Ep fe 1

1 Pol, shaar shiit khi Kristi Jesu khi dem khi Naan, nbut bih ndhi ɗen nbut sen ndhi nih a nmu Kristi Jesu, 2 shiin ji nder Timo, la ndhi a ɗem: Wuretkhinaan, najel, khi tongshaghap nmu Nda Naan khi Kristi Jesu Nda mu. 3 A plang Naan, ndhi an phi wap nnih khipe nkaan nda nhi mu si, khi nook wu bang, yaghal an phi diye gun nbut dangphinaan fhin lhipar khi biit. 4 Kat a diye yitmwa fuk, bhi nhi phi langyit nphe naa gun, ndhe an a gam khi retyit dhi. 5 Mu khikder nih khi shinzeen fhik wuret, dhi gyet nshe bhi ningkaam fhik Lois nih khi nih yaghal nighin bhi Eunice, bhi shin a khi shinzeen ndhi ghi kih en wuni fe duk. 6 A nphe nih dhe an phi khikder ghi dhe nghi ghi ep zughum ndhi Naan shin nghi nbut sar ndhi a lhing nkaa ghi. 7 Nphe Naan shin a riin nmhi lughut nmun ma, a mu bal khi demshak khi yaa ka-sak. 8 Nphe ndhi asi bhi tap nkaa ghi khi nkul sar nin langting nkaa Nda mu, kot nphe nih, Pol, ndhi mu bwaghat an ngwaghar nphe muk. Wak bhi mu ɗar nbut wula nphe bhilip wuret nbut bal nmu Naan. 9 A Naan bar mun shin yong mun khi yong wu bang. Nih shin ndhisi a nphe shiit fhun ma, dang bhi a nphe nook khimuk nphe mu yaghal wuret khimuk. Shin bih si nmun nbut Kristi Jesu deshe sheh khi yil dih. 10 Khidetsi Naan nin bar fin nphe mu a nbut wul khi nih ngu bar mun Kristi Jesu. A Kristi ndhi naa lang khi muut yaghal wul khi sen wu tai-tai nphe saan bhilip wuret. 11 Nphe ndhi asi, bhi mu mang an a ngwu sat bhilip Naan, shar shiit khi Jesu, yaghal ngu kam. 12 A nphe bihsi mu ndhi an phi shu wula. Dang bhi kaa nih kul ma, nphe ndhi a man gwo ndhi a shinzeen nnih. An khi tughurkaham ndhi khi den bih ndhi a shin nnih dang she biit fe dih. 13 Gu yaa kam nmu lep shinzeen ndhi gu khilling nder nih, khi shinzeen khi demshak ndhi mu nbut Kristi Jesu. 14 Bih wuret ndhi Naan shin nsar gu, gu yaa nih bal-bal khi baam khi Riin Wubang ndhi khi tong nbut mu. 15 Gun khi man ndhi si, ndhi nyen ndhi mu khi tong Asia mu vling dangkong nnan. Nnaar mu a Fijalas khi Harmajanas. 16 Mangye Nda Naan najel nfungbong Onisifaras, nphe ndhi tong khi dak bhizung nih yaghal shin kaa muk kul nphe ngwaghar ndhi an nbut fe ma. 17 Dang bhi dhi nih nRoma, bhi bong kop nih bwer, yaghal kat an. 18 Mangye Nda lhi nnih kat najel nyit nih par biit wuni fe. Gun khi nman a wuret nphe baam ndhi shin nnan khi yil Afisa.