¹ A shin zeen ndhi kat mee karshak di nsim mhi Jesu, kat mee khat kaa di nriin, kat mee naatakat khi naajeel di, ² Bhi shin ret nyit fhin gam ndhi kot khi bhizung khime, demshak wukhime ndhi muu niin yaghal mu khi leng wukhime. ³ Gu nok shin mebii leng ndhi ni a mhi dem kaa sih koo gwam gurum ma. Kat asih bhi gu sam khikaa gu ndee ngun gu naa gurum khipe ndhi mu met ngun sih di. ⁴ Nok yit nkoweh naa bi mhi kaa shin sih det, ret dee nni na me megurum mu duk sih. ⁵ Gu yit dee mhissih kot bhizung gu npe ndhi ni kot a sim khi Jesu Kristi, ⁶ duk ndhi ni khiyil khipe Naan sih bhi ni ba naa kashin khipe Naan sih mah, ah bii ndhi yee mu naa di, ⁷ Npee ndhi assih bhi mang kaa shin khipe kwaram sih, ndhi mu laa ni lap shak mhi gurum sih. ⁸ Ni sam khikaa ni ndhi har shin kaa shin nmuut, ndhi har a khikaa shep. ⁹ Npe ndhi assih bhi Naan shin yon. Ni shin sim ndhi met ngokotshi sim muu khiding sih. ¹⁰ Ni shin assih a npe dee nkowane bii ndhi ni phisim Jesu ni npee kurum khi fhirihem ni, ndhi khiting naan khi ndhi nyil, khi nbhider yil, ¹¹ Ni shin ndhissih ndee nkowane liis dee nni sat ndhi Jesu Kristi ani a Ndah, npee sim ndhi ni a mhi Ndah Naan. ¹² Npee ndhi assih, gun ndhi an phi dem, khipe ndhi gun phi wet shin wuret, ba a npee ndhi an nder gu mah, ret fee bhi a ndhi an di ma, gu shin shiit wuret npee sen ndhi ni phi tap gun ntikhim khi lukkut yaghal dhi dam dam. ¹³ Npe ndhi a Naan ni phi shiit nbuut gu npe wuret khimuk ndhi ni khi ni. ¹⁴ Gu shin mu khiding nnot gakarshik khi vohorgong, ¹⁵ de ngun gu kot a gurum muh di kot khi wubis mah nbhizung jep Naan nnar gurum mu ndhi muu khi lukkut mhi Nda Naan mah gyet di de mu naa riin ndhi piyah ndhi khi dhikhil yil sih. ¹⁶ Gu yaa bhilip naan sih khipe sen gu sih dee nni kot ndhi puus mhi Jesu an npee naa kaa san khipe ndhi a mwan a wuban mah mhi yaghal nasih sih fhin npee kot ah wuban mah. ¹⁷ Ko yee mumu kon an shinput khibang khipe bi zukhim khi dem fhin de a shin zeen ndhi di bhi retyit nhi khi gun khiding. ¹⁸ Gun maa, ret dee ngun gu shin retyit khi an npee bi ndhi gu naa. ¹⁹ Ndhissih a shin zeen Jesu Kristi npee dee ni lep Timmoti ndhi shin sam nder gu nteer sih mu, dee mbii fee mu lang-en nhi ndhi kat a man mebii khikaa gu di. ²⁰ Npe ndhi ba an khi megwo khipe ni sih ma, gwo ndhi leng khimuk a khikaa gu. ²¹ Npee ndhi mu phi tang a mut det yaghal mu yit mhi Jesu Kristi di. ²² Gu man gwo ndhi ni a Timmoti. Gun khi man ndhi shin shiit khi an npee sat bhilipnaan ngurum mu khipe ndhi kwaram khi shin shiit khi Ndah ni sih. ²³ An phi leng npee lep ni shinkam nder gu la-la kat a man bi ndhi npee kat an. ²⁴ A shin zeen ndhi Ndah Naan npee shin pong nnan dee nan a ji ndeer gu di la-la. ²⁵ Epaphroditus, emnhikhin nhi muu, nsim khi Ndah Jesu shin shiit khi an khipe soja mhi Kristi sih. Kat an phi dem baam bhi gu lep ni shinji ndeer nhi. Khidetssih, an npee lep ni shin waji ndeer gu, ²⁶ pe ndhi ni phi dem naa gun khiding. Bii fee daaamee nni npee ndhi khiling ndhi gun gu khiling gog finni. ²⁷ Npee ndhi a zeen dok ni a wu gog, ndhi wul kuus khi muut. Bhi Ndah Naan naa jeel khimuk, ba a ni det ma, bhi khi an duk, yak baa a kat damuwa khikaa damuwa. ²⁸ An phi dem lep ni shinkam ndeer gu dee ni ret yit gu di kat gu naa ni, bhi yaghal ni npee dang leng nbuut ni. ²⁹ Gu kaat ni a wuret nsim mhi Ndah. Gu shin yon ngurum muh khi ni sih, ³⁰ npee ndhi dok wul kus npee muut npe shiit khi Jesu Kristi. Shin sen fini npee shin baam nnan waphi ndhi gu shin nnan mah.