¹ Ndhi Nda Jesu man wai Farisiyawa mwo kiling ndhi jin pih kat nyen shin zeen bwer, ni pih shin baptisma nmwo met nYahaya. ² (A Jesu shii kaa shini pih shin baptisma fee ma, a jep lep/jep kam khimuk mwo) ³ bih yaghal yit yil Yahudiya wuyon kih yil Galili. ⁴ Dee a ting det dee ni lem/petyar nSamariya. ⁵ Bih ji wul nmee laayil di nSamariya fee, sim laa yil wuni fee a Saikar, kus-kus phi yil ndhi Yakubu shin laani Yusufu. ⁶ Rijiya mih Yakubu a di. Jesu mwan - mwan doghol dee muutlet tihni bih yaghal tong kus kih Rijiya fee. ⁷ Mee mat Samariya ji npee yak amm, bih Jesu sat naa, "Yi shin pak amm nan a shuu." ⁸ Mpee ndhi jep kam khimuk mwo dhel yaa ngari pe seet bisih. ⁹ Bih yaghal mat Samariya fee sat Jesu naa, "A mee kaat mun dee ghi ngu Yahudi, phi tal amm shuu nder mat Samariya ye? Mpee ndhi ba meebi sham kaat Yahudawa mwo kih samariyawa mwo ma. ¹⁰ Jesu lap sat nnih naa, "Kat ye yi man bizuhum mih Nda Naan, dee yi man zak, gwo ndhi nih phi sat nyi naa, "Yi shin amm nan a shuu, bih ye yi tal nder gwo fee, bih khi shin amm wu tai-tai nyi." ¹¹ Mat fee sat nnih, "Ngunan, ghi khi bi yak amm dangbig rijiya fee jurum. Ghi pee kat amm seen fee a nee ye? ¹² Ghi met nda mu Yakubu ndhi anih yit rijiya fee nmun, mih shikaa shinih, khi jepkhimuk mwo, khi longkhimuk mwo ndhi mwo shuu amm fee a? ¹³ Jesu lap sat nmat fee naa, "Duk nyen ndhi mwo shuu amm sih, shin mwo khi khiling khi amm tih, ¹⁴ Ko a wee, ndhi shuu amm ndhi an npee shin fee, bih khi khiling khi amm tih ma. Amm ndhi an npee shin ngurum niya khibi amm pihbuut ndhi tong kih put bul-bul ndhi khi mwan khipee seen wu tai-tai. ¹⁵ Mat fee sat nnih naa, "Ngurum, ghi shin amm disih nnan yakba amm kih tih an dee nan nok weet nji npee yak amm nbisih." ¹⁶ Jesu yaghal sat nmat sih naa, "Yi mwan yi yong mis yi, bih gu wakji sih." ¹⁷ Na mat sih yaghal nnih, "An khi mis ma; Jesu lap sat zak, "Yi sat anih fee wai, ndhi yi sat yi lih, "An khi mis ma. ¹⁸ Mpee ndhi dok yi kih dass mwo paat, gwo ndhi yi kih nih kihdet sih a mis yi ma. Yi sat a zeen fee." ¹⁹ Bih mat fee sat nnih zak naa, "Ngu pihtihim, A man gwe ndhi ghi a Anabi. ²⁰ Nda mu mwo pih dikyil nNaan akihdel pang dangbih wughimak ghi sat ghi lih Urushalima npee ndhi mwo kih dikyil nNaan di. ²¹ Jesu sat nnih, "Na mat, yi shin zeen nan, ndhi kih dee di lee bih ba gun npee dikyil Naan kihkaa pang sih ko Urushalima. ²² Gun pih dikyil a nbi ndhi gu man ma. Mun phi dihkyil a gwo ndhi mu man, npee ndhi yarkam bam put a nder Yahudawa mwo. ²³ Dang bit fee npee wul, bih wul gwe ndhi nyen dikyil nNaan wuzeen zeen mwo dihkyil Nda Naan nbut Riin khi shinzeen, npee ndhi Nda Naan bih bong a nyen wuni fee mwo npee dihkyil njin. ²⁴ Naan a Riin, gurum ndhi mwo pih dihkyil nnih a ting det dee nmwo dihkyil nbut kih Riin kih zeen. ²⁵ Mat fee yaghal sat naa, "A man ndhi Masihi nih kihyar wul (Gwo ndhi sihm muk a Kristi). Kat ji wul, bih sat pihshii bi mwo duk-duk nmun." ²⁶ Jesu yaghal sat nnih naa, "A an a gwo fee ndhi ni phi lap bhilip khi yi." ²⁷ Langdi lee bih jep kam khimuk mwo wak-wul. Mwo pih tankoh kihdhel bi ndhi lih dee Jesu pih lap bhilip khi mat, ba megwo sat naa, "yi phi dem a mee?" Ko, a mee lih dee ghi pih lap bhilip khi mat sih ye?" ²⁸ Mat fee yaghal yit wang am fhit, wayaa ngan; bih sat ngurum mwo; ²⁹ "Gu ji, gu naa mee gurum/gwo ndhi bi mwo ndhi a sham fee duk-duk. Ndhi sih a Kristi ma, kot a nih woo?" ³⁰ Mwo yit yil fee mwo ji nder muk. ³¹ Lee bih jep kam khimuk muu phi dang shiphimuk naa, Malim,ghi sih mebi. ³² Bih sat mwo, "An kih sih npee sih ndhi gun gu man ma. ³³ Jeplep fee mwo bis bhilip nshak, "Ba mee nyen mwo ndhi mwo ji kih sih nnih pee sih, mwo ji kih niya?" ³⁴ Jesu sat nmwo naa, "Sih fin a pee shin a dem kih gwo ndhi lep an yaghal a lat shiit kihmuk. ³⁵ Gu nok sat sinna: Dee tar mwo feer dee nlukhun bang dih ma? An phi sat ngun, gu epp kaa, gu naa mar mwo di, mwo nuwang dee diip det. ³⁶ Ngu diip khi pishii bini, nih pih thil sih shin waji npee kat seen ndhi tai-tai, zak bih gwo ndhi kop-kop khi gwo ndhi diip-diip mwo kat retyit khishak di. ³⁷ Mbut sim bhilip sih; mee gwo kop, gwo wukwa diip, a zeen. ³⁸ A lep gun pee diip bii ndhi gu shin shiit fee ma. Gurum mwo shin shiit, bih ji gu del khinar mwo." ³⁹ Samariyawa mwo bwer khi yil fee mwo shin zeen nnih npee bhilip mat sih ndhi sat naa, "Gwo fee sat bi mwo bwer ndhi a sham shin fee ma." ⁴⁰ Samariyawa mwo yaghal ji nder muk, mwo dang ndeer Jesu dee nih pan tong a wukhime khi mwo, bih yaghal tong npee ter vil. ⁴¹ Gurum wukwa mwo shin zeen nbhilip khimuk. ⁴² Mwo sat nmat fee, mwo naa, "Mun pih shin zeen apee bhilip fi ndhi sat ma, a npee ndhi mun shii kaa sun mu khiling, bih mun man wai ndhi gwo sih a ngu ban mih yil sih. ⁴³ Khidangkong ter vil bih, yaghal wayaa nhalili. ⁴⁴ Jesu shi kaa shini sat naa, Anabi khit kat yon khi yil finih ma. ⁴⁵ Ndhi ji wul nGalili, bih nyen Galili mwo kaat nih. Mwo khi ten naa bi mwo duk-duk ndhi shin Urushalima khipee ret nyit yi khi yi, npee ndhi shi kaa sut mwo mwan di. ⁴⁶ Shin mwa wakji nCana khi yil Galili, laa yil ndhi Jesu viling amm bwor a aamm Inabi, dangbih mee mlaakop di khi yil Kafarnahun ndhi laa khimu nKaham ma. ⁴⁷ Ndhi kiling Jesu yaghal nYahudiya waji khi yil Galili bih, mwan nder Jesu bih dang dee nih sam bhirip khi laa khimuk, ndhi dee a lee det dee nhi muut dhi. ⁴⁸ Jesu shin sat nih, "kat ghi naa bi pee taa khi bi aapwo ma, bih ghi npee shin zeen ma. ⁴⁹ Laa kop sih saat nih naa, "Ghi sam la-la dee shee laa fee muut di. ⁵⁰ Jesu yaghal sat nih, "Ghi dhel, laa fik bar." Gwo fee shinzeen nbhilip ndhi Jesu sat nih, bih yaghal dhel bini. ⁵¹ Nih nbut shii mwan bih kwaram khimuk mwan kaat pihmuk bih mwo sat nih, "Laa ghi nih khi seen." ⁵² Bih tal nder mwo maa shwal fee bwot laa fee a pee nangy? Mwo yaghal sat nih naa a pee karfe khimee bih lapip fee bwot nih. ⁵³ Nda laa fee yaghal man asih, Jesu shin sat mih, "Laa ghi nih dii khi seen, bih nda fee shiikaa shinih shinzeen, nih khi gurum khimuk mwo duk-duk. ⁵⁴ Mhisih a bi pee taa wuvil ndhi Jesu shin khidangkong ndhi yaghal khi yil Yahudi wayaa nGalili.