1 Yit ngun gu deltighim khi demshak nkaan mhi emnighin-shak mu. 2 Gu nok kon en shinret nphe mhizep mu si. Nphe ndhi a nbut nkaan en wuni, bhi pak gurum mu shinret jep lep khi Naan mu nnot nman. 3 Gu diye khi niyen ndhi mu nlihkwoo/bursina, nanghilhi mu diyan gun dih a wukhime khi mu. Gu diye khi niyen ndhi mu phi shin je'el nmu, nanghilhi gun khi mu a wukhime nbut nan-shishik. 4 Ret deh dyik deh a bih shamshiin nyit gurum mu khiding. Yit npehteer dyik deh a peh wu bang, nphe ndhi Naan nphe tok diyel nniyen tillet mu khi niyen shin ngah mu. 5 Yit deh yak ndem shaghal khi ntihkok khi shiit fuk ma. Gu moghor/plang khi bih ndhi gun khi nih, nphe ndhi Naan shi khashin nna, "A sham yit gun dih ma, shin an nphe kon/niyang gun ma." 6 Mu moghor khi bih ndhi mun khi nih deh nmun kat tughurkaham nphe sat si na, "Nda Naan a ngu baam an; an phe lughut ma. Gurum mak shin a meh n'an eh?" 7 Gu diye niyen phitighim fuk mu, niyen ndhi a mu kam/sat bhilip khi Naan ngun, yaghal gu leng khi bih ndhi en mu phi nin fe. Gu dhing shinzen khimu. 8 Jesu Kristi nih a wukhime dhidhighin, shinih, yaghal khi tai-tai. 9 Tap yakba mu khi mang/yighir en gu khi kam wupwo mu dhik-dhik ma. Nphe ndhi ret deh mu shin bal bhizung gu khi wuretkhinaan dih, ba a sih det mu ndhi mu khi baam niyen ndhi mu mwan nbut mu det ma. 10 Mun khi peh wapnaan ndhi niyen dhi mu phi shiit ndighin peh-wu-waar mu mak sih sih dih ma. 11 Nphe ndhi tighim long fe mu ndhi mu tiyo nphe shikbis bhi ngu shiitnaan wuyon khi man ji rhi khi nih khi peh wu bang/waar, yaghal mu shaan shishik fe mu khi tilleng. 12 Nphe ndhi Jesu shuje'el a si duk ntilleng khi fungbong yil, nphe deh nih vang shikbis gurum khi tighim nih dih. 13 Mun zak mu mwan nder muk khi tilleng fe, mu shu pak khakul khimuk. 14 Nphe ndhi mun khi meh yil nbhisi ndhi a nmun wai-wai ma. Kat a si, bhi mun phi tang langyit a nphe gwo ndhi nih nwul. 15 Khi yar khimuk, bhi, tong mu wet phi shin zughum mhi tam-sa'am Naan, saam mhi wuret ndhi put npoo nphe shin yon nsihm muk. 16 Yak en mu khi nmhin nphe shin wuret khi ba'am shak, nphe ndhi a khi nkaan zughum wuni fe mu ndhi bhizung Naan phi piya a wuret. 17 Gu loghot shin gu sam khi khasuk ntighim niyen phitighim fuk mu, nphe ndhi a mu phi dar nkha se'en gu, a mu nphe shin langtihng. Gu loghot deh phitighim fuk mu khi shin ndhisi khi retyit, bul ndhi mu khi voghor-gong ma, nndhi khi kot khi meh phishi/baam ngun ma. 18 Gu dangphinaan nmum, nphe ndhi ndhi mu shinzen ndhi mun khi en mhi wuret shin mun khi righit nphe tong pehtong wuret nbut bih mu khiding. 19 An phi dwak gun wai nphe deh ngun gu shin bih ndhi met ndhisi dih, nphe deh n'an a kat bes wawul ngun dih. 20 Khidetsi mangye Naan mhi tongshaghap, ndhi yaghal khi niyen wu duwam ndhi ngu-tap tihm mu, Nda mu Jesu, ndhi khi tighim khimuk mhi tuwarshik tai-tai, 21 lhi warrih nmun khi bih shiit wuret khiding nphe shin shiit khi no'ok muk. Mangye shin shiit khi mun nbut bih ndhi khi retyit muk a wuret, a wukhime khi Jesu Kristi, ndhi ndhi raam a mhi muk tai-tai. Asiwai. 22 Khidetsi a dwak gun, emnighin nih mu, deh ngun moghor khi bhilip ndhi kar ndhi a pan ran leh ngun si dih. 23 Gu man ndhi emnighin mu Timoti mu bwot nih, nih ndhi mun nphe wul naa gun khi nih kat bes wul. 24 Gu tal niyen phitighim fuk mu khi niyen shinzen mu duk-duk. Niyen ndhi mu Itali phi tal gun. 25 Mangye wuretkhinaan deh a wukhime khi gun khiding.