1 Gurum mu bwer dhi mu daar nphe dak den khi yar khi kaa bhilip ɗhi gam khinaar mu, 2 khi phe dhi mu shin nmun, a weh yaghal nshe dhi kot shin langtim khi kwaram / latong mhi lep. 3 Nder nhi bhi ret - dhi a tang yar fe a wuret mu bih si mu yaghal gyet nshe - nphe ran nkaa phitaa nphe ghi, ngu saam Theophilus. 4 Mhi si asih a nphe ɗeh ngun gu man zen khi kaa pak bhi dhi mu kaam ngun. 5 Nteer mhi Herod, long Judiya, bhi gyet meh ngu shiitnaan shi dhi sim muk a Zakariya, dhi khi tong a Abijah. Mat muk a naar jirap Haruna, dhi sim muk a Elisabatu. 6 Khiding khi mu a nyen zen mu ntighim Naan, mu phi shin yon nwaar mhi Nda Naan. 7 Mu khi la ma nphe dhi Elisabatu nhi khi teng la ma bhi shin mu gya gwe nteer wuni fe. 8 Khidetsi, ji wul dhi Zakariya ji ntighim Naan, nhi phi shiit mhi Naan khi phe ndhi mu gap nhi. 9 Nbut yarkaam ndhi tong mu khi ir nyen shiit Naan mu, mu mang nhi a dhi mu kon pehl dhe mu den nhi l'ihnaan nphe shan wubis. 10 Dhu gurum mu ndhi phi dangphinaan khibang npuus dhi mu phi shan wubis mu. 11 khidetsi, nmeh la lep khi Nda Naan ji wul nder muk yaghal dar khi sar dasseh khi phe shan bhi wubis nkaa peh wuyon. 12 Dhi Zakariya naa ni, bhi lughut t'ih nhi bhi paal nkaa muk. 13 Bhi la-lep khi Nda Naan sat nhi "Ghi nok lughut si, Zakariya, nphe dhi Nda Naan khilling wal fhik. Mat ghi Elisabatu nhi nphe kat la. Ghi nphe yong sim muk a Jon. 14 Ghi nphe kot khi retyit khi bhizung piya, yaghal gurum mu bweer mu nphe shin retyit nbit la khi muk. 15 Nhi nphe kot a gurum dhi khi yon nyit Nda Naan. Khi sham shu mwos ma kot a me bhi wu baan, shin nhi nphe kot khi riin khi Nda Naan yaghal mbut nhikhin muk. 16 Jep Israilawa mu bweer mu nphe viling wakji nder Nda Naan dhi a ni a Naan khi mu. 17 Nhi npe mwan ntighim Nda Naan nbut riin khi bal nmu Elijah. Nhi nphe shin bhi si dhe nhi viling bhizung nda mu shin wakji nder jep, phe dhe ngu tahkat khi mwan-mwan nbut seen mu dhi mu khi yaar khi Naan dhi - nphe dak gurum mu phe Nda Naan dhi." 18 Zakariya sat nlaplep khi Naan sina, "An nphe shin a nang dhe a man dhi eh? Nphe dhi an nagya gwe yaghal mat nhi gya duk." 19 La-lep khi Naan sat nhi sina, "An a Gabrilu, ndhi phe daar ntighim Naan. A nhi lep an nphe sat bhilip nghi, nphe ji shin bhilip wuret si nghi. 20 Ghi khilling! Ghi nphe tong a kot, nphe mak lap bhilip ma, kat a dangkong bih si mu ma. ndhi si a nphe ndhi ghi nyang shinzeen dhikil nhi dhi nhi nphe gam kat puus fe wul." 21 Khidetsi bhi gurum fe mu phi Zakariya. Bhi fe ap'po nmu ndhi mang peh bweer ndighin lihnaan fe. 22 Dhi puut, bhi kudi khi lap bhilip khi mu ma. Mu naa ndhi mun nin me bhi nni tsughun. Deltighin khi nin nmu khi saar yaghal nok khitik. 23 Khi dangkong bhit shiit khi muk, bhi yagahl waya lih nin. 24 Khidangkong jep teer mu, bhi mat muk Elisabatu mang gam yaghal ntaar mu paat bhi nhi phe lagham yak ba mu khi naa dhi. Sat nna, 25 "Ndhi si a bhi ndhi Nda Naan shin npeh nhi khi dangkong ndhi naa an khi naa-jeel dhe nni mang kakul fhen shin ba dhi nyit gurum mu." 26 Nbut taar wu pemeh, bhi Nda Naan lep Gabrilu shin ya nyil Galilee khi peh ndhi mu phi yong a Nazareth, 27 shin ya der me mat ndhi a ɗwan shin a matkwam khi me gwo dhi sim muk a Yusufu. Nhi put a fungbong lih khi Davit, yaghal sim mat fe a Mary (Maryamu). 28 Jhi nder mu yaghal sat na, "A tal yhi, yhi ndhi yhi kat wuret yon yon! Nda Naan ni a wu khime khi yhi." 29 Dang bhi bih fe rhook mat fe khi bhi ndhi sat nphe ndhi man phishi tal fe ma. 30 Lalep khi Naan sat nnhi na, "Yhi nook lughut si, Mary (Maryamu), nphe dhi yhi kat wuret nder Naan. 31 Yi naa, yhi nphe mang gam yaghal yhi la-la wu mis. Yhi nphe yong sim muk a 'Jesu.' 32 Nhi nphe kot a baga gurum yaghal mu khi yong ni a La Naan dhi khiting. Nda Naan nhi nphe shin peh wuyon nni nkop bhikaam muk Davit. 33 Nhi nphe ya yil nkaa dikinlih Jacob, tai-tai yaghal yil khi muk nphe lat ma." 34 Mary (Maryamu) sat la-lep khi Naan fe na, "Shin a nang dhe ni nphe taa dhi, nphe ndi a sham man meh mis / teer khi meh mis ma?" 35 Lalep khi Naan lap nni na, "Riin khi Naan nhi nphe sam nkaa yhi, yaghal bal mu Gwo Wuyon dwaas khi sam nka yhi. Nphe dhi asi ni wu bang dhi mu mphe la nhi mu khi yong nhi a La Naan. 36 Yhi naa nkan fi Elisabatu nhi duk mang gam nbut giya khi fhit. Mhi si a taar wu pemeh khimuk, nhi dhi dok dar zang. 37 Nphe dhi me bhi ma kha Naan ma." 38 Mary sat na, "Ghu naa, an a kwaram khi Nda Naan wu mat. Yit dhi dhe nni kot an a khi peh lep fik si dhi." Bhi yaghal la-lep khi Naan fe yit nhi. 39 Bhi Mary (Maryamu) yaghal par meh biit bhi del ka khi digihir khi yil Judiya. 40 Yaghal mwan lih Zakariya yaghal tal Elisabatu. 41 Ndhi Elisabatu khilling tal khi Mary (Maryamu), bhi la dhi nhi nbut Elisabatu dung, yaghal riin khi Naan gam nhi. 42 Ep dighil dhi bal-bal yaghal sat na, "Wuretkhinaan nkaa yhi nnaar shorop mu, yaghal jirem la ndhi nbut yhi. 43 A meh taa nkaa nhi ndhi a nikhin Nda wuyon ji nder nhi dhi eh? 44 Guna, dhi dighil tal fi taa nkom nhi, bhi la ndhi mbut nhi dung khi retyit. 45 Wuretkhinaan nhi nkaa yhi dhi yhi shinzeen dhi nbhilipnaan phe gam nphe yhi khi phe dhi Nda Naan sat." 46 Mary (Maryamu) sat na, "Tsen nhi saam Nda Naan, 47 yaghal riin nih plang Naan dhi a ngu bar an. 48 Nphe dhi najeel nkaa petong wu kat khi mat kwerem. Gu na, yaghal shini bhi nkaan mu duk-duk nphe yong an wuretkhinaan. 49 Nphe dhi gwo wuyon shin baga bih ret n'ann, yaghal sim muk a wu bang. 50 Najel khi muk yaghal nkaan warih nkaan nphe nyen dhi mu lughut ni. 51 Nhi nin bal khi sar nin; yaghal shen nyen dhi mu shin yon nkaa sut nbhizung du. 52 Nhi shar jep long mu khi kaa petong khi mu yaghal ep mu dhi mu wen nnot phishi. 53 Ni gam nyen nen mu khi bih wuret, dang bhi shen nyen shaghal mu nfi. 54 Shin baam Israilawa mu ndhi mu a kwerem khi muk, nphe khikdermu khi najeel 55 (khi peh ndhi sat ndamu mu nkaa Abraham khi nkaan khi muk tai-tai." 56 Mary/Maryamu tong nder Elisabatu kuus ntaar kun si bhi yaghal waya khipang fhit. 57 Yaghal bhit fe wul ndhi Elisabatu nphe la bhi la-la wu mis. 58 Tinglih khi muk khi nkaan khi muk mu khilling nin najeel nkaa muk, yaghal mu baam nhi khi retyit. 59 Taa ndhi par puus wu poɠokun bhi mu wul gap dhip la fe. Ye kot mu khi yong nhi a "Zechariah", khi der sim nda muk. 60 Bhi nighin muk lap na, "Haiyo. Mu khi yong nhi a Jon." 61 Mu sat nhi muna, "Meh gwo khi sim wuni fe bhut nkaan fuk ma." 62 Mu sat bhilip nda muk dhe nhi sat kot mu pus sim nla a me oh. 63 Nda muk tal bhi ran yaghal ran, "Sim muk a Jon." Duk-duk khi mu muh naa bhi fhi-po. 64 Dhi bhisi bhi phimuk ep yaghal liis muk dung. Lap bhilip yaghal shin plang nNaan. 65 Lughut taa nkaa duk-duk nyen dhi mu phi tong kus khi mu. Bhilip fe khaatpe khiding dhi khi yil Judea dhi khi dighir fe. 66 . Duk-duk nyen ndhi mu khilling bhi ndhi taa mu ɗen bhilip fe nnook du, mu sat sina, "La si nhi nphe kot a meh eh?" Nphe dhi saar Naan nhi nkaa muk. 67 Nda muk Zakariya ndhi gam khi riin khi Naan wu bang bhi sat jagham sina, 68 "Plang deh nder Nda, Nan khi Israilawa mu, nphe dhi wul nphe baam bhi yaghal kat yarkaam bar gurum finih mu di. 69 A nhi yaghal bih wuret nphe bar mun ndighin lih khi kwaram fin Davit, 70 khi peh ndhi mu bhilip npoh nyen jagaham wu bang mu wu gyet-get. 71 Nhi nphe waji khi bar tsen mu nsar shaarfom mu khi nyen ndhi mu nyang mun. 72 Nhi nphe shin dhi si a nphe najeel nda mu muh yaghal nphe khikdershik nin khi wuret ndhi ran den, 73 tuwarshin dhi gyet shin nda mu Ibrahim. 74 Tuwarshini nphe shin bih ndhi khi pwat khi mun nsar shaarfom fun mu, yaghal mu shin shiit nni nnot nlughut, 75 nbhut bang khi piya bhizung bhut duk-duk teer ndhi mun khi nhi. 76 Asih, khi ghi, la, mu nphe yong ghi a ngu jagham mu Gwo Wuyon, nphe dhi ghi nphe taa ntighim Nda Naan nphe dak yarkaam wuret, nphe ɗak gurum mu nphe wawul khi muk, 77 nphe shin mann mu bar tsen gurum finih mu nyarkaam kon khi tahkat khi mu. 78 Ndhi si nphe taa nphe najeel dhi Naan khi ni nphe mu, nphe dhi baam fe nhi nphe tong a khi tingnaan sam nphe baam mun, 79 nphe saan ka nyen ndhi mu tong nkwo khi muut. Nhi nphe shin di si a nphe tap kwak mu shin yaa khi yarkaam dhi nhi a mu tongshaghap." 80 Khidetsi, la fe yon yaghal deh a gurum dhi nhi khi baal nriin, yaghal deh nnaar ɗem dang she put puus dhi put khinar Israilawa mu.