Ep fe 1

1 Mhi si a wushe khi bhilipNaan wuret nmhi Jesu Kristi, La Nda Naan. 2 Khipe ndhi a wu ri-ran nbut ran khi Ishaya ngu jaham si, "Gu naa, an nphe lep khi ngu lep fin khi yit gu, gwo ndhi nphe dak yar fik nghi. 3 Dhikhil gwo ndhi nih phi yong peh nbut dem, 'Ghi dak yar khi Nda; ghi dak yarkaam del khimuk ndari.'" 4 Jon/Yahaya wul, nih phi shin baptisma nbut naar dem yaghal nih phi kam baptisma nmhi tihwap nphe kon khi shikbis. 5 Yil Yahudiya duk-duk khi gurum ndhi mu khi yil Urishalima mu khiding mu pwat mu mwan nder muk. Shin baptisma nmu nbut Kong Urdun/Jordan, mu phi tihwap nphe shikbis fut. 6 Jon/Yahaya lep/rughun a leh shim/shoop rakumi khi teng ndhi bwaghat bwon muk mwan shikhir kaat, yaghal nih phi arr a nghok mu khi ndor-shii. 7 Yaghal khi dighil nin nna, "Meh gwo nih nwul khidangkong nih ndhi met n'an nbal, yaghal a kiye/mak ndhi a dughum nphe fon teng kohop khi muk ma. 8 A shin baptisma a khi am, dang bhi nih nphe shin baptisma ngun a khi Riin Wubang." 9 Bhi taa-den ndhi gyet Jesu tong wul khi yil Nazarat mhi yil Galili, yaghal Jon/Yohana shin baptisma nnih a nkong Urdun/Jordan. 10 Ndhi Jesu put nbut am, bhi naa khitingnaan a wu epp bhi yaghal Riin Wuret/Wubang nih phi sam khikha muk khipe bul si. 11 Meh dighil tong khitingnaan nna, "Ghi a lah nih ndhi an phi dem fe. An phi shin retyit khi ghi bwer." 12 Bhi Riin fe lhi nnih tiit nphe mwan yaa ndem. 13 Nih dih ndem fe nphe bhit yakgurum vhil, shetan nih phi kam/gwam nih. Nih a wu khime khi luu dem wubis mu, yaghal jep lep khi Nda Naan mu phi naa nih. 14 Khidangkong ndhi mu yaa Yohana/Jon, bhi Jesu mwan yaa khi yil Galili nih phi shin lep khi bhilip wuret khi Naan, 15 bhi nih phi si na, "Bhit fe gam, shin bhit wul khi khitingnaan nmhi Nda Naan wulkus. Gu tihwap yaghal gu shinzeen nbhilip wuret khi Naan." 16 Ndhi nih phi mwan phi Kong wuyon nmhi Galili, bhi naa Bitrus/Siman khi Andarawus emnighin Bitrus mu phi lang teng yak sherep nbut kong fe, nphe ndhi mu a niyen pwor/yak sherep. 17 Jesu sat nmu na, "Gu ji, gu mwan nder nih, bhi a den gun a niyen pwor/yak gurum mu." 18 Lala bhi mu yit teng yak sherep fe yaghal mu mwan nder muk. 19 Ndhi Jesu phi mwan kam si leh, bhi naa Yakubu lah Zabadi khi emnighin muk Yohana; mu nbut shii mu phi taan/dak teng yak sherep. 20 Bhi yongpeh nmu bhi yaghal mu yit nda du Zabadi dih nbut shii fe a wukhime khi niyen shiit ndhi mu kwat mu, yaghal mu mwan nder muk. 21 Bhi mu ji wul khi yil Kafarnahum, shin nbhit wu peme/bhit ndhi shiit waar, bhi Jesu rhi kam nlihNaan nih phi kam-kam. 22 Bih fe fii poo nmu nphe kam khi muk, nphe ndhi nih phi kam-kam nmu a khipe gwo ndhi nih khi bal shin a khipe niyen ran-ran mu si ma. 23 Dih nphe si bhi meh gurum ndhi nbut lihNaan khi mu ndhi nih khi riin wubis fwa orr, 24 si na, "A meh khat mun khi ghi eh, Jesu ngu Banazare? Ghi wul a nphe tihkok khi mun a? A man gwo ndhi a ghi. Ghi a gwo Wubang Mhi Naan!" 25 Jesu gwak/biyal mhikwarkum fe bhi nna, "Ghi nok shakhat/kot yaghal ghi put nshishik muk!" 26 Riin wubis fe kon nih/mang nih gap nyil bhi yaghal put nshishik mu khi orr bal-bal. 27 Duk-duk gurum fe mu app-poo, asi bhi mu tal phi shak, "A meh a si ye? Kam wu pwo khi bal khi Naan ah? Shin nih phi shen riin wubis mu khi bal bhi mu phi khiling nnih!" 28 Bhilip nkha shiit khi muk mwan ka'at peh khiding shin yaa nkwang yil Galili. 29 Khidangkong ndhi mu pwat nlihNaan, bhi mu mwan ya lih Siman khi Andarawus, a wu khime khi Jamis/Yakubu yaghal Jon/Yahaya. 30 Dih bhi nighin mat (sighir) Siman khi teer khi shuwal kut, yaghal mu sat gok khi muk fe nJesu. 31 Bhi yaghal mwan, yaa nih nsar, yaghal epp nih khitihng; bhi shuwal kut fe lat, yaghal doghom shin am khi sih nmu. 32 Dih nkanshighin fe, Khidangkong ndhi puus taa, bhi mu ji khi ngurum mu duk-duk nnih ndhi mu nkaham ma ma bhi mu khi mhikwarkum. 33 Duk-duk niyen khi yil fe mu ne'er phi-lih fe ka'at shishak. 34 Lat khi shuwal ngurum mu bwer ndhi mu khi nkaan shuwal mu dik-dik yaghal taghat mhikwarkum mu bwer, dang bhi yit nmhikwarkum fe mu lap bhilip ma nphe ndhi mu man nih. 35 Yaghal nbhit-bhit, ndhi peh kudi a wukwoo; put bhi mwan yaa nmeh peh ndhi meh gurum mu dih ma yaghal dih bhi dangphinaan. 36 Siman khi niyen ndhi ye mu nder muk mu bong/tang kop muk. 37 Mu kat nih yaghal mu sat nnih mu na, "Gurum mu duk-duk phi bong/tang ghi." 38 Sat nna, "Mu mwan mu yaa meh peh nkwa dik, pwon si khi yil ndhi mu kus-kus/neer khat si, nphe deh an kam/sat bhilip Naan dih duk. A bih ndhi lhi deh a put a ji si dih. 39 Mwan yaa khi yil Galili khiding, nih phi kam/sat bhilip Naan nbut lihNaan mu yaghal shen mhikwarkum mu. 40 Meh tihlohom ji nder muk. Nih phi dang phi muk; kurum nyil yaghal sat nnih, "Kat ghi dem, bhi ghi lhi an a bor a wu bang." 41 Ndhi Jesu naa jel khi muk, bhi shang sar nin yaghal bhim nih khi nih, nih phi sat nnih na, "An phi dem fe. Ghi kat bang." 42 Dih wai bhi lohom yit nih dih, bhi bor a bang. 43 Jesu dhil kom muk yaghal sat nnih waa bi nih. 44 Sat nnih na, "Tap nbhi ghi sat meh bih nmeh gwo ma, dang bhi ghi mwan, ghi nin kasak ngu shiit Naan, yaghal ghi shin zughum nphe bang fik khipe ndhi Musa gyet sat si, nphe deh a langting nmu." 45 Dang bhi put mwan yaghal doghom sat nduk-duk gurum mu shin tiit bhilip ndhi lhi nJesu mak bwot shin nih ma kat rhi nmeh yil. Nphe ndhi asi bhi mwan khipe nalagham yaghal gurum mu tong wul nder muk shipeh-shipeh.