Ep fe

1 Pol, shaar shiit khi Kristi Jesu khi peh ndhi nbut waar khi Nda Naan ngu bar mun khi Kristi Jesu ndhi a tughurkaham fun, 2 shin ji nTimo, la wu zeen nbut shinzeen: Wuretkhinaan, najel, khi tongshaghap tong nder Nda Naan yaghal Kristi Jesu nNda mu. 3 Khi peh ndhi dok a kar ghi dehshe a del a yaa Macedonia dih si, ghi tong Ephesus nphe deh nghi ghi lhi npak gurum yak mu khi nkam kam waar wu dik. 4 Tap shin mu khi nkhilling dramtis khi fyar nnot npelang. Deh ndhi dih si khi baam nook Naan, ndhi a zeen, bhi mu khi ji a khi gagharshik det. 5 Khidetsi phishi waar fe a demshak nbizung piya, khi nook wuret, yaghal den bizung nNaan mu zeen. 6 Pak gurum mu man kang fe ma yaghal mu viling dangkong nbih si mu yokya bhilip wu ban. 7 Mu phi dem de'eh a nyen kam pishi waar mu, bhi mu man kaa bih ndhi dun phi sat fe ma shin bih ndhi mu phi daar nphe nih. 8 Dang bhi mu man ndhi waar a bhi wuret kat gurum shiit khini nyaar wuret. 9 Mu man dhisi, ndhi mu den waar a nphe gwo ndhi nih a wubang, dang bhi nyen ndhi a nyen yaa waar mu ma khi nyen rwang mu, nphe nyen ndhi mun man Naan ma khi nyen shikbis mu, yaghal nyen ndhi mun man Naan ma khi shiit wu ban. Mu den a nphe nyen ndhi mu tyo nnda du khi nighin du mu, nphe nyen tyo gurum mu, 10 nphe nyen tileet mu, daas tirop khishak mu, mphe nyen ndhi mu phi wat gurum mu nphe lap mu bor kwerem khi mu, nphe nyen dung mu, nphe nyen lap langting dung mu, khi nyen ndhi mu nyang me kam nmu zeen. 11 Kam si a khi yar nmu raam bhilipnaan nmu Naan wuret ndhi mu shin nsar nih. 12 A plang Kristi Jesu Nda mu. A nih shin bal n'an, nphe dhi mang an a ngu zeen, yaghal den an shiit. 13 Gyet an a gu sina Naan dih ma, ngu shin jel ngurum mu, yaghal ngu lyak gurum mu. Dang bih Naan naa jel nhi nphe ndhi gyet a shin bih fe mu a khi man fhin ma, nbut shinzeen ma. 14 A si bih wuretkhinaan khi Nda kot dih bwer khi shinzeen yaghal demshak nbut Kristi Jesu. 15 Lep si a mhi zen dhi ret lap yaa, ndhi Kristi Jesu wul khi dighinyil a nphe bar nyen shikbis mu. An a wu his fe duk-duk nnaar mu. 16 A nphe ndhi a si deh mu naa jel nih dih, nphe dhi nbut nih, gu phitikighim wuyon, Kristi Jesu khi nin moghor fin duk-duk. Shin bih si a nphe dhe nih deh a bih-kam nnyen dhi mu khi den bhizung nkaa muk nphe seen ndhi tai-tai. 17 Khidetsi nphe long ndhi nih a ngu yii mu bwer, ndhi khi muut-muut ma, ndhi mu khi naa nih ma, Naan ndhi a nih set, mu shin yon khi saam nih tai-tai. Asiwai. 18 An phi den waar si ntighim ghi, Timo, laa nih, kih yaar jagham ndhi ndhi gyet mu bhilip nkaa ghi, nphe deh nghi ghi lyak-lyak wuret dih, 19 yaa zeen khi nook wuret. Nyen ndhi mu nyan ndhisi mu tikhok kih shinzeen fut. 20 Nkaan nyen wuni fe mu a Hymenaeus khi Alexander, ndhi a shin nshaarfom deh mu man biss nmu nyang ndhi Naan dih.