1 E'yo ece piri 'di, adripi, emi ma zi mungu amdri a'yo oluza opini ma edri 'i ani drile drile mbele, ma ovu inzizaru ekile emi eseliarile, 2 azini Mungu ma ari ama ani 'ba e'yo 'ypi saaru 'diyi pi ma dria ba asi onzi be 'diyi pie; a'disiku 'ba dria ovuni a'yitaa be ku. 3 Te Opini asi adaru be emi 'bazu okporu, emi ageyi tezu 'ba onziri dri. 4 Ama ba ama asi Opi ma dria e'yo eminisi bo, nizu kini emi e'yo amani azile emitia 'diyi 'ye, azini emi nga yi 'ye 'dani. 5 Opi ma ce asi emini ma dri kilili ru letaa emini Mungu lezu ri ma alia, cazu asi teza kristo niri vu. 6 Ama azi di emitia, adripi, Opi amni Yesu Kristo ma rusi, kini emima ona emi adripi dria alualu acipi saaru, e'yo amani edrile emivu emini a'yile 'diyi ma vuti bipi ku 'diyi si. 7 Emima ngulupi ni geri onyiru emini te nga ovuzu amale ri; a'disiku ama acini ndra emi aselia saaru ku. 8 Te amani ani 'ba azini ma nyaka toko ru aluni ku, te ama 'inza ama azi okporu si azingazu ini be, itu be, e'yo amani ma fe 'ba aluni emi eselia ria rini andezu ku. 9 Ovuni kini amaovuni okpo be 'yezu 'dini le ku, 'dini ni ku te ama le amama ngulupi 'bazu ecetaa ru emi dri emini ani 'yezu amani ani 'yele rile beni. 10 Amani ndra nga ovuria emi be indi, ama azi e'yo 'diri emi tia, kini : Agu ka le azi ngaku, ma nya nyaka ku indi. 11 ama erikini 'ba azini emi eseilia acipi saaru 'diyi indi, te yi ovuou ru, ngani azi aluni ku, te yi ri e'yo osu ba ma eselia. 12 Te ama e'yo azi 'ba 'dini le 'diyi ma tia matu 'bazu yi vu Opi Yesu Kristo ma alia, yi ma nga azi asi enyere si, yi ma nya nyaka yi ma ngulupi niri 'i. 13 Te adripi, emima ande e'yo 'yeza onyiru si ku. 14 'ba aazini ka e'yo amani 'yole waraga 'dori ma aliari eriku, emima ovu mile be agu nderisi, emi eci emi eribe ku, eri ma ovu ani drinza si beni. 15 Te emi ma 'ba eri ari'bo ru 'dini ku, emima emba eri adripi le. 16 Curu'do Opi asi anzururi niri ma ngulupi ma fe asinzuru emidri o'du dria geri dria si. Opi ma ovu emi be dria. 17 Ma'i Paulo, ma si zitaa emizizu cici 'diri ma drisi ma'i. 'di ecetaa mani sile waraga mani 'diyi ma alia dria ri ma adri si 'dini. 18 'Yetaa anzutiri Opi amani Yesu kristo niri m ovu emibe dria.