Ep fe 6

1 Emnhikhin nhi mu, kat muu kat me gurum ndhi shin shikbis, bih gun ndhi a khi yarkaam bih gu deel ni shin waji khi yar nriin mhi samkhikaa. Gu shin lee-lee yak-baa gu pwadhik ndhi nnar nyen shin wubis fee mu. 2 Gu nok damuwa khi shak sih dee ngun gu gam bi ndhi waar sat di khikaa Jesu Kristi. 3 Ndhi naa, kat megwo shin leng ndhi jin a mebi ndhi bah ni amebi mah, bhi ni phi gwam kaa shini. 4 Yit dii ndee ngurum muu khiding muu kam shiit fut, yaghal khi bi ndhi lih dee ni phi naa kashin a mebi di, bhi ni npee naa taa kat fini. 5 Npee ndhi kowane gurum khi mang tikhin fini. 6 Gwo ndhi muu kam bi wuret ret mu nni bhi khi kooh bi wuret ndhi kat fee zak khi gwo ndhi kam nni. 7 Guu nok yit muu gwam gun sih. Npee ndhi muu khi ta ba gwam Ndah Naan mah, npee ndhi, bi ndhi gurum kop bhi paar khi diip a ni. 8 Npee ndhi gwo ndhi kop sherem wubis bhi khi diip asih wubis zak. Gwo ndhi kop sherem mhi Riin, bih nRiin fee ni npee diip seen ndhi mwan tai-tai. 9 Muu nok mulet npee shin bii wuret sih, npee ndhi npuus wuret fee bhi mun npee diip Riin wuret kat mu nok kon yar fee sih. 10 Npee ndhi assih, kat mun khi yarkam, bhi mu shin wuret ngurum muu khiding tun baa a nyen ndhi mu shin zeen nNaan mah. 11 Gu naa baaga ran ndhi a ran ngun khisar nhi maah. 12 Mu ndhi mu phi dem nin ndhi duun a mebi nnar gurum mu bhi mun phi lih tiit ngurum mu dee mu puun muu di. Mu phi shin mhisih npee dee yakbaa mu shin jel nmu npee Jesu Kristi. 13 Npee ndhi mu ndhi mu puun muu ba a mu phi tap khi waar fee mah, shin bhin mu phi lih ngun, gu puun dee ngun gu shin yon nkasuk di. 14 An phi sihnaa mang yee a shai npee mebi mah, sai dai npee sihm mhi Ndah mu Jesu Kristi, npe ndhi a yar ndhi mu shin yil fee nnan, yaghal an nyil fee duk. 15 Npee ndhi baa puun koh rashin puun oh, bhi baa shin mebi wuret mah sai dai nlaa wupoo. 16 Shin ya mu khiding mu ndhi shimwan khimu ni a nyar mhi bhzung piya khi naajel kot assih nkha muu, har nkha jep Israila mhi Ndah Naan muu. 17 Yaghal shinni bhi tap megwo dampee nnan mah, npee ndhi a mang nshopsan alama mhi Jesu Kristi. 18 Yit dii ndee riin wuret khi Ndah Jesu Kristi kot awukhime khi emnhikhin nhi mu, dii. Asih wai.