Jing 1

1 Bulus wuɓǝlang nung Yesu Kristi, mǝ yong ni bǝn ɗee a laalep, mǝ shiang ni dǝ ɓǝlǝp wuret nung Naan. 2 Ɓǝlǝp wuret nhǝ a ɓǝlǝp ɗen wusaǝgǝr gǝpee mǝjeplep Naan muop gǝpee ɓǝlǝp wusǝsaar afe. 3 Dǝ laa muup wudung a seen Dauda nung wsopshik hǝ. 4 Gǝpee chelem wusǝsaar mv mang ni a wukam gǝbǝlǝp wu gǝ ɗee a laa Naan gǝpee yagal ntugun muut, Yesu Kristi ni a Miskagam. 5 A gǝpee muup mǝ lap chinɗong gǝ kǝlǝng ɗǝgǝl pǝn naduk nɗǝgǝn wujong dip dǝ sǝm muup. 6 Nɗǝgǝn wujong muop na ni mǝ yong gun dǝ gu ɗee a nung Yesu Kristi. 7 A dǝ gu dip gun gurum Rom, wu dem Naan muop, wusǝsaar ndung mǝ yong hǝ, chinɗong tong gǝ gun gǝ tughat chagap nung Naan ndung a Nda mu gǝ Miskagam Yesu Kristi. 8 Bii gǝme, a ɗǝkyil Naan a nǝ gǝ dǝ Yesu Kristi dǝ gu dip nsa naduk a gu muop pǝ laa ni gǝyil dip. 9 Nsa a tuamsan shi Naan, ndung an pǝ wap hǝ nɗǝgǝn chelem nung ɓǝlǝp wuret nung laa ndung bii a yong sǝm zǝm. 10 Bii an fu ɗang Naan zǝm nɗǝgǝn ɗangpee a nǝ nɗǝgǝn war dip ɗee a warǝ dǝ gu nɗǝgǝn kamgǝ ɓǝlǝp Naan. 11 An fu tangkop ɗin a kat gun, dǝ a pǝn pak chelem ngun dǝ gu ɓal yi. 12 A ni, dok a kat tugurduan nɗǝgǝn gu, gǝ dǝ naduk a mu, nǝmaan gǝ nǝmuk. 13 Gǝde hǝ a tangkop gu ɗee wugu man zak mǝu. Mǝjep'emnaa an fu ɗiye dǝ wul dǝ gu (war kat shik duk mǝu), a tangkop kamhǝ dǝ a kat pak jep nɗǝgǝn gu, ka gǝbii a kat nɗǝgǝn wunjong muop hǝ. 14 An gǝ kaat dip gǝpee Hellinawa gǝ gogot wujong muop dip gǝ wusoon muop gǝ wuyogor muop. 15 Nǝ maan lat dǝ a laa ɓǝlǝp wuret dǝ gu ndung gun nRoma hǝ. 16 Nsa an gǝ kaa waat dǝ a laa ɓǝlǝp wuret, nsa kam ɓǝlǝp dǝ a nkaa gurummuop wu mǝ pǝn naduk, ɗin gǝ kwǝt Yahudawa nkyen she Hellinawa muop. 17 A nɗǝgǝn afe wuret dip-dip nung Naan nin kǝ shik dǝ naduk gǝ naduk ka gǝbii ni nbiran hǝ, "wuret dip-dip gǝ mǝ bǝrǝp gǝ naduk wu mǝ pǝn". 18 Nsaa dǝfil Naan yong gǝ nin kaashik kǝbǝtǝng dǝ mu nyong Naan muop gǝ muop wu nyang bii wuret mǝ bǝn tǝ wuret gǝ naduk. 19 A nwa nii ndung mǝ man Naan gǝ ni hǝ, ni a dar dǝ muop. Nsaa Naan nin kaa shik nmuop. 20 Nsaa jepee afe dok gǝ mǝ naa ni mǝu, ka kǝ bii kam ɓǝlǝp gǝgwǝ gǝ pǝ Naan ɗee a dar dǝ naa, a chidel chin gǝyil, gǝ mǝ ɓoot man gǝyit jepee wu mǝ chin hǝ, gǝ kan hǝ muop gǝ pera mǝu. 21 Nsaa, dok ɗin mǝ man Naan, mǝ pǝn yoon ni a Naan mǝu, ɗak yi mǝ ɗǝkyil ni mǝu, mǝn lat, mǝ wak ɗee a wuyogor n-endiye a muop, bǝzung muop wulǝleng bǝn kwǝ. 22 Mǝ naa mǝ kat dun a wusǝsoon, mǝ wak ɗee a wuyogor. 23 Mǝ bat lapyoon nung Naan gǝgwǝ gǝ jepee muop wu gǝ mǝ lat hǝ, ka gǝbii gurum yer muop gǝ lua wu kwak feer hǝ, gǝ wu feer gǝ bǝt. 24 Gǝ kamhǝ, Naan pǝn bicha nbǝzung muop nsa bii-wubis a muop, dǝ swopshik muop wa ɗee a bii kaa waat dǝ shik muop. 25 A muop nani mǝ bat naduk nung Naan dǝ wurum, mǝ wap bǝn mǝ chin ɓǝlang gǝbii mǝ chin ɗee mǝ nook wu chin ni ndung ni a wuret gǝgwǝ. Mǝ dem a ni. 26 Gǝ kam hǝ, Naan pǝn muop nbicha wubis nung dam gǝ buwaar, nsaa surǝp muop mǝ bat lawumis teer gǝ namat wa ɗee namat teer gǝ namat. 27 Daas muop mǝ nit turǝp gǝ surǝp ɗee daas mu turǝp daas. Nhǝ a daas muop wudung kaa waat wǝn muop gǝ mǝ chan bii ɗengpee nhǝ, muop gǝ mǝ kat kopgǝchi nung bii ɗengpee a muop. 28 Nsaa mǝ nyang Naan nɗǝgǝn jepee a muop, mǝn pǝn bǝzung nung bii wulǝleng muop, ɗee muop mǝ chan jepee wu ni nka war yi mǝu. 29 Muop gǝ gam bii wubias, ɓǝtbis, cha bii gurum, mangdogor, muop gǝ bǝtɗeet, tǝ gurum, tang jagar, fǝnpee gǝ endiye wubis. Muop a wu laapee, 30 damshak, nyang Naan, tang ɓǝlǝp ɓagal, nas zung, tang war jepee chan jepee wubis muop, mǝ ɓak mǝmya muop. 31 Kaa bat, pǝn naduk wǝn muop, bǝzung wubias gǝ nachigir zeet. 32 Mǝ man bii waar Naan, muop na ni mǝ dong ɗuam. a chan jepee na ni dat mǝu, mǝ tǝp dǝ wu chan jepee wubias.