Jing 2

1 1. Waa nsaa kamhǝ, gǝ mǝ lǝ enmu shi bi wu mǝ kǝlǝng hǝ yongba mǝ wak gǝdang mu a ka afe. 2 Kan ɗin lep wudok mǝwǝng Naan muop mǝ laa hǝ nkwǝt a kamhǝ, mǝn bǝlǝp roop gǝ ɓakpe dip mǝ kat kopgǝshi amuop 3 ba ɗee gǝ mǝ kat fatane kan mǝ tak ɓak shi ɓǝlǝp bar nhǝ eh? Nhǝ ani a ɓǝlǝp bar wu Naan yawar laa pǝn nmǝn, muop wumǝ kǝlǝng ni mǝ tǝp dǝ hǝ. 4 Naan bǝn niin ni shi jepee maa gǝ kagam lapgǝkang gǝ nung maa, mǝn bǝn gap Chelem wusǝsaar gǝpee wu took muup ɗem hǝ. 5 Saa dok Naan ɗen gǝyil wu kwǝt nwul ndung mǝn fu bǝlǝp akaa hǝ a nsar mǝwǝng afe muop mǝu. 6 Zak ɓǝ, mee mǝgwǝ laa yen, "Ɗee ba gurum a mǝme wagap ɗee gǝ weel yi gǝ ni eh?" 7 Gǝ miap gurum a wukǝkat ntagam mǝwǝng Naan muop, gǝ rugun vugum yoon gǝ maa nkaa muop. 8 "Gǝ ɗǝk jepee dip a nsar muop". Nsaa dok Naan bwagat ni a nkaa jepee nau. Mee mǝbi ɗee wu niang nɓwagat ni a kaa hǝ mǝu. Dip dat gǝ kam hǝ, mǝ naa jeepee wu Naan ɗǝk nsar muup hǝ duk mǝu. 9 Ɗee ɗee mǝ naa ni ndung mǝ miap ni a wukǝkat ntagam mǝwǝng Naan muop dǝ la zaa pee hǝ, Yesu, wu mǝ biang vugum yoon gǝ maa nkaa muup, waa manchiin gǝ muut afe, ɗewar, gǝpee chinɗong Naan, bǝ ni cham muut gǝfu gurum dip. 10 Dok ni nyit datndung Naan wu jepee dip mǝ lǝngdok a dǝ muup waa nni hǝ, dǝ wu rwǝ gǝ gurum muop gwet gǝpee maa. Dok ni nyit dat ndung saa wuntagam tang bar amuop kaa kǝgǝt gǝwar manchiin afe. 11 Ni wu saar pee gǝ muop wu mǝ saar muop hǝ muop ntugus gǝmee. Waa nsaa ni nigǝ kaawaat dǝ wu yong muop shi mǝjep'emnǝgǝn muop mǝu. 12 Laa yen, "Yong a saam sǝm gǝ gǝnaar gurum mbǝl." 13 Bǝn dat laa yen, "Yong a ɗar shi gǝ", mǝn bǝ yen, "Gu naa ah, an hǝ gǝmee gǝ jep ndung Naan pǝn muop n'an hǝ. 14 Waa nsaa kamhǝ, kantong jep muop nani muop nshshik gǝ tǝgǝm, ni zak tong gǝbii muop hǝ, ɗeewar nɗǝgǝn muut bǝ tǝ gurum wu ni gǝ maa nnung muut, ndung a chelem wubis hǝ. 15 Chin kamhǝ a dǝ nni pǝn gurum muop wudok muop nɗǝgǝn lagwat muut hǝ yi nlǝng kwǝrǝm. 16 Wagap ɓǝ tǝp a dǝ mǝwǝng Naan muop mǝu, a seen Abraham muop. 17 A ni a bi wu saa dok ni nyit dat dǝ ni tong gǝbii mǝjep'emnǝgǝn muup muop gǝwar dip, ɗewar nni waa a wunaachigir gǝ wudaam nɗǝgǝn jepee Naan dip, nbǝn nkwǝt a wuvang bii-wubis gurum muop yi. 18 Waa nsaa Yesu gǝ kashik muup dok swaa manchiin gǝ duruk, ni zak boot bǝ tǝp dǝ muop ndung mǝ duruk muop hǝ.