¹ Ndhi si a sukkuhun/sughun mhi Nda Jesu ndhi Nda Naan shin ni dee ni nin nkwaram fini khikaa bi ndhi ni pee taa. A Naan shee lih bii mwo, nsar khi Jesu Kristi, mpee dee ni nin nyen fini mwo di, mpee de mwo man bii ndhi ntighim, khi bii ndhi khidet si. Asi bih Jesu Kristi lep kwaram fini shin mwan nder Jon npe dee ni sat bii sih mwo nni. ² Jon khi ten sat khi da-naa bii ndhi naa khi yit duk-duk, ni khi ten ran bilip Naan ndhi Zhesu Kristi sat Jon naa, bii fee a zeen. ³ Gwo ndhi tang ran mhi naa shi kaa si bih khi kat retnyit, nyen ndhi tep kom dee mwo khiling bii ndhi Naan sat, de mwo shin bii ndhi mwo sat zak, bih mwo kih kat retnyit, mpee ndhi puss fe wul kus dee bii mwo gam di. ⁴ Nder Jon shinyaa nder ekkilisiya ndhi mwo pokhovil ndhi mwo khiyil nAsiya: yit dee wuret khi tongshakhap nder gwo ndhi a ni di, gwo wudok, khi gwo ndhi ni npee wul bih yaghal nder Riin mwo pokhovil ndhi ntighim pee phitong khimuk yon, ⁵ yaghal nder Jesu Kristi zak, ndhi ni a langting mhi zeen, a ni a ndhi nshee ndhi mwo shee yaghal khini khipe muut, zak bih ni a miskaham khikaa daskaham nyil si. Nder gwo ndhi wal nmun. A npee thighim khimuk bih fwoon mun nbut shikbis fumu mwo - ⁶ a lih dee mu dee a nyen wunan khi prist mwo, npee dee mun dihk yil nNaan Ndamu - wuyon khi bal mwo dee a mhimuk shin mwan tai tai. Asiwai. ⁷ Gu naa ni npe wawul a nbut libhin. Gurum mwo khi naa ni yit khi yit, khi nyen ndhi gyet mwo pwas ni. Gurum ndhi mwo ndighin yil sih duk-duk mwo npee wal - wal muut khimuk. Bii fee khi dee asih! Asiwai. ⁸ Nda Naan ndhi khiting sat naa, "A jin a Alfa, a jin a Omega, gwo ndhi khi-detsi khi wu gyet, khi ndhi ni npee wawul zak. ⁹ An Jon, emnihin gu ngu mwan der Jesu, an a meme nbut gu ndhi gu mohor khi wula nbut Nda Jesu - an aa mepee ndhi sim pee fe a Patmos, mpee bhilip khi Nda Naan khi langting khikaa Jesu. ¹⁰ An a nbut khi Riin par puus mhi Nda. A khiling me dhikhil bal-bal khibi fee si ndang - kong nih! Dhikhil fe sat nna, ¹¹ Ghi ran bi ndhi ghi naa nbut dikarda dee ghi lep khini shin mwan nEkkilisiya mwo pokhovil khi yil Afisu, khi Simena, khi Pagamun, shin mwan Thyatira, shin mwan Sardi, shin mwan Filadalfiya khi Loodicea di zak. ¹² A viling khi yit dee nan a naa gwo ndhi ni phi lap bilip fee di. Nhi a viling bih a naa, fitila mwo pokhovil, ndhi mwo dak ki zinariya. ¹³ Nbut fitila sih mwo pokhovil bih a naa mee gurum khi dar di ndhi lapshak khi Laa gurum, gwo fe leep mee lee lep sam wul nkwak, bwaghat tukkur khi teng zinariya. ¹⁴ Kaa khimuk khi shopkaa mwo piyaa khipe fiwu sih, khipe ndahar sih. Yit khimuk lap - wus khibi liis wus sih zak. ¹⁵ Kwakshii khimuk mhilip khibi shaghal ndhi mhilip - mhilip ndhi mwo dak khi wus npee dee ni ret di sih zak. Dikhil khimuk a khipee am wur-wur phi tukul kong sih. ¹⁶ Ni khi zar mwo pokhovil nsar seh fini, khi shuk ngwam ndhi - akhas - akhas mwo pih pwat mpih muk. Yit khimuk bangpee nnar puus sih. ¹⁷ Ndhi anaa ni bih sam a taa nyil nkwak muk dee a khipe gwo ndhi muut a muut gwe. Yaghal den sarsih fini nkaa nih, yaghal sat naa, "Ghi nok lukhut si. A an a ndhi nshee, a an a ndhi nlat fee. ¹⁸ A ana gwo ndhi khi seen. Gyet a muut, khidet sih bhi an khi seen. An a gwo ndhi khi seen tai-tai. An khi bi philih mhi ep pee muut, npee mwan khi nyen wu duwan mwo nsar fini. ¹⁹ Ghi ran bii ndhi ghi naa gwe, khi bii ndhi ghi phi naa fee khidet si, khi bii ndhi kudi npee ji ntighim. ²⁰ Ani a pihshii zar wu sisok pokhovil nsar sih fihni, khi peadar fitila mwo pokhovil ndhi mwo dak shi zinariya. Zar pokhovil fee mwo a jeplep mhi Ekkilisiya mwo pokhovil zak, peedar fitila mwo - pokhovil a Ekkilisiya pokhovil zak.