1 Peh-gyet dih Naan lap bhilip khi nda mu muh a shi phi niyen jagham mu shi bhit mu khi yarkaam mu dik-dik. 2 Dang bhi nbut teer wu lat si mu, bhi sat bhilip khi mun a phi La, ndhi den nih a ngu kok kop bih mu khiding. Shin a khi yar khimuk ndhi Naan dak dighinyil si. 3 Nih a riin ndhi phi milliap raam khi Naan, ndhi nih a no'ok khimuk mhi zen. Shin yak bih mu duk-duk khishak khi bal mhi bhilip fhin. Khidangkong ndhi vwang shikbis fhun, bhi tong khi sar wu-sih khi Wuyon ndhi kot khiting. 4 Nih bor a wuyon nkha jep lep khi Naan mu, nphe ndhi sihm ndhi lap si wu mah mhi mu nret. 5 Nphe ndhi Naan sham sat a meh la-lep ndhi ne nna, "Ghi a lah nih, shi nih a bor nda ghi" yaghal shin, "An a tong a nda nkha muk, yaghal nih khi deh a lah nih eh?" 6 Dang bhi shin, ndhi Naan wul khi lah nih wushe khi dighinyil, bhi sat nna, "A tiit deh jep lep khi Naan mu duk-duk mu wap nnih dih." 7 Khi kha jep lep khi Naan fe mu bhi sat nna, "A nih dak jep lep khi Naan fhin mu a riin mu, yaghal kwaram khimuk mu a lhiss wus ndhi phi lap." 8 Dang bhi khikha La fe bhi sat nna, "Pehtong long fhik, Nda Naan, nphe kot a tai-tai. Shuk ngwan mhi yil fhik a mhi tok diyel zen. 9 Ghi dem shiit wuret yaghal ghi niyang pehtong nnot nwaar. Nphe ndhi a si Naan, Naan fhik, pwas moor nkha ghi khi moor mhi retyit met niyen ndhi mu ntighim ghi." 10 "Yaghal nshe, Nda Naan, bhi ghi den kuk dhighinyil si. Khitingnaan a shiit shin khi sar ghi. 11 Mu nphe duwam kam si, dang bhi ghi mak nphe wet deh mwan. Mu duk-duk nphe nphe gyah khibih gok leh si. 12 Ghi nphe shighit mu a khibih lehwup shik si, yaghal mu nphe viling deh a khipe gok leh si. Dang bhi ghi mak nphe wet deha si tai-tai, shin yii fhik mu khi lat ma." 13 Dang bhi Naan sham sat a nla-lep ndhi ne nna, "Ghi tong khi sar nih wu sih deh an a viling sharfom fhik mu kot a bih den kwak nghi eh"? 14 Kan jep-lep khi Naan si mu duk-duk a riin ndhi mu phi shiit ma ah, yaghal mu lep mu deh nmu kot a phitighim nphe nniyen ndhi mu nphe kok kop bar se'en ma ah?