¹ Yesu rə nyi fu del ndəgən tugun Yariko. ² Mən səkang gə məgwə ndung səm muup a Zakka. Nyi wu nka mə piyan lap Gəndung nyi bən a wu long. ³ Tang din nna kwət a wudang a Yesu, mən bwət bə naa nyi məu, wa nsa bəl gurum bən nyi kəp yoon. ⁴ Mən yak gəsə del ntagam muaan gə kaa təng Baure dewar nna nyi, nsa Yesu yong gə del nwar nnəgən. ⁵ Ndəgən wu Yesu warə npee nani, naa pee gətəng mən laa də muup yen, "Zakka, sam bər, məbi yong gə dən sam ləgə chini məu." ⁶ Mən sam bər, lap nyi gə tookpiya. ⁷ Ndəgən dip gəsəm muop ndung mə naa bii nhə, mən mə dung bəlep mə yen, "Wul də wuchin-biwubis." ⁸ Zakka yagal dər mən laa də wumaa, "Gə naa wumaa, yong a mwət gogot bilong anə nwupiya, din nkwət a vogop məgwə kə məbii, yong a mwət wumaa na nyi gə feer a kaa." ⁹ Yesu lap fu muup yen, "Chini Angkaa rə gəpang nhə, nsa nyi ma a laa Ibrahim. ¹⁰ Nsa La Gurum wul a də ntang bən lap gurum wu mə lən. ¹¹ Ndəgən məkələng jeppe nhə, bən laa bəlep mvn laa bəlep-kwoomkaa, nsa nyi dəduk gə Urushalima, mən mədiye nkwət yil-long Naan yong gə kwət gədes nhə. ¹² Mən laa yen, "Dok bii gə məgwə a wulong ndung muaan npe wusəng dewar nlap long də kaashik bə wawul. ¹³ Mən yong kwərəm afe muop sar, mən fam sar, mən laa də muop yen, "Gu chin lətuk gə ndung hə dee gu naa wawul a nə yi." ¹⁴ Mən gurum afe muop mə niang nyi, mə lep gə gurum ndung məpənhə gədə muup, mə yen, "Mən mə dən dagwa nhə nkwət a wuyoon nkaa məu." ¹⁵ Ndəgən kamhə mən wa, ndangkong kat yil-long na nyi, mən mwət fu də yong kwərəm muop ndung mwən shagal nmuop hə, nsa man am wu nka dung mə kat ndəgən lətuk ndung mə chin. ¹⁶ Wu shi deel wul də muup, la yen, "Wuma, fam a gə nhə kat am shikasar." ¹⁷ Wulong laa də muup yen, 'kamhə, kwərəm wu kər. Nsa gə chin naduk gə bii wutil, yong mə muən kamshik dəgən tugun pe sar ndung a gə tong gə laa-lat ka muop.' ¹⁸ Wu vəl wa ji, nyi fu yen, 'Fam a gə, wumaa, kat am nkaa paat.' ¹⁹ Mən wulong laa dəmuup yen, 'Gə yong gə laa-lat kə tugun pee paat.' ²⁰ Nde bən wa ji, nyi fu la yen, 'Wumaa, lap Fam a gə ndung a den dədong ndəgən nikien, ²¹ a lugut gə nsa bii gə dem bii yoon. Bi gə mang bii ndung a gə gə den məu, bii bən gə dip bii ndung a gə gə kop məu.' ²² Mən wulong laa də muup yen, "A sheep gə a shi bəlep a gə, gə a wubaan kwərəm. Gə man kwət an a wu dem bii yoon, bi a mang bii ndung a an a den mvu, bii bən a dip bii ndung a an a kop məu. ²³ To a nsa mee gə muaan gə shagal a nə wupiya Banki muop eh, ndungkat ndangkong a wawul bə a lap nyi gə am'nkaa məu eh? ²⁴ Wu long na nyi laa də muop ndung mə diyamdok nnəgən, 'Gu lap Fam ndung nhə fu muup, gu mwən ngurum wu nyi gə nyi sar hə.' ²⁵ Mən mə laa də muup mə yen, 'wumaa, nyi gə Fam sar.' ²⁶ An fu laa gə gun, dip gurm ndung nyi gə məbii bə mə dək nde kaa nə muup, gwə ndung nyi gə nyi məu bə mə lap gogot bii wu dee fu muup hə. ²⁷ Amma wu kas nə muop nhə, muop ndung mə dem din an a kwət wu nkamuop məu bə, jaa gə muop hə twə muop də yit nə." ²⁸ Dəgən laa bəlep muop nhə, mən muaan tagam, nyi muaan ya Urushalima. ²⁹ Ndəgən kam'hə wa wul dəduk gə Baitfaji gə Baitaniya, kə gəsung ndung bii mə yong a Zaitun, mvn lep Jeplep afe vəl, la yen, ³⁰ "Muan ndəgən tugun pe wu nyi ntagam gu. Ndəgən wu gu rwə, yong gu kat bəsəng ndung bəsəm məgwə met nyi məu. Gu wut nyi mən gu jaa gə nyi n'an. ³¹ Din məgwə nnang fu gu, 'a nsa mee gun fu wut ni eh? bə gu yen, 'a wumaa nyi fu tangkop afe." ³² Muop ndung mə lep muop hə muan mə kat bəsəng na nyi gəbii ndung Yesu laa də muop hə. ³³ Ndəgən muop fu wut bəsəng nanyi mən wu piyan nyi muop mə laa də muop mə yen, "A nsa me gun fu wut bəsəng na ni'eh? ³⁴ Mə lap yen, "Wumaa nyi fu tangkop afe." ³⁵ Mə wak jaa gə nyi, mə səp twən afe kaa bəsəng nanyi mən mə lang Yesu gədap afe. ³⁶ Ndəgən nyi fu muaan, mə suap twən amuop kə war. ³⁷ Dəgən kus gə yaa sam gvsung Zaitun, mən dibit wumuan gədəmuup mə bəm nin tookpiya a muop, muop fu bən wap Naan gə tookpiya wu gət nsa bii ninmaa wu mə na hə. ³⁸ La yen, "Albarka a nung Long ndung wul ndəgən səm Nda! Tuagatchagap kəpətəng gə bii wuret dip!" ³⁹ Pak Farisawa ndvgən gurum muop mə laa dv muup mə yen, "Dagwə, gə biyaal wu muan gədəgəmuop." ⁴⁰ Yesu lap yen, "An fu laa naduk gə gun din muop nhə mədokbəp, bə pang mə eer gə dəgəl." ⁴¹ Ndəgən yesu wawul dəduk mən wal kə dəgən tugun nanyi. ⁴² La yen, "Din gu man bii nhə, gə gun dip, peppe dungkat anyi gə wul gə tuagatchagp! Mən ndəgən gədes hə, nyi a wu səsok fu yitgu. ⁴³ Nsa bit nii n'wawul kaa gu ndung wukas gu yong gə mə diak guat də wu meer gun, mə bən pal kaa gu ndəgən eskogop dip. Yong gə mə kuap gun dip gə jepgu. ⁴⁴ Yong gə mə nyit me mə pang kaa nde məu, nsa gu mwət en gu kə bii ndung Naan dem din npən gun məu. ⁴⁵ Yesu rə Lewap-wuyoon mən bəm chen wupiyan seet gə jeppe. ⁴⁶ Nyi fu laa də muop yen, "Nyi nbiiyil nkwət "Lə nə yong gə kwət a pee bəlep gə Naan, mən gu bat nyi wa a pee Kwələp. ⁴⁷ Nnəgən mən Yesu bi nyi fu bishee nnəgən shibit-shibit ndəgən Lewap-wuyoon. Mən wunan Firistoci gə wubiiyil gə wunan gurum muop mə dem din mə tə nyi. ⁴⁸ Mən mə kat war chin kam'hə məu, nsa gurum muop fu kələng nyi gwet.