¹ Nder Bulus (Paul), kwaram khi Naan, ndhi mu yonpe ni pedee ni tong a ngu shiit khi Naan yakkal mu den ni dik npe bhilip Naan ² ndhi get Naan khi lep khini gwe khisar nyen jakham mu nbut ran ndhi ni a bhilip Naan wuret, ³ ndhi bhibhilip akhi kaa laa muk ndhi ni a nkaan khi Dauda khipe put khimuk. ⁴ Khiyar riin wuret, bhi khi mu den ni a Laa Naan nsar ndhi ni wawul khidangkong muut, bhi ni a Jesu Kristi, Nda Naan fun. ⁵ Khisar muk bhi mu lap baam khi shiit Naan npe Lokhot nhi shinzeen fun ⁶ khinar yil mu dukduk, npee sihm muk. Khimar yil sihmu, bhi mu yong gun duk dee ngun gu dee a nhi Jesu Kristi di. ⁷ Shinjinder gu dukduk di Roma (Rome), nyen ndhi Naan dem mu yakkal yong mu a nyen wuret fini mu: Baam mhi Naan shinji nder gu yakkal mangye tongshakkap put nder Ndamu Naan, khi Jesu Kristi. ⁸ Wusheshe, bhi a plang Naan khisar Jesu Kristi npe gu dukduk, npe ndhi shinzeen fuk a wufufu dukduk khi yil sih. ⁹ Npee dhi Naan ni a langthing fhin, ndhi an phi shin shiit nni khi mohor nhi nbut bhilip Naan nhi Laa muk, khi yad ndhi khipe langma bhi an phi yong sihm ghi. ¹⁰ A wet phi dang nbut dan phi Naan fhin a ndhi ko wane yar, bhi a makpe, khi dem khi Naan, ji nder ghi. ¹¹ Nsar ndhi an phi dem naa ghi, de man a shin pak zuhum mhi Naan nghi, de nghi ghi kat baal di. ¹² Pe ndhi, an phi dem ye khat khi dem fuk bhi gu shin baal nan khimar gu, khiyar shinzeen mhi kowane gurum, muk yakkal maan. ¹³ Khidetsih, an phi dem ma de ngun gu tong nnot man ma, emnhikin nhi mu, a ndhi an phi wet phi dem yee a wul nder gu (ana mu shin yarkaam man na se khidetsih), npe dee nan a katpak bi putkaa khinaar gu duk, khipe ndhi khi a kat khinar gokhoshi Jentiils mu. ¹⁴ An a ngu kaat nder Helenawa (Greeks) khi phikom mu, yakkal mankhi nyen wusen khi nyen wuyokhor mu. ¹⁵ Pe ndi asih, bhi npee an, a den kaa gwe npe den bhilip Naan wuyon ndhi Roma (Rome). ¹⁶ Pe ndhi kaa nhi kul nsar bhilip Naan ma, nsar ndhi a baal khi Naan npe bhilip kaa mhi kowane gurum ndhi shinzen, npe Yahudawa mu wusheshe yakkal Grik mu. ¹⁷ Pe ndhi nbut fee bhia tong khi zeen khi Naan khi woo put nbut shinzen khi shinzen, khipe yad ndhi mu ran ni, "Nyen tongkhizeen mu khi bhirip a khi shinzeen." ¹⁸ Pe ndhi tukhurnung khi Naan khi woo a khiting Naan nder dukduk nyen nohot man Naan khi nyen tongmohor nzeen pee ndhi mu kat tongnohot nzeen a mhi bwak khi zeen. ¹⁹ Mhisih asar ndhi bii ndhi a wuman khi kaa Naan bhi awu mak naa fee mu. Nsar ndhi Naan lih man fee mu. ²⁰ Npe shin ret khi Naan ndhi awu nhinaa ma, khi baal ndhi ni a nhi Naan, khi bii ndhi ni Naan khi den, a wunaa kwet kwet; tun khipe yakkal khi yil, bhi khi mu man khinaar nbut bii ndhi Naan khi klom mu. Npe ndhi asih bhi mu khi tang me bii wukwa dik ma. ²¹ Mhisih asih nsar ndhi, mu khi man khi Naan gwe, bhi mu saansihm (daukaka) muk khipee Naan sih ma, ko mu shin plang ni. Katasih bhi, mu tong a wuyokkor but leng fut, yakkal bhizung wu baan a wukwoo. ²² Mu den a khipe ndhi du seen sih, ama mu tong pe tong wuyokkor. ²³ Mu villing saam wuret khi Naan ndhi khi wan wan ma npe dem khi gwo ndhi mu klom ni, ndhi khi wam wam, yakkal mhi Luu dem ndhi khi kwak feer, yakkal khi bii ndhi mu feer ashi but. ²⁴ Pe ndhi asih bih Naan shin pee mu kaat bi tik ndhi nin mang nnohok du npee rap khimu, de mu tihkohok khi sihsut khinar shak di. ²⁵ Amu a nyen villing zeen khi Naan npee dung, yakkal mu shin yon nbii wu khiklom met ngwo ndhi klom mun, ndhi sihm muk a wusaam khipe lang ma. ²⁶ Pe bii ndhi sih, Naan tukun mu shinkam khipe bishaa mhi tihkohok khi sihm, nsar ndhi shorop khimu mu villing dem ndhi wu dhiden npee demshak ndhi a wutihkohok khi gurum. ²⁷ Asih duk, daas fee mu yit yarkaam dunshak wu sihkir khi shorop mu npe de mu bii shak daas di. Mhisih fee mu a daas ndhi mu shin bi kakul khi shak daas yakkal mu kat kwat (horo) ndhi a mhi mu npe shikbiss ndhi mu shin. ²⁸ Sar ndhi mu lap eh khi ndhi mu khi den Naan nbut man fuut ma, bhi yit mu khi yarkaam nohok wubis fuut, de mu shin bii ndhi khi yarkaam wubis di. ²⁹ But mu gaam khi shinshik wubis, but deet, khi tik, khi yaa gurum nbhizung. But mu gam khi tihlik, tihgurum, nyangshak, dung khi nohok wubis. Mu a nyen bhilip nabya, ³⁰ Nyen tikkohok khi sihm, Nyang Naan, Fihlip pee, epkaa, sam khi kaa di ma, bong yarkaam npe bii wubis. ³¹ Mu ba'aa en, shinzen di ma, bhizung wubis khi najeel ma. ³² Mu khi man khi waar khi Naan, ndhi nyen ndhi mu phi shin bihsih mu, bhi mu phi dem a dwam. Bhi ban ndhi mu shin bihsih mu shikasut, bhi mu teer dangkong nyen ndhi mu shin duk.