1 Bii wu mǝn fu laa hǝ a kamhǝ: mǝngǝ ndawang dung tong gǝ sar wuret tagamlong Wu-maa kǝbǝtǝng hǝ. 2 Ni a wu wap-wap gǝpee wusǝsaar, nlǝ wap ndung miskagam gǝ kaashik ɗik hǝ, a gurum mǝu. 3 Gǝsǝm Ndawang wuyoon mǝ mang nia dǝ kon aas biiɗang gǝ nung mang wubis. 4 Ɗin mǝ yen Miskagam ni gǝyil ɓǝ din gǝ kwǝt a ndawang mǝu, nsaa gurum muop gwe nnǝgǝn ndung gǝ mǝ kwǝlǝp aas gǝpee ɓiang hǝ. 5 Muop a wuyit riin jepee kǝbǝtǝng hǝ. N a gǝbii wudok Naan ɓiang pǝn nMoses gǝshi wu ni dǝ miap lǝ hǝ yen, "Gǝ yugur gǝ miap jepee wu dok a kam ngǝ kǝ pang hǝ". 6 Gǝdeshǝ, Miskagam lap ɓalang wumaa, kat gǝbii ni a wu war ɓǝlǝp shaar wumaa, gǝpee bǝlǝp ɗen wumaa. 7 Ɗin dǝgǝn ɓǝlǝp shaar wushideel nia wukar ɓǝ ɗin dǝgǝn mǝ tang kop ndee mǝu. 8 Nsaa Naan naa kat gurum muop mǝn yen, "Ɓit kwǝt nwul wu gakang shaar wufǝ gǝ mǝgurum muop gǝ Juda". 9 Yong gǝ kwǝt a kat kangshaar wudok a chin gǝ mǝ ndaa muop pa ɓit wu a yak sar muop a fat gǝ muop gǝyil Egip hǝ mǝu, nsaa dok mǝ bak dǝgǝl nǝ, mǝn a niang muop - a Naan laa. 10 Ndung hǝ ani kang shaar wu ga kang gǝ laa Isrel ndankong ɓit nani hǝ - a Naan laa. Yong a ɗen ɓiang anǝ nbǝzung muop, a bǝn a yil ni ka bǝzung muop. Yong a tong a Naan a muop ɗee muop zak mǝ twagat a gurum anǝ. 11 Baa shee mǝgwǝ nshee wunie, wa emnǝgǝn gǝ emnǝgǝn yen, "Gǝ man Naan" mǝu. Nsaa muop dip, wunan gǝ wudien yong gǝ mǝ man an. 12 Yong a yaa chen wubis a muop a naa, yong a ɗie doe bii-wubis a muop mǝu". 13 Yong wu gǝ mǝ yong kangshaar nhǝ shi 'wufǝ' hǝ, ya wu shideel waa awusǝgǝr gǝ ni, bazak bii wu a wusǝgǝr hǝ gǝ waa nɗel bǝr dat.