Jing 15

1 Mǝ gurum mǝ tugat nYahudiya sam yaa nAntiyok sam mǝ she gurum mǝ yen, "Nyang mǝ ngap dǝp mǝgwu kat wu Musa laaɗen mou mǝ gwu nanyi gǝ kat ankaa mou." 2 Bulus muop gǝ Barnabas mǝ ɓagalshik suet gǝ muop gǝkaa ɓǝlǝp nanyi. Lat mǝn gurum Naan mǝ lep Bulus gǝ Barnabas mwaan dǝr jeplep Yesu gǝ mǝnan muop nUrishalima ɗe war mwaan mǝ yakdang ɓǝlǝp nanyi yi. 3 Muop wu mǝ lep muop nanyi mǝ ɗyilǝng war gǝyil Fǝnisha gǝ Samariya mǝ laa yi nkwǝt Mǝjong mǝ bat lap ɓǝlǝp Naan. Took mǝjepnǝgǝn muop pya ge ɓǝlǝp nanyi. 4 Jya mǝ wul nUrishalima mǝ gǝwur gurum Naan gǝ jeplep Yesu gǝ menan muop. Lat mǝn mǝ yakdang jepe wu Naan chan nmuop hǝh. 5 Mǝn pak gurum gǝwur Farisiyawa muop mǝ yigil ɗyam mǝ yen, "A tiit gǝ mǝ kwap dǝp muop yi mǝn mǝ nlaa gǝ muop mǝ nkang bi-tǝt wu Musa dok shen hǝh." 6 Lat mǝn jeplep Yesu gǝ mǝnan tugat ɗe war mǝ naa ɓǝlǝp nanyi yi. 7 Dok mǝ arap fu shak wagap pogot gǝ ɓǝlǝp nanyi lat mǝn Birtus yaghal yen, "Mǝjepna, gu man nkwǝt Naan dok shang an gǝnaar gu ɗe war mǝjong mǝ kǝlǝng langship yi nfu nǝ ɗǝ mǝ pǝn naduk yi. 8 Naan wu man bǝzung gurum a nyi tuamshik nmuop, mwǝn Mǝwong Wuret nmuop kǝbi wu mwǝn nmǝn hǝh; 9 pǝn yit mu mou. A nyi vang bǝzung muop nsa mǝ mwǝn naduk. 10 Dǝ gu katshii Naan a; lee wu mǝ mu gǝ nakǝǝ mu ɓoot pǝ mang mou, ɓǝh mǝ sat nmuop mǝ mang a waa nmeh? 11 Muop mǝ ɗem kabi wu mǝn mǝ ɗem hǝh nkwǝt gǝ kat ankaa a waa nsa chinɗong Ndamu Yesu." 12 Lat mǝn gurum wu kǝrgǝi mǝ ɗyam kot mǝ kǝlǝng Bulus gǝ Barnabas mǝ yakdang bi-ɗyeer wu Naan chin gǝsar muop gǝnaar Mǝjong yi. 13 Mǝ yakdang dat lat mǝn Yakubu lap yen, "Mǝjepna, gu lǝng kom gu gu kǝlǝng an yi. 14 Simon laa bii wu Naan chin ɗǝh mǝjong wak gurum gǝfe yi. 15 Waa nchat gǝ ɓǝlǝp wu jeplepnaan mǝ laa, kabi wu mǝ yil ɗen hǝh, 16 'Dankong jepe muop hǝh nau ɓǝh a chin a wul, ji a chin a ɗyik lǝ Dauda wu dok ship hǝh; gǝ a chin a ep nyi a lang, 17 ɗeh war gǝshang gurum nau gǝ Mǝjong wu muop a nǝmaan hǝh mǝ ntang Naan. yi' 18 Naan wu chan jepe wu mǝ man ɗagat nmok hǝh, a nyi laa ɓǝlǝp nanyi. 19 A fu nǝmaan ɓǝh a naa a kat ɗong nyin mǝ weel Mǝjong wu bat yit du naa Naan yi mou. 20 Mǝ yil mǝ mwǝn nmuop nkwǝt mǝ nyit wap natoon, ɓuaar wubaan, gǝ lua wu maghar took ɗǝ muut yi, gǝ tǝgǝm. 21 Jet mǝ dwam ɓǝlǝp Musa gwe ɗagat-ɗagat gǝyil dǝɗyak-dǝɗyak; jet gǝ mǝ kuut nyi nlǝwap par Ɓitnyak." 22 Lat mǝn jeplep Yesu gǝ mǝnan muop gǝwur gurum Naan muop nau mǝ kat ɗong ɗyin mǝ ntaghat Yahuza wu gǝ mǝ yong nyi shi Barsaba, gǝ Silas wu muop a mǝnan hǝh mǝ nlep muop mwaan nAntiyok gǝ pegǝme gǝ Bulus gǝ Barnabas. 23 Lat mǝn mǝ yil mǝ yen, "Wudung tong a dǝr mu jeplep Yesu gǝ mǝnan gǝwur gurum Naan, mǝ yil ngun mǝjepnǝgǝǝn mu wu gun a Mǝjong gǝyil Antiyok, gǝ Siriya gǝ Silisiya. Mǝ tal gun! 24 Mǝ kǝlǝng nkwǝt pak gurum mǝ tugat dǝr mu jya mǝ ɓyak gun gǝ bi-shee wu mang kǝr gu lang heh. A mǝn mǝ lep muop mou. 25 A waa nnyi mǝn dip mǝ ɗem mǝ taghat gurum yi gǝnaar mu mǝ lep muop dǝr gu gǝpegǝme gǝ Barnabas gǝ Bulus, 26 a muop mǝ mang tughur nung gǝ nooklang gǝmuop nsa sǝm nda mu Yesu Kristo. 27 A waa nnyi mǝ lep Yahuza gǝ Silas ɗe war mǝ nla bii wu mǝ lep gǝnyi ngun shi fu du. 28 Nsa Mǝrip Wuret kat ɗong, mǝn zak mǝ kat ɗong ɗyin mǝ mwǝn lee wu tegen ngun ma wu jet gwe hǝh mou: 29 gu nyet bii wu mǝ tok natoon gǝnyi, gǝ tǝgǝm, gǝ lua wu mǝ maghar took, gǝ ɓuaar wubaan. Ɗǝh gu chin wudung ɓǝh gu kat tugat chagap. Mǝ nyet gun." 30 Lat mǝn muop wu mǝ lep nanyi mǝ sam ya nAntiyok; sam mǝ tǝl gurum mǝn mǝ mwǝn bi-yil nanyi nmuop. 31 Muop zak mǝ bil lat mǝn took muop pya nsa mwǝn tughur dwan nmuop. 32 Yahuza gǝ Silas mǝ kar gurum Naan muop nanyi mǝn kwak muop ɓal. 33 Yahuza gǝ Silas mǝ tugat nnǝgǝn pogot mǝn mǝ wak yaa gǝpe wu dok mǝ lep muop hǝh. 34 . 35 Bulus gǝ Barnabas mǝ ɗeh nAntiyok dǝr gogot muop. A nnǝgǝn mǝn mǝ shak ɓǝlǝp Naan ngurum muop. 36 Ɓit fwat vǝl mǝn Bulus laa gǝ Barnabas yǝn, "Mǝ mwaan pe wudok mǝ zaar hǝh, mwaan mǝ tal mǝjepnǝgǝn mu wudok mǝ lap ɓǝlǝp Naan hǝh, man ɓǝh mǝ naa myaar gǝmuop." 37 Barnabas dok ɗem dǝ mang Yahaya wu gǝ yong shi Markus hǝh mwaan gǝ nyi. 38 Mǝn Bulus zak kat ɗong ɗyin Markus nmwaan gǝdǝr du mou, nsa dok yak nyi muop nPamfiliya, nyang mwaan ɓǝlang gǝdǝr muop. 39 A nnǝgǝn mǝn ɗǝgǝl muop nyan shak mǝn mǝ kwap shak. Barnabas mang Markus mǝn mwaan NSiprus. 40 Bulus mang Silas, gurum Naan mǝ ɗang Naan kaa muop mǝn mǝ yigil ntagam. 41 Lat mǝn Bulus mǝ mwaan nSiriya gǝ Siliya nyi gu kwas kwak gǝwur gurum Naan muop nnǝgǝn.