1 Miskagam Tyofulus wukǝgǝt, gurum muop nɓǝl mǝ yil gǝkaa jepe wu ɗak gǝnaar mu hǝ, 2 kabi wu mǝ lap fu muop wu dok mǝ naa shi yit muop pel hǝ, a muop a jeplep wu mwǝn ɓǝlǝp nanyi hǝ. 3 Mǝn an zak, ndangkong a bil gǝkang jepe nanyi shi wudok nyi fu ɗak ɗagat ntagam hǝ, mǝn a naa a kat ɗong ɗyin a yil ngǝ gǝtek-gǝtek. 4 A kat ɗong kam npe ɗǝ gǝ man naduk yi gǝkaa jepe nanyi. 5 Yii wu Hiridus a long Yahudiya hǝ dok me ndawang gǝsar Abija nnǝgǝn sǝm muup a Zakariya. Mat muup dok a reep Haruna, sǝm muup a Alisabatu. 6 Muop nau a gurum wukǝr ntagam Naan, mǝ kang bi-tǝt wu Naan mwǝn hǝ dip. 7 Mǝn muop gǝ lalaa mou nsa Alisabatu dok a zang, muop nau vǝl mǝ duan. 8 Mǝ ɓit mǝ Zakariya mwaan ntagam Naan npe chin ɓǝlang ndawang nnung gan gǝseen muop yi. 9 Dok mǝ shang a nyi ɗe war nyi rǝ nlǝwap wuyoon npe tuut ɗyel yi. 10 Gurum muop wukǝgǝi dip mǝ ɗyam ɗok gǝɓang fu ɗang Naan shi wu nyi rǝ npe tuu ɗyel nanyi. 11 Lat mǝn me mǝwong Naan pǝt dar ngan gǝsar dasǝ nung rǝk-tok nanyi. 12 Zakariya naa nyi mǝn yagal lugut. 13 Mǝn mǝwong Naan nanyi yen, "Zakariya, gǝ yagal lugut mou nsa Naan kǝlǝng ɗangpe gǝgǝ. Mat gǝ Alisabatu gǝ la laa wumis ngǝ. Gǝ yong sǝm muup shi Yahaya. 14 Nyi gǝ kat tookpya, took gurum gwet gǝ pya shi laa gǝfe. 15 Nsa par gǝ gǝ kot a wu pǝtkaa ntagam Naan. Gǝ nyit nyi nsua am-laatǝng gǝ me am wu ɗwang mou, nyi gǝ kat Mǝrip Wuret nɗǝgǝn bǝt nǝgǝn muu. 16 Gurum Izraila gwet par gǝ bat wakyaa dǝr Naan gǝdu. 17 Par gǝ chan jepe gǝfe ntagam Naan kabi Iliya hǝ. Gǝ chin a kam ɓǝ bat bǝzung ndaa wakya dǝr jep gǝnyi ɗe war nwupyan ɓǝlǝp nyang muop mǝ mwaan-mwaan yi gǝ gurum wukǝr npe ɗǝ myap gurum muop yi nNaan." 18 Zakariya laa gǝ mǝwong nanyi yen, "De ge a chin a na a man yi? Nsa an a duan mǝn mat nǝ zak duan." 19 Mǝwong nanyi lap yen, "A an a Jibrilu wu jet gǝ a dyam ntagam Naan hǝ. Mǝ lep an npe ɗǝ a laa ɓǝlǝp tookpya nhǝ yi gǝgǝ. 20 Gǝɗet nhǝ fugǝ gǝ bǝm, gǝ ɓoot npǝ laa ɓǝlǝp mou ɗǝ a par ɓit wu jepe mou nhǝ ɗak hǝ dat. Gǝ kot kam a nsa gǝ nyang nǝ gǝ mwǝn naduk nkwǝt bii wu Naan la gǝ pǝt n-yit." 21 Gurum mǝ ɗyamɗok gǝɓang fu kang pǝt Zakariya. Ɓǝlǝp rǝng muop nsa mǝ kat zaa muup sǝng nɗǝgǝn lǝwap nanyi. 22 Pǝt mǝn ɓoot fu laa ɓǝlǝp zak mou. Mǝ man nkwǝt naa a mǝbi nɗǝgǝn lǝwap wuyoon nanyi. Ɗe gǝ nyin jepe a shisar dat nsa fu muup ɓǝm. 23 Ɓit ɓǝlang gǝfe lat mǝn waa gǝpang. 24 Ndangkong ɓit muop nanyi mǝn mat muup Alisabatu mang gam mǝn sok shik tar paat. Yong, 25 "A bii wu Naan chin n-an, chinɗong n-an ya baa kaa nǝ gǝ waat veet ntagam gurum." 26 Nɗǝgǝn tar wu peemǝ mǝn Naan lep mǝwong gǝnyi, sǝm muup a Jibrili mwaan gǝyil Galili wu gǝmǝ yong shi Nazaret hǝ, 27 mwaan dǝr me reep duan wu a chagap Yusufu hǝ. Yusufu a gurun gǝ seen Dauda, sǝm lareep nanyi a Mariya. 28 Wul dǝr muup mǝn yen, "A tal yi, wu chinɗong kat yi gwet hǝ! Naan nyi gǝpe gǝme gǝ yi." 29 Mǝn ɓǝlǝp nanyi rǝng nyi badǝn mǝn ɗe gǝ ɗyee dat kat ɗe a nangpe me kam yi. 30 Mǝwong nanyi laa gǝ nyi yen "Yi yagal lugut mou, Mariya, nsa yi kat chinɗong Naan. 31 Gǝ yi mang gam mǝn yi lala wumis. Nlat ɓǝ yi yong sǝ shi 'Yesu.' 32 Nyi gǝ waa wuyoon, gǝ mǝ yong nyi shi wukǝgǝt. Naan gǝ shen pǝtong long nakǝǝ muup Dauda nnyi. 33 A nyi gǝ kamshik gǝkaa lǝ Yakubu dat gǝwoo, mǝn yil-long gǝfe gǝ kot gǝ pǝlang mou." 34 Mariya laa gǝ mǝwong nanyi yen, "Gǝ chin a na nkwǝt kam mǝn jet a teer gǝ mǝmis mou yi.?" 35 Mǝwong nanyi laa gǝnyi yen, "Mǝrip Wuret gǝ sam kaa yi, kamshik Naan wuma gǝ ǝbǝr yi. A waa nnyi wusǝsaar wu gǝ mǝ laa hǝ, gǝ mǝ yong nyi shi Laa Naan. 36 Emnǝgǝn yi Alisabatu, nau gǝ duan gǝfe mǝn mang gam. A tar gǝfe wu peemǝ shi nhǝ, nyi wu gǝ mǝ yong shi zang hǝ. 37 Mǝbi a ma Naan mou." 38 Maryamu yen "Gǝ naa, an a reep nsar Naan. Mang ɗyin kot kabi wu gǝ laa hǝ." Mǝn mǝwong nanyi yagal nyit Maryamu. 39 Lat mǝn Maryamu yagal bǝr nɗǝgǝn ɓit muop nanyi Mwaan nlǝɓung ngan gǝyil Yahuza. 40 Mwaan lǝ Zakariya mǝn nang Alisabatu. 41 Alisabatu kǝlǝng nangpe Maryamu dat laa wu nɓǝt nuup dungpe nsa Mǝrip Wuret sam kaa muup. 42 Mǝn ep ɗǝgǝl muup bǝɓal mǝn yen, "Yi a sǝsaar gǝnaar surǝp, laa wu nɓǝt yi a wu sǝsaar. 43 Ɗe a nǝgǝn Naan gǝnǝ gǝ wul ji ntal an a? 44 Nsa ɗǝgǝl talpe gǝyi taa nkom nǝ dat mǝn lalaa wu ɓǝt nǝ dung shi. 45 Gurum wudung pǝn naduk nkwǝt bii wu Naan laa gǝnyi gǝ pǝt n-yit hǝ, nyi a sǝsaar." 46 Maryamu yen, "chelem nǝ fu pyam Naan, 47 mǝn mǝrip nǝ kat tookpya gǝ Naan wu angkaa nǝ. 48 Nsa naa kaaleen reep muup. Yi naa, shee shi ɓit wu chinyi, gǝseen gurum gǝyil dip gǝmǝ yong an a shi wusǝsaar. 49 Nsa nyi wu a wuma hǝ chan jepe wunan n-an, sǝm muup a wusǝsaar. 50 Naachigir gǝfe a shiseen-shiseen, dǝ muop wu mǝ yigil lugut muup hǝ. 51 A nyi nyin kagam baghan muup; mǝn chen gurum wu kaa ɓal muop. 52 Tughan jeplong muop baa gǝnyi gǝkaa pǝtugat gǝmuop, mǝn ap wu kaaleen muop ɗagat. 53 Shen sǝ wuret nmuop wu ɓalak tǝ muop hǝ, mǝn gong mǝ lǝlong mǝ yigil gǝ sar muop wufii. 54 Epɓǝt gurum gǝfe Izraila npe ɗǝ ɗyee dǝr naachigir gǝfe yi, 55 (kabi wudok laa gǝ nakǝǝ mu muop hǝ) gǝ Ibrahiim gǝ seen muup dat gǝgwoo." 56 Maryamu tong dǝr Alisabatu kabi tar kùn mǝn waa gǝpang lǝmuup. 57 Shii tǝl Alisabatu waarǝ mǝn lalaa wumis. 58 Tǝlǝnglǝ gǝ mǝmya muup mǝ kǝlǝng nkwǝt Naan naachigir kaamuup, mǝn took muop pya. 59 Par ɓit wu pogokun mǝn mǝ jya npe gap dǝp muup. Muop pǝs sǝm a Zakariya kabi nug nda muup hǝ. 60 Mǝn nǝgǝn muup yen "Hayǝu. Gǝ mǝ pǝs sǝm muup a Yahaya." 61 Mǝ laa gǝnyi mǝ yen, "Me wumii gu gǝ sǝm nanyi mou." 62 Mǝ laa ɓǝlǝp gǝ nda muup shi sar ɗe war nyi laa sǝm wu gǝmǝ pǝs yi. 63 Mǝ nda muup sat nmuop mǝ shen bi-ranpe nnyi mǝn ran yen, "Sǝm muup a Yahaya." Mǝn rǝng muop dat dip. 64 Dat kam mǝn fu muup ep, mǝn liis muup wut. Laa lǝfu mǝn saam Naan. 65 Gurum muop wu nnǝgǝn dip mǝ yigil lugut. Ɓǝlǝp nanyi haanpe nau gǝyil Yahuza gan lǝɓung. 66 Gurum wu mǝ kǝlǝng ɓǝlǝp nanyi mǝ nɓǝt muop, mǝ yen, "Ɗǝ lalaa nhǝ par gǝ waa a bii me?" Nsa sar Naan gǝpe gǝme gǝnyi. 67 Mǝrip Wuret sam kǝ nda muup zakariya mǝn laa bǝlǝp yen, 68 "Mǝ saam Nda, Naan Izraila, nsa wul ji tǝpɓǝt mǝn kat angkaa ngurum gǝfe. 69 A nyi ep war angkaa nmǝn nlǝ laa muup Dauda, 70 kabi wudok jeplepnaan mǝ laa ɗagat ntagam hǝ. 71 A nyi gǝ angkaa mu nsar muop wu naa nmǝn gǝ muop wu mǝ nyang yit mu hǝ dip. 72 Gǝ chin kam ɗe war nyin naachigir nda mu muop yi mǝn nɗyee dǝr bii-ladǝn gǝfe wusǝsaar, 73 sǝgǝrfu wudok laa gǝ ndamu Ibrahim. 74 Dok sǝgǝrfu nkwǝt, ɗǝ ji fwat gǝ mǝn nsar mǝ naa nmǝn, ɓǝ mǝ wap nyi gǝ lugut zak mou, 75 mǝ chan a bii wu kǝr dat ntagam muup. 76 A kam, gǝ lala nhǝ, gǝ mǝ yong gǝ lalepnaan wu ma nsa a gǝ gǝ mwaan Naan ɗǝ gǝ myap war gǝfe yi, mǝn gǝ myap gurum muop npe wul gǝfe, 77 npe ɗǝ gǝ mwǝn bii-man angkaa yi ngurum afe mǝn gǝ vang wubyas gǝmuop. 78 Gǝ kot kam a nsa Naan a wu naachigir; a waa nnaachigir gǝfe fuus kaa yi kaa ge tǝpɓǝt mu, 79 ɓǝ pee saan muop wu mǝ tugatɗok nkwoo gǝ riin muut hǝ. Gǝ chin a kam npe kam war tugat chagap yi nmǝn." 80 Lat mǝn lalaa nanyi fyǝr mǝn nyi a kǝkǝrǝm, mǝn dok waalap ngǝgǝr ɗǝ a par ɓit wu gǝ pǝt gǝtal ngurum naa yi dat.