1 Bulus mwaan zak yaa nDerbe gə Listra mən kat mə lagədə Yesu nnəgən, səm muup a Timoti, nəgən muup a gurum Yahudiya wu mwən naduk həh; nda muup a gurum Hellenawa. 2 Gurum Listra gə Ikoniyum mə laa ɓələp wuret ka Timoti. 3 Bulus ɗemkop nyi nmwaan gədər nyi, mən gap dəp muup nsa gurum Yahudawa muop nnəgən mə man nda muup a məgwu Hellenawa 4 Mə mwaan shipe-shipe muop fu dwam bi-tǝt wu dok jeplep Yesu gə mənan Urishalima mə yil mwən nmuop həh. 5 A waa nnyi mən tugur guwur gurum Naan muop nnəgən kagam mən gurum muop gwet shiɓit-shiɓit mə shen naduk. 6 Bulus muop gə məgurum gəfe mə mwaan ngan Frijiya gə Galatiya nsa dok Mərip Wuret dən gə mə mwaan gəyil Esha mwaan mə nshak ɓələp Naan nnəgən mou. 7 Dok jya mə wul dukduk gə Misha, muop də mwaan nBitiniya mən Mərip Yesu dən shi muop. 8 Lat mən mə ɗyiləng shi Misha mə mwaan nTroas. 9 Nləpar mən Bulus naa məbi nkaafu: me dagwu Masidoniya ɗarɗok fu yong nyi yong, "Ji dər mu nMasidoniya ji gə epɓət mu." 10 Bulus naa dat kam mən yagal wagap bər mwaan nMasidoniya nanyi nsa man nkwət a Naan yong jin ɗe war ji shak ɓələp langship yi nnəgən. 11 Mə yigil nTroas mən mə mwaan mə yaa nSamotras, mən ɗaar mə fwat mən mə ruȯ nNyapolis. 12 A nnəgən mən mə mwaan Filipi, me məpe nɗəgən Masidoniya wu a pe wuyoon wudok gǝyil Rom a wuyoon nkaa muup həh, mə tugat nnəgən ɓit nɓǝl. 13 Par Ɓitnyak mən mə fwat gəɓang mə mwaan fukyep kong, mə naa mə kat pee ɗand Naan kot nnəgən. Mə tugat mə laa ɓələp gə surəp wu mə wagar gəshak nnəgən həh. 14 Me namat langkom kələng ɓələp Naan yi nfu mu, səm muup a Lidiya, nyi a gurum Tiyatra, bii gə sarap gə byaat məlong muop, nyi a wuwap Naan. Naan ep kom muup kələng ɓələp wu Bulus laa həh yi. 15 Dok mə kən nyi gə gurum gəfe nau lat mən ɗuak mən yong, "Ɗəh gu kat an a wu ɗem Naan ɓəh gu tugat lənə." Mən mə ɗem. 16 Dok mǝn gǝwar mwaan gǝpee ɗang Naan mǝn me namat wu nyi a kaafu heh kang mǝn. Mǝnan afe bii mǝ kat shaghal 17 shimuup nsa nakaa nanyi. Namat nanyi yagat lang gǝdǝr mu gǝ Bulus gǝ aar ɗǝgǝl yi yong, "Daas muop hǝh a gurum Naan Wumah. A muop fu kam war angkaa ngun." 18 Ɓit fwat gwet nyi fu laa kam. Lat mǝn dǝfil mang Bulus gaban, mǝn bat laa gǝ mǝrip nanyi yong, "A laa gǝgǝ nɗǝgǝn sǝm Yesu Kristo pǝt gǝ nyit namat nhǝh." Mǝn pǝt wagap bǝr. 19 Nda kurum namat nanyi mǝ naa kat war shaghal gǝdu dughur mǝn mǝ yak Bulus gǝ Silas mwaan gǝ fǝrlǝtuk gǝnyi ntagam mǝnan gǝmuop. 20 Mǝ sat muop ɗyam ntagam mǝsheep mǝn yong, "Gurum muop hǝh fu dam gǝyil amu. Muop a Yahudawa. 21 Muop fu sheepe gǝ bi-tǝt wu a nǝmuun gurum Rom mou." 22 Lat mǝn gurum wu kǝrgǝi yigil gǝ Bulus muop gǝ Silas gǝ jaghar; mǝsheep muop mǝ tee byaat gǝdu mǝn mǝ takpe ɗewar mǝ nas Bulus gǝ Silas yi shi dam shighal. 23 Mǝ twang muop shi nas mǝn mǝ ɗǝk muop nlǝɓal, mǝn mǝ sat ndogari kangkaa muop yi mǝ nsuo. 24 Dogari kǝlǝng kam mǝn ɗǝk muop ngulung mǝn ɗyan kwak muop lǝ shi kukshep. 25 Nkang pechagat mǝn Bulus gǝ Silas muop fu ɗang Naan gǝ see pyap ɗe gogot muop wu nlǝɓal fu kǝlǝng. 26 Lat mǝn yil sugun gǝret ba kughur lǝɓal nanyi yok; mǝn fule ap mǝn teng wu mǝ ɗyan kwak muop gǝnyi hǝh wat. 27 Mǝ yong dogari nsaam mǝn yagal kat fulǝɓal nanyi dip a wu ǝ-ap; lat mǝn shang goo npe tǝh kaashi, nsa ɗye kat kwǝt muop wu nlǝɓal nanyi mǝ suo gwe. 28 Mǝn Bulus tak ɗǝgǝl yong, "Gǝ tǝh sak mou, mǝn nau npeen." 29 Lugut tǝh dogari ba ɗam; lat mǝn tang wus ɗǝh naa pee yi mǝn rǝh nlǝɓal nanyi mwaan gǝ pal ntagam Bulus muop gǝ Silas 30 mǝn yong muop mǝ fwat gǝɓang mǝn yǝn, "Daskagam a chin ana a kat angkaa yi?" 31 Mǝ lap yǝn, " Shen naduk nYesu, ɓǝh gun gǝ gurum lǝgǝ gu kat angkaa." 32 A nnǝgǝn mǝn mǝ laa ɓǝlǝp Naan gǝnyi nu gǝ gurum lǝ muup. 33 Lat mǝn kok muop nlǝpar nanyi mwaan gǝ vang shel gǝmuop mǝn mǝ kǝn nyi bǝr nau gǝ gurum lǝ muup muop. 34 Rǝh gǝ Bulus muop gǝ Barnabas gǝ tǝlǝngǝpang mǝn took muup gǝ nung gurum gǝfe pya badǝn nsa mwǝn naduk nNaan. 35 Ɓit ɓang mǝn mǝsheep mǝ lep dǝr muup mǝ yen, Nyit gurum muop nanyi mǝ wak." 36 Dogari laa gǝ Bulus yen ,"Mǝsheep mǝ yong a nyit gun gu wak; gu fwat dat gu wak chagap." 37 Mǝn Bulus lap yen, "Mǝn a gurum Rom mǝn mǝ nas mǝn gǝtal mǝn mǝ ɗǝk mǝn nlǝɓal. Ɓǝh mǝ ɗemkop du tagat mǝn gǝsok a? Hayau! Laa gǝmuop mǝ jya ji kam war fwat nmen." 38 Dogari mwaan gǝ laa dǝr mǝsheep muop. Mǝ kǝlǝng nkwǝt Bulus muop gǝ Silas a gurum Rom mǝn lugut yaa muop. 39 Mǝsheep mwaan mǝ ɗwak Bulus gǝ Silas mǝn mǝ fwat gǝ muop mǝn mǝ laa gǝmuop mǝ nyit gǝyil nanyi. 40 Lat mǝn Bulus gǝ Silas mǝ fwat mwaan lǝ Lidiya. Bulus gǝ Silas mǝ kat mǝjepnǝgǝn muop wuwap Naan mǝn mǝ kwaskwak muop mǝn mǝ nyit pee nanyi.