¹ Khidetsi, emnikhinimu, gu dangphinaan npeh mu, deh nbhilip wuret khi Nda khi lap saam nkaa gu dhi. ² Gu dangphinaan dhe nmun mu pwat nsar gurum wubis mu dhi, npeh a khiding mu shinzen ma. ³ Nda nhi khi shin shiit zen dhe nhi tap khi mwan fuk nsar ngwo wubis. ⁴ Mun khi shinzeen nkaa Nda npeh gu deh ngun deltighim khi shin bhi dhi mu sat ngun gu shin. ⁵ Yit dhi den Nda nin bhizung demshak nmu Nda Naan khi moghor khi Jesu. ⁶ Khidetsi mu dang phe gu, emnikhinimu, nphe sim dhi ni a mhi Nda Jesu Kristi, gu bwak khi yar kaam nmu emnikhinimu ndhi mu khi meh shiit mah khi yar ndhi gu lap nsar mu. ⁷ Nphe dhi gun shi kasuk gu man yar dhi deh gu ding mun dhi. Ba mu tong nnaar gu khi phe ndhi mun khi nook wuret ma. ⁸ Mu tsi-tsi khi me gurum nnnot mu kwat ni ma. Duk khi jel dhi mu kat mun phe deltighim khi shin wuret npus khi lipar yak ba nkot lhi tikihin ngun ma. ⁹ Mu shin mhi si nphe dhe mun mu nin yarkaam wuret ngun dhe gun gu ding mun dhi. ¹⁰ Mu dang shi phi gu dok ndhi mun nder gu, "kat me gurum nhi phi dem shin shiit ma, ret deh nhi sih-sih ma." ¹¹ Nphe dhi mu khilling dhi pak mu phi shin shiit lokhom nnaar gu. Mu shin mah nhi tong mu mwan rhim. ¹² Nkan gurum wuni mu, khi sim dhi ni a mhi Nda Jesu yit deh mu shin shiit shakat deh mu kat sih dhi. ¹³ Emnikhinimu, gu nok bwak khi bhizung gwu nphe shin bhi dhi ni a wuret ntighin Naan. ¹⁴ Kat me gurum dhi khi shin yon khi bilipnaan ma, bhi gu yit nhi bhishinin deh nkaa muk kul dhi. ¹⁵ Gu kaar nhi khi peh emnikhin si yak ba ngu nin nhi a sharfom ma. ¹⁶ Yit dhi deh Nda shin tongshaghap shin tongshaghap ngun tai-tai. Mang ye Nda mwan khi gun. ¹⁷ An Pol, khi saar nhi, dhi si a tal fin dhi a ran khi sar nhi, nphe dhi a yar lep fin dhi a shin dhi. ¹⁸ Mang ye riin mhi Nda Jesu Kristi khot a wu khime khi gun khiding.