1 Nphe ndhi a si a tiit nmun mu shin lleng khikha bih ndhi mu khiling, nphe deh yakba enn mu khi nmhin khi nih. 2 Nphe ndhi kat lep ndhi gyet jep-lep khi Naan mu wul khi nih a zen, yaghal duk-duk shikbis khi shii-khiling khi kat phishi fe nnot njing'guluk, 3 bhi shin anang deh mu pwat npho fe kat mu lhi enn mu khikha baga bih ndhi khi bar mun eh? A Nda Naan gyet she sat bhilip fe deshe niyen ndhi mu khiling mu lap der mu shin nmun zak. 4 Nbut teer wuni fe mu duk bhi Naan nin yit fe khi langtihng, bih fii-poo mu, yaghal shiit mu dik-dik mhi bal, khi kho zughum mhi Riin Wubang khipe ndhi no'ok muk mang dih. 5 Nphe ndhi gyet a nphe jep-lep khi Naan mu deh Naan den dhighinyil si, ndhi mun phi lap bhilip khikha fe. 6 Wak bhi, meh gurum nin langtihng nmeh peh, sat nna, "Gurum a meh, ndhi khi wet nleng nih eh? Kot a lah gurum, ndhi ghi dampeh nkhasak nphe muk eh? 7 Ghi gurum pan kat ntighim jep-lep mu; ghi shin yon nnih khi raam khibih long khi zung si, shin ghi den nih nphe naa kha bih mu khiding. 8 Ghi yit bih mu khiding a khi sar muk." Nphe ndhi yit bih mu duk-duk a khi sar muk. Bhi yit meh bih nnot khi den khi sar muk ma. Dang bhi khidetsi bhi mu naa ndhi yit bih a mu duk-duk khi sar muk gwe ma. 9 Dang bhi mu naa ndhi mu dak mu met njep-lep mu a leh det nbut bhit a nlani det: Jesu, ndhi nphe wula khi muut khimuk, bhi mu lep zung nnih khi raam yaghal yon. Nphe ndhi a si nphe wuretkhinaan, bhi sham muut phi kop gurum mu duk-duk. 10 Nphe ndhi Naan kat ret, nphe ndhi bih mu duk-duk mu dih a nphe muk shin a khisar muk, nphe deh nnih waji khi jep mu bwer nraam dih. Naa ret deh taa ntighim nphe deh nnih kat bar khiding nbut wula fhin dih. 11 Nphe ndhi gwo ndhi a ngu kon shikbis khi niyen ndhi mu dak mu khi kon shikbis mu duk-duk a but wukhime. A si dh kha muk kul ma nphe yong mu a emnighin nih mu dih. 12 Nih sat, "A sat sihm ghi n'emnighin nih mu, an nphe tong sa'am sihm ghi khinar gurum mu." 13 Shin a si, "An nphe den bhizung nhi nnih." Yaghal shin, "Gu naa, an si khi jep mu ndhi Naan shin n'an." 14 Nphe ndhi a si, nphe ndhi jep fe mu khi luu shi-shik khi tighim, bhi Jesu duk koo bih wukhime khi mu, nphe deh nyar muut bhi khi baa khi gwo ndhi khi bal mhi muut, ndhi a sharfom. 15 Ndhi si dok a nphe deh nnih fohn niyen ndhi pegyet mu lwaghat muut mu deh a kwaram mu. 16 Nphe ndhi a zen ndhi nih leng a khi jep-lep khi Naan mu ma; dang bhi, a nih phi leng a khi nkaan khi Ibrahim. 17 A si deh deh ret nnih nphe deh a khibih emnighin muk mu nbut bih mu khiding, nphe deh nnih bor a ngu naa-jhe'el shin a ngu shiit Naan mhi shinzen nphe bih mhi Naan mu, yaghal dwh nnih kat kon khi shikbis khi gurum mu dih. 18 Nphe ndhi Jesu shi-khashin shujeel shin mu kam nih, bhi mak ba'am niyen ndhi mu kam mu.