1 Nɗǝgǝn ɓit muop nanyi mǝn Kaisar Agustus tak lep ɗǝ mǝ kun kaa gurum gǝyil yi dip. 2 Wudung dok kunpe wupel shii wu Kwiriniyus a gwopna Siriya hǝ. 3 Lat mǝn kowuda waa dǝr gǝyil lǝnuup ɗǝ war mǝ kun nyi yi. 4 Yusufu waa zak yaa nGalili, gǝyil Nazaret nɗǝgǝn Yahudiya, gǝfǝr Dauda wu gǝ mǝ yong shi Baitalami hǝ, nsa nyi dok a seen Dauda. 5 Mwaan nnǝgǝn ɗe war mǝ kun nyi nau gǝ Mariya mat-yaa gǝfe wudok nyi gǝ gam hǝ. 6 Muop nnǝgǝn dat mǝn shii laa gǝfe waarǝ. 7 Mǝn la gǝkaat gǝfe a laa wumis, mǝn ǝber nyi shi byaat, mǝn ɓwǝt nyi nkorom nsa dok muop gǝ lǝ nnǝgǝn mou. 8 Ngan yil nanyi dok wutap muop nnǝgǝn, mǝ tugatɗok gǝlaap fu kang kǝ bii-lon gǝmuop nlǝpar. 9 Mǝn me mǝwong Naan ji dǝr muop, mǝn pee saan yaa muop waat, mǝn took muop pya badǝn. 10 Mǝn mǝwong nanyi laa gǝ muop yen, "Gu yigil lugut mou, a ji a gǝ ɓǝlǝp wu ge wul gǝ tookpya ngun gǝ gurum dip. 11 Chinyi mǝ laa wu angkaa ngun gǝfǝr Dauda! A nyi a Kristo, Ndaa Naan. 12 Ya guu man nyi a shi nhǝ: Ya gu kaat lalaa wu mǝ ǝbǝr yi shi byaat ɓwǝtdok nnǝgǝn korom." 13 Gǝ laa mou mǝn mǝwong fugǝtǝng mǝ tǝl kǝ shak mǝn muop fu saam sǝm Naan mǝ yen, 14 "Yoon a nung Naan wu gǝtǝng, mang ɗyin tugat chagap kot gǝyil gǝnaar gurum wu took muup pya gǝmuop hǝ." 15 Mǝwong muop nanyi mǝ yigil nyit muop dat mǝn wutap nanyi mǝ laa dǝr ska mǝ yen, "Mǝ mwaaan nBaitalami, ɗe war mǝ naa bii wu taa nanyi yi shi yit mu, kabi wu mǝwong laa gǝmǝn hǝ." 16 Mǝn mǝ yigl wagap bǝr mwaan ji mǝ kat Mariya gǝ Yusufu, mǝn mǝ naa lalaa nanyi teerɗok nɗǝgǝn korom. 17 Mǝ naa nyi lat mǝ yakdang bii wu dok mǝ kǝlǝng gǝkaa lalaa nanyi. 18 Ɓǝlǝp wu wutap mǝ laa hǝ rǝng gurum wu mǝ kǝlǝng hǝ. 19 Mariya kǝlǝng lǝfu nanyi mǝn lap lǝ nɓǝt dǝ, gǝ ɗyee ɓǝlǝp ɗyee yi gǝkaa. 20 Wutap muo nanyi mǝ yigl wak, muop fu shen yoon mǝn mǝ saam sǝm Naan nsa bii wu mǝ kǝlǝng mǝn mǝ naa shi yit du, kabi wu mǝ laa gǝmuop hǝ. 21 Ndangkong ɓit pogokun mǝn mǝ gap dǝp muup mǝn mǝ pǝs sǝm muup a Yesu, sǝm wudok mǝwong mwǝn ɗǝng shee mǝ mang gam gǝfe hǝ. 22 Ɓit zughum-shik gǝmuop wudung bi-tǝt Musa laa hǝ del mǝn Yusufu gǝ Mariya mǝ mang nyi mwaan nlǝwap wuyoon gǝnyi ɗe war mǝ shen nyi yi Naan. 23 Kabi wu mǝ yil den nɗǝgǝn bi-tǝt hǝ, "Laa wumis nkot a gǝkaat ɓǝ mǝ shen nyi nNaan." 24 Lat mǝn mǝ mwǝn bi-tok kabi wu bi-tǝt Musa laa hǝ, "Jep ɓǝl vǝl ko ɓǝlkur vǝl." 25 Mǝn mǝ kat me dagwu nUrishalima, sǝm muup a Simanu, nyi a gurum wukǝr wu yaa ɓǝlǝp Naan gǝrǝt. Dok ɗen en muup kǝ ɓit wu gǝ mǝ zwaan Izraila kabi wu Mǝrip Wuret laa gǝnyi hǝ. 26 Dok Mǝripǝ Wuret nyin nnyi nkwǝt gǝ naa Kristo nung Ndaa shi yit muup ɗǝng shee muuy. 27 Mǝrip mang nyi mwaan gǝnyi nlǝwap wuyoon. Nda muup gǝ nǝgǝn muup mǝ ruo gǝ Yesu, kabi wu jet gǝmǝ chan hǝ, 28 mǝn Simanu mang nyi nsar mǝn saam Naan yen, 29 "Gǝdet nhǝ nyit kurum gǝgǝ waa chagap, Nda Naan, kabi wu ɓǝlǝp gǝgǝ laa hǝ. 30 Nsa yit nǝ naa angkaa 31 wu gǝ chin ntagam gurum gǝyil dip hǝ: 32 A nyi a wus wu gǝ saanpe nMǝjong muop hǝ; a nyi a yoon gurum gǝgǝ Izraila." 33 Bii wu mǝ laa kǝ lalaa nanyi rǝng nda gǝ nǝgǝn muup. 34 Simanu saar muop mǝn laa gǝ Mariya, nǝgǝn muup, yen, "Yi naa, lalaa nhǝ gǝ kot a tugus pal gǝ yagal gurum gwet gǝyil Izraila, a nyi gǝ kot a bi-nyin wu mǝ nyang hǝ - 35 chuk par gǝ ɓyang bǝzung yi - npe ɗǝ nyin ɓǝlǝp ɗyee gurum muop yi gwet." 36 Me mǝ reeplepnaan sǝm muup a Hanatu, zak dok nyi nnǝgǝn. Nyi a reep Fanuwel, grum gǝseen Asha. Dok duan gwe badǝn. Mwaan ɗyik dat gǝ yii pogovǝl mǝn mis muup muut, 37 mǝn tong-tong matkaa nung yii yagurum-feer gǝfu feer. Bii tongɗok a nlǝwap wuyoon dat nfuus gǝ lǝpar, nyi fu sǝnfu gǝ dang Naan. 38 Gǝshii nanyi mǝn ji duk gǝ muop mǝn dǝk-yil nNaan mǝn laa ɓǝlǝp kǝ lalaa nanyi ntagam ggurum dip wu muop jet fu lǝng en du kǝ angkaa Urishalima hǝ. 39 Mǝ chin jepe wu bi-tǝt Naan laa hǝ lat mǝn mǝ wak dǝr lǝ muop gǝyil Nazaret nǝgǝn Galili. 40 Lalaa nanyi fyer nɗǝgǝn kagam gǝ soon gǝ chinɗong Naan. 41 Nda gǝ nǝgǝn muup bii mǝ mwaan nUrishalima shi yii-shi yii npe bi-sǝ Ɓit-gapdel. 42 Waarǝ yii sarkavǝl mǝn mǝ mwaan gǝshii bi-sǝ nanyi. 43 Ɓit waarǝ mǝn mǝ yigil wak dǝr gǝpang. Mǝn Yesu ɗee nUrishalima gǝ man nda gǝ nǝgǝn muup mou. 44 Mǝ ɗyee kat kot nyi gǝnaar gurum shidat mǝn mǝ chin bit gǝme gǝwar wak. Ba mǝ tang nyi gǝnaar mǝmya gǝ mǝ shaar muop. 45 Mǝ kat nyi mou mǝn mǝ chin wak dǝr urishalima mǝ tang nyi yi nnǝgǝn 46 Ndangknog bit kùn mǝn mǝ kat nyi gǝnaar mǝ bishee muop , nyi fu kǝlǝng muop mǝn nyi fu nang ɓǝlǝp fu muop. 47 Gurum wu mǝ kǝlǝng nyi hǝ, ɓǝlǝp rǝng muop nsa enɗyee gǝfe gǝ ɓǝlǝp wu nyi fu lap hǝ. 48 Mǝ naa nyi mǝn rǝng muop. Nǝgǝn muup laa gǝnyi yon, "Laa nǝ, gǝ chin a me kam gǝ mǝn yi? Gǝ naa an gǝ nda gǝ, mǝ tang gǝ ba took mu dam." 49 Mǝn lap yong, "Gu tnag an a npe me? Gu man nkwǝt gǝ a chin ɓǝlang lǝ nda nǝ a lengwaar mou a?" 50 Mǝn mǝ ɗyam shi ɓǝlǝp wu laa hǝ mou. 51 Lat mǝn waa gǝdǝr muop yaa gǝpang nNazaret mǝn lǝng kom kǝlǝng muop yi. Nǝgǝn muup yaa jepe nanyi nyak nbǝzung dǝ. 52 Mǝ Yesu fyer nɗǝgǝn soon gǝ dǝng shishik, mǝn kat chinɗong ntagam gǝ gurum.