Ep fe 2

1 Yaghal nbut teer ndhi mu ɗel, bhi Caesar Augustus shin waar deh nmu tang gurum mu duk-duk ndhi mu khi petong khi dikinyil fe. 2 Ndhi a wu she tang gurum mu nteer ndhi Quirinius ni a gwamna khi yil Syria. 3 Nphe dhi asi bhi gurum mu khiding mu wak ya khi yil fut deh nmu ran mu dhi. 4 Yusufu duk yaghal ya nGalilee khi yil Nazareth, nmhi Judea, khi yil wuyon mhi Davit ndhi mu khi yong a Baitalami nphe dhi nhi a la fungbong nmu tsen khi Davit. 5 Mwan ya dhi a nphe deh nhi ran sim nin khi Mary (Maryamu), ndhi a matkwam khi muk ndhi nhi khi gam. 6 Bhi bit fe wul dhi yaghal ndhi mu kudi, bhi bit laa khi muk wul. 7 La la-wumis, nhdi nhi a wushe khi muk, yaghal wup nhi khi byat wu kwun, bhi ɗen nhi nlih t'ihm mu, nphe dhi dikinlih wen nbut lih fe. 8 Nyen tap long mu ndhi mu dhi khi yil fe mu phi tap long fut mu nbut ɗem, nnaar lipar. 9 Lalep khi Nda Naan nin kaa shin nmu, yaghal raam khi Naan sam nkaa mu, bhi mu luguhwat nphe bih dhi taa. 10 Bhi la lep khi Nda Naan sat nmu na, "Gu nok luguhwat si, nphe dhi a wul a bhilip wuret khi Naan dhi nhi ji khi retyit ngurum mu duk-duk. 11 Shini mu la ngu bar mu khi yil Davit! Nhi a Kristi Nda Naan. 12 Bih dhi gu naa nphe man phishi fe nhi si: Gun nphe kat meh la ndhi mu wup nhi khi byat yaghal mu den nhi nlih t'ihm mu." 13 Ndhi nbhi si bhi jep lep khi Naan mu ji khishak khi gokshi kinshong khi khitingnaan mu phe saam Naan mu phi sina, 14 "Yon duk-duk a mak Nda Naan yaghal mangye tongshaghap khi yil nnaar gurum mu ndhi mu phe shin bih wu retyit muk." 15 Deh dhi bhi jep lep khi Naan mu yit mu dhi mu wakya khitingnan, bhi nyen tap fe mu sat nshak sina, "Mu mwan khidetsi mu yaa Baitalami deh nmun mu naa bih ndhi ntaa dhi, dhi Nda Naan sat nmun khi mann fe si." 16 Mu mwan ya dhi la-la bhi mu kat Mary (Maryamu) mu khi Yusufu , yaghal la fe khi teer nlih t'ihm fe. 17 Khi dangkong ndhi mu naa nhi bhi mu dye bhi ndhi mu sat ndun nkaa la fe. 18 Mu dhi khilling bhi dhi nyen tap fe mu sat bhi deh mu a nbih ap'po. 19 Dang bhi Mary (Maryamu) deltighim khi diye bih ndhi mu khiding ndhi dhi khilling, bhi ɗen mu nbizung deh khi retyit. 20 Nyen tap shin mu wakji, mu phi shin plang Naan nphe bih ndhi mu khilling yaghal mu naa khi yit du, khi peh ndhi mu sat nmu si. 21 Khi dangkong nlat teer wu pokokun, ndhi mu gap dip nla fe, bhi mu pus sim ni a Jesu, sim ndhi la lep khi Naan gyet shin deh she mu mang gam khi muk dhi. 22 Ndhi biit dhi mu den nphe dak mu nyar wu de-den del, khipe waar khi Musa si, Yusufu khi Mary (Maryamu) mu mwan khi nhi lihnaan nJerusalem nphe nin/shin nhi nNda Naan. 23 A khi phe ndhi a rhi-ran bnut waar khi Nda Naan, "Duk-duk daas mu ndhi mu a she-la mu khi den/yit mu mphe shiit Nda Naan." 24 Nphe dhi asi bhi mu mwan khi bih-zughum khi peh ndhi mu sat nbut waar mu Nda Naan si, "jep yer mu vol ma bhi bwul mu vol." 25 Gu naa, gyet meh gurum nhi nJerusalem dhi sim muk a Siman, gwo sih phi daar nyarkaam shiit khi den bhizung nNaan. Nhi phi tang yarkaam baam khi Israila bhi yaghal riiin khi Naan nhi nkaa muk. 26 Riin khi Naan nin nnhi gwe ndhe nhi nphe naa muut ma kat naa Kristi khi Nda ma. 27 Ndhi riin khi Naan sam nkha muk, Siman mwan yaa nlihnaan. Ndhi nda khi nighin Jesu mu ji khi nhi, nphe shin nhi khi yaar bih di-den, 28 bhi mang la fe nsar nin yaghal saam Naan yaghal sina, 29 "Khidetsi yit deh nkwaram fik waa nzughum, Nda Naan, khipe dhi bhilip fik sat si." 30 Nphe dhi yit nhi naa bar-tsen fik, 31 ndhi ghi dak ghi den khi yit gurm mu khiding: 32 Pebang dhi nin ka sat shin ya nnyen dhi mu man Naan ma, yaghal khi wuret shin ji nder gurum fik mu Israilawa mu." 33 Nda la fe khi nighin mu naa bih ap'po nphe bih ndhi mu sat nkaa muk. 34 Siman lhi wuret khi kaa mu yaghal sat nnighin muk Mary (Maryamu) na, "Yhi naa, la si mu shang nhi a nphe pal khi yaghal khi gurum mu bwer khi yil Israel khi nin ndhi mu nyang mu- 35 yaghal ngwan khi byang tsen yhi- nphe deh nleng bhizung gurum mu bwer nin khi-yit dhi." 36 Meh mat jagham dhi sim muk a Anna nhi dih. Nhi a larep Phanuel, nbut nkaan khi Asher. Nhi gya luk-luk. Gyet tong a wu khime khi mis dhi khi dangkong yii pokovol ndhi nhi a ɗwan, 37 yaghal nhi a matkaa nphe yii yakgurum fer khi fer. Nhi sham yit lihnaan fe ma, khi wet a phi yaa'po khi dangphinaan, nlipar khi pus. 38 Npuus wuni bhi ji kus khimu yaghal yaa shin plang nNaan shin lap bhilip nka la fe khi yit gurum mu duk-duk ndhi mu phi tap phi bar khi Jerusalem. 39 Ndhi mu bih mu khiding ndhi a wu di-den nphe shin khi yaar waar khi khi nNda Naan, bhi mu viling wakya nGalilee, khi yil khi mu ndhi Nazareth. 40 La fe yon bhi shin kot khi bal, nhi phi yon nmann, yaghal wuretkhinaan sam nkaa muk. 41 Nda muk khi nighin muk mu phi mwan Jerusalem shi-yii shi-yii nphe retyit mu taakaa. 42 Ndhi yii khi muk wul nsarpovol, bhi shin mu mwan khipe retyit fe ndhi tong khi biit fit. 43 Khi dangkong tsi-pe fe dhi mu tong njep teer fe mu lat duk-duk, mu yak yar wakya khipang. Dang bhi, la fe Jesu deh ndangkong khi yil Jerusalem nnot nman khi Nda muk khi nighin muk. 44 Mu naa khipe ndhi nnaar gurum mu dhi mu phi mwan khi dun si, bhi mu deltighim khi shimwan npuus khime. Bhi mu yaa tang nhi nnaar wumi du mu khi shaar mu. 45 Ndhi mu kat nhi ma, bhi mu bwak khi ndangkong wakya nJerusalem nphe yaa tang/bong nhi dhi. 46 Khi dangkong teer kun, mu kat ni nlihnaan, khi tong nnaar nyen kam mu, nhi phi khilling mu yaghal nhi phi shin tal nmu. 47 Khiding khi mu ndhi mu khilling nhi bhi fe bor bih-ap'po nmu nphe mann khi muk khi lap tal ndhi phi shin fe. 48 ndhi mu naa nhi, bhi bih fe fii'po nmu. Nighin muk sat nni na, "La nih, ghi shin ameh khi mun asi? Ghi nok kot, nda ghi khi an peye phi tang kop ghi." 49 Bhi sat nmu sina, "A me lhi deh gun phi tang kop nhi di eh?Gun khi man dhi a tiit deh an a kot lih Nda nhi dhi ma?" 50 Bhi mu man bih ndhi nhi phe sat fe ma. 51 Bhi yaghal waa nder ndah nin khi nighin nin mu wakya nNazareth yaghal shin yon nmu. Nighin muk den bih si mu khiding nbizung dhi. 52 Bhi Jesu deltighin khi yon nbut mann yaghal sho'op-shin, yaghal wuret khi Naan yon nkaa muk shin nder gurum mu.