¹ Khidangkong mhisi bhi mu shin retyit khi Yahudawa mu, ba Jesu mwan ka nUrushalima. ² Bhi di Urushalima fee, di phi phili ndhi a mhi thim mu, bhi am gap dar dhi, ndhi sihamm muk mbhilip Yahudawa mwo bhi a Betasda (Bethesda), yaghal ni khi jep li mu paat ndhi mu shep mu. ³ Khi sher gurum mu ndhi mu nKakham ma, wuvuhum, khihil ko nyen wukut mu mu khi tyorop di. ⁴ (1) Dhihil wusihir ndhi ret fee yit v.4 di, 'sar ndhi la tong der Naan shin bhi tung am nme lokaci dee kat kawe ndhi ruhun kwak di dei-dei ndhi am fee phi yakkal bhi kat kakham nbut kowane shuwal ndhi ni khini. ⁵ Akwai me gurum di ndhi ni kakham ma npe yi yakgurum khime khi sarpopokokun. ⁶ Ndhi Jesu naa ni khi peter, kuma ndhi man ndhi ni khi teer di har mang bit, bhi sat ni, "Ghi phi dem ghi kat bal a?" ⁷ Gwo ngok lap na, "Nda, an khime gwo ndhi khi den an shin sam an fee nkat am fee yakkal ma. Kat aji, bhi me gurum rhi di de kaa nhi." ⁸ Jesu sat ni, "Ghi yakkal, ghi mang bi peter fhik, yakkal ghi mwan mwan." ⁹ Lala bhi gwo fee kat kakham, yakkal mang bi peter fini bhi mwan mwan. Bit fee bhi shi wu pokovel (bit ndhi shiit warr). ¹⁰ Bhi yakkal Yahudawa mu sat ngwo ndhi bhirip muna, "shini a bit wu pokovel (bit ndhi shiit warr) ndhi shin yarkaham nghi ghi mang karam fhik ma." ¹¹ Bhi sat mu sana, "Gwo ndhi shin kakham nan sat nan sih na, "Ghi mang karram fhik ghi mwan mwan. ¹² Mu tal phimuk, "Awe sih ndhi sat nghi na 'Ghi mang ni ghi mwan mwan. ¹³ Ama gwo ndhi kat kakham fee man kat awelat khi shuwal fini o ma, sar ndhi Jesu khi ye wa bini nnaabya, sar ndhi khi sher gurum mu di khipe fe. ¹⁴ Khidangkong bhi Jesu kat ni ndhi Naan bhi sat ni, "Ghi naa, ghi kat khaham gwe! Tap bhi ghi shin shikbis wukwa ma, pe de mebi wu bisbis khat ghi ma. ¹⁵ Gwo fee yakkal wa bini bhi mwan sat nYahudawa mu a ndhi a Jesu shin kakham njin. ¹⁶ Sar bi ndhi sih mu, Yahudawa mu shin jel nJesu sar ndhi shin bhisih mu a par bit wu pokovel (bit ndhi shiit war). ¹⁷ Jesu yakkal shin amsa mu na, "Nda fhin ni phi shiit ko khi detsih, yakkal an duk, an phi shiit." ¹⁸ Sar ndhi sih, bhi shin ball nYahudawa mu npe tang thi ni sar ndhi ban khi war nhi bit wu pokovel ndhi tep bhi yong Naan a nda ni, bor na mang ka shin abi wukhime khi Naan. ¹⁹ Jesu lap mu na, "Npeezen, pe zen, laa gurum khi shin mebi mhi kashin ma, sai dai abi ndhi na Nda ni phi shin, sar ndhi bi ndhi nDa phi shin, bhi laa shin duk. ²⁰ Sar ndhi Nda ni phi dem laa yakkal nin bi mu duk duk ndhi ni phi shin fee nni, kuma khi nin bii ndhi mu met asih de ni shin bi fiipoo ngun di. ²¹ Pe ndhi Nda yakkal khi nyen ndhi mu dwam yakkal shin nohok mu, pe ndhi asih laa khi shin nohok ngwo ndhi ni phi dem. ²² Pe ndhi Nda tok dyel khi megwo ma, ama ni khi shin tok dyel laa ni. ²³ Pede kowane gurum khi shin yon nlaa yad ndhi mu phi shin yon Nda. Gwo ndhi shin yon nLaa fee ma, bhi shin yon Nda ndhi lep ni ma. ²⁴ Pe zen, pe zen, gwo ndhi khiling bhilip fhin yakkal shin zen mu ndhi lep an bhi kat petong wurret mhi tai tai yakkal mu khi thikok khi ghi ma, ama khi del phi muut shin waya nmohok wuret. ²⁵ nPeezen, zeen, a sat ngun, bit fee npe wul, kuma a khi detsih, ndhi nyen wu dwam mu khi khiting dhihil Laa Naan, yakkal nyen ndhi mu khiling mu mkhi dwam ma. ²⁶ Pe ndhi Nda ni khi seen nshishin, bhi khi shin nlaa pe de ni khi nohok nshishin duk, ²⁷ yakkal Nda khi shin izini nLaa npee tok dyel sar ndhi ni a Laa Gurum (Naan). ²⁸ Tap bhi gu nfiipoo pee bhisih, npee bit ni wul ndhi kowane gurum ndhi ni ntuhun khiling dhihil muk. ²⁹ Bhi mu khi pwat: nyen ndhi mu shin ret nyakkal khi gurum, yakkal nyen ndhi mu shin wubis ga yakkal khi tok dyel. ³⁰ A makpe shin mebi mhi kasan ma. Khipe ndhi a khiling, a tok dyel, kuma tok dyel fhin a wuret pee ndhi an phi tang a bii dem fhin ma, ama abii dem khi gwo ndhi lep an. ³¹ In kat a shin langting mhi kaasan, bhi langting fhin kot khi zen ma. ³² Akwai gwo nkwa ndhi shin langting nkaa nhi yakkal a man ndhi langting ndhi shin nkaa nhi a zen. ³³ Khi ghi lep Yohana, yakkal shin langting ndhi a zen. ³⁴ Ama langting ndhi a lap put a derr gurum ma. An phi sat bhisih npe de ngun gu kakham di. ³⁵ Yohana get ni a pitila ndhi phi tap yakal naa pe, yakkal get gun phi dem retyit pe nape khi muk npe la bit lee. ³⁶ Duk khi bii ndhisih, langting ndhi an khi ni met mhi Yohana, sar ndhi shiit ndhi Nda shin nan pe shin, shiit ndhi a shin, shin langting npe nhi a ndhi Nda Naan lep an. ³⁷ Nda ndhi lep an, ni shikashin shin langting nkaa nhi. Gu sham khiling dhihil muk ma ko gu sham na yad ndhi shishik muk di ma. ³⁸ Gun khi gokoshi bhilip khimuk nshishik gu ma, sar ndhi gun phi shin zen ngwo ndhi lep ni ma. ³⁹ Gu bong pe nbhilip Naan sar ndhi gun phi naa a ndhi gun khi nohok wuret ndhi tai tai, yakkal a bhilip Naan mhisi shin langting nkaa nhi, ⁴⁰ bhi yakkal gun phi dem ji nder nhi de ngun gu kat nohok tai tai di. ⁴¹ An phi lap saam nder gurum mu ma, ⁴² Ama aman ndhi gun khi den npee Naan shisuk ma. ⁴³ A wull a sihm Nda nhi, yakkal gu lap an ma. Khat megwo nkwa wul khi sihm ni, bhi gu lap ni. ⁴⁴ shinnang gu shin zen, gun ndhi gun phi lap saam nder shak ama gun phi bong saam ndhi put nder Naan ndhi ni khime ma e? ⁴⁵ Tap bhi gu leng ndhi an shikasan npee shin karaa gu ntihim Nda Naan. Gwo ndhi shin kara gu a Musa, sar ndhi gu den nohok gu a der muk. ⁴⁶ Kat gu shin zen Musa, gun pe shin zen an, sar ndhi ran ran nkaa nhi. ⁴⁷ In kaat gu shin zen nran khimuk ma, bhi shinnang gun pe shinzen nbhilip fhin di ye?