Jing 6

1 Waa nsaa a kamhǝ, nit ɗagat mǝ nit lep Miskagam wu shideel mǝ mwan ntagam gǝwar kwas. Naa yong mǝ bǝn mǝ she bwǝt kugur nit bii-wubis gǝ pǝn naduk nNaan, 2 ɗee ba yi gǝtaa kugur biishee kaa babtisma, gǝ lǝsar, gǝ yagal gǝfumuut, gǝ sheep wugǝgwǝ. 3 Yong gǝ mǝ chin kamhǝ kan Naan ep war. 4 Nsaa lafu doe muop ndung dok yit muop ap, mǝ cham jepee kǝbǝtǝng, mǝ kat fubǝt chelem wusǝsaar, 5 muop wu mǝ cham bǝlǝp Naan wuret gǝ ɓit Naan wukwǝt nwul hǝ, 6 mǝ baa mǝ wak gǝdangkong muop hǝ, ɓes dǝ wu yak muop lǝ gǝwar mǝu, nsaa mǝ bǝn kaa laa Naan shizak gǝ kaashik muop, mǝ bǝnchin manchin nni gǝsaan pee. 7 Yil wu bii gǝ mǝ lai fan kaa muup nkaa-nkaa, gǝ wul gǝ bii-pǝtwukyen gurum wu bii mǝ mar sǝ nani dǝ muop hǝ, Naan bii lang wuret akaa. 8 Ɗin bii-pǝt nani nkwǝt a dǝkyen gǝ eer ɓǝ ni a wu kyen gurum mǝu, bi wu ɗee hǝ a langfu gǝdǝ, bǝ lat afe a lǝ nwus dat. 9 Dip gǝ laa wu mǝ laa kamhǝ dǝgu mǝjep'emnaa muop, mǝn gǝ tughur kagam ka wu gun fu chan jepee wuret nnung pǝn gǝfu bii-wubis. 10 Naan a wu duruk bǝlǝp ɗee ba yi gǝtaa niang nlǝ'en ka ɓalang a gu, gǝ ɗempee agu nsǝm muup gǝpee tǝpdǝ gurum afe muop wu gun fu chin hǝ. 11 Mǝ dem din gun dip gu lǝ kǝr gu nlang en naduk-duk gǝgwǝ. 12 Naa yong gu niin latnoot, gu mang biishee fu muop ndung mǝ lap ɓǝlǝp ɗen nhǝ gǝret gǝpee pǝn naduk gǝ bii mogor a muop hǝ, 13 A kamhǝ Abraham lap bǝlǝp ɗen nani, nsaa mee mǝmǝgwǝ ɗel ni ndung yong gǝ twar shik shi muup hǝ mǝu. bagal ɓǝ twar shik a shi kaashik muup dat. 14 Laa yen, " Wagap, yong a lang wuret kaa gǝ, a bǝn a kaar mud gǝ. 15 Waa nsaa ni, Abraham, ndagkong wu kaa kǝgǝt gǝ bii mogor hǝ, mǝn lap bǝlǝp ɗen nani. 16 Gurum bii mǝ twar shik muop gǝ bii wu maa gǝ kagam muop hǝ. Twar shik zak a bi wu gǝ nin naduk jepee muop dip hǝ. 17 Waa nsaa kamhǝ, ndung Naan yagal dǝ wu niin enɗie afe dar nmǝ kok-kop muop hǝ, mǝn chin ni a gǝwar twarshik. 18 Waa njepee vǝl wu gǝ mǝ bat-bat mǝu hǝ, mǝn ndung mǝ swǝ gǝsǝ mǝ kat bǝlǝn hǝ, ni ɗagat mǝ ɗiam ɓal-ɓal ɗeewar mǝ ya bii wu mǝ ɓwǝt en mu akaa hǝ. 19 Mǝn gǝ bwǝt en kaa kagam wu rwan seen shi naduk hǝ, a ni a wu rǝ gǝfǝnhǝ ndankong (veil) hǝ, 20 gǝpee ndung Yesu yaawar rǝ gǝfǝm mu hǝ nsaa a ni waa ndawang wuyoon nnung gǝgwǝ gǝpee Melkizedek hǝ.