi sat sihma tap bhi ngwo nshini thillet ma, ghi phi shin fee ha? Ghi ndhi phi nyan naton mu, ghi phi mwan wat mu nlih Naan ba? ²³ Ghi ndhi ghi phi shin kwarang khi warr, ghi nyang shin yon Naan sar ndhi ghi nyang bii warr ha? ²⁴ Nsar ndhi "Sihm Naan awu tihkohok khinar jentiils npe ghi", khipe ndhi a wurihran. ²⁵ Pe ndhi ghi kat kyen khi gab dhip in kat ghi bii warr, ama in kat ghi del khi kaa warr, bhi gap dhip fhik ni npe yaa ma. ²⁶ In kat, asih fee, de gwo ndhi mu gap dhip ni ma bii yar ndhi warr sat, bhi rashin gap dhip khimuk khi bring a gap dhip ma'a? ²⁷ Bhi gwo ndhi man den khi gap dhip ma bhi khi shin biss nghi in kat bii ndhi warr den ma a? Pe ndhi ghi khi warr a wu rihran yakkal gap dhip, duk khi ndhi asih bhi a ngu del khi kaa warr! ²⁸ Pe ndhi ni a Yahudawa ndhi khiting khiting det ma; ko gap dhip khi muk a ndhi khibang nshishik muk det ma. ²⁹ Ama ni a ngu Yahudawa ndhi nnaar naar, yakkal gap dhip a mhi nohok, khi dem khi gurum, ama a nbut ran det ma. Saam sihm gwo wuni fee tong put a nder gurum mu ma, khi tong put a nder Naan.