¹ ಆಗ ಪಾರಿಸಾಯರ್ ಮತ್ತೆ ಜರುಸಲೇಮ್‍ಯಿಂದ ಸೆಟ್ ಜನರ್ ದ್ಯಾವರ ವಾಕ್ಯಗನೇ ಕಲ್ಸಿಕೊಡವರ್ ಯೇಸು ಅತ್ರ ಬಂದು ಸೇರಿದ್ದರ್. ² ಯೇಸು ಶಿಷ್ಯರ್ಲ್ ಸೆಟ್ಟೆ ಜನರ್ ಕೈನೇ ತೊಳಿಯದೆ ಕೊಳೆಕೈಲ್ ಊಟಮಾಡದ್ನೆ ಪರಿಸಾಯರ್ ಮತ್ತೆ ದ್ಯಾವರ ವಾಕ್ಯಗನೆ ಕಲ್ಸಿಕೊಡವರ್. ³ ಪರಿಸಾಯರ್ ಬೇರೆ ಯಹೂದ್ಯರೆಲ್ಲರ್ ತಾತ ಮೂತ್ತತ್ತಾತಾತನಕಾಲದ ಕಟ್ಟಲ್ ಕೈನ್ ತೊಳಿಯದೆ ಊಟಮಾಡಿತಿತ್ತಿಲೆ. ತಂಗ ದೊಡ್ಡವರ್ ಕೊಟ್ಟ ಮಾತುಗಲೂ ನಡ್ಪ್ ಅವರ್ ಹಿಂಗೆವೇ ಮಡಿತ್ತಿದರ್. ⁴ ಪೇಟೆಯಿಂದ ಹೋಗಿ ಬಂದರೆ ನೀರು ಮೀದುವೇ ಊಟ ಮಾಡಿತಿದರ್; ಸೌರಿಗೆ ಸೊಂಬು, ತಪ್ಪಲೆಗನೇ ಸಂದಾಗಿ ತೊಳಿತಿದರ್; ಇಬೆ ಬೇರೆ ಬೆರೆ ಸುಮಾರ್ ಕಟ್‍ಗನ್ ಅವರ್ ರೂಡಿ ಮಾಡೋಡಿದರ್. ⁵ ಅದ್ದು ಪರಿಸಾಯರ್ ದ್ಯಾವರ ವಾಕ್ಯಗನೆ ಕಲ್ಸಿಕೊಡವರ್, “ನಿಂಗ ಶಿಷ್ಯರ್ ಮೂತ್ತತ್ತಾತನಕಾಲಲೂ ಬಂದ ಕಟ್ಟ್‍ಗನೇ ಯಾಕ ಮಾಡದಿಲೆ? ಕೊಳೆಕೈಲ್ ಅವರ್ ಊಟ ಮಾಡಿತ್ತಿವುರಿಗೆ ಅಲ್ಲಾ? ಅತ್ತ ಯೇಸುನೇ ಕಾಳಿದರು. ⁶ ಅದ್ಕು ಯೇಸು “ವಳಗೆವಂದು, ವರೆಗವೆಂದು ಮಾತಾಡವರ್ಗ್ ನಿಂಗ ವಿಷಯದಲ್ಲಿ ಯೇಶಾಯ ಯಾಸ ಸಂದಾಗಿ ಹಾಳಿವುನಿಗೆ; ಈ ಜನರೂ ಮಾತುಗಲೂ ನನ್ನ ವಗಳಿತ್ತಾರೆ ಅಂಗವೇ ಅವರ್ ಮನ್ಸ್ ನನ್ನಗ್ ದೂರ ಆಗಿದಿಗೆ. ⁷ ಇವರ್ ನನ್ನನೇ ಕೊಂಡಾಡರು ಯಾವುದ್ ಪ್ರಯೋಜನ ಕಾಣಿ ಯಾಕಂದ್ರ್ ಮನಸರ್ ಕಟ್ಟ್‍ಗನೇ ಅವರ್ ಹಾಳಿತ್ತಾರೆ. ⁸ “ನಿಂಗ ದ್ಯಾವರ ಮಾತುಗನೇ ಬುಟ್ಟು ಮನುಸರ್ ಮಾಡ ಕಟ್ಟ್‍ಗನೆ ಹಿಡ್ತ್‍ಕೊತಿದೆರ್” ಅತ್ತ ಹಾಳಿನಾ. ⁹ ಅಂವಾ ಇನ್ನೂ ಅವರ್ಗ್ ನಿಂಗ ಮೂತ್ತತ್ತಾತತನ ಕಟ್ಟ್‍ಗನೇ ಹಿಡ್ತ್ ನಡಿಯೂ ದ್ಯಾವರ ಮಾತುಗನೇ ದೂರಮಾಡಿತ್ತಿದರ್; ಯಾನ ಸಂದದಿಗೆ ಅಲ್ಲಾ. ¹⁰ “ನಿಂಗ ಅವ್ವೆಅಪ್ಪನಗ್ ಮರ್ಯದಿಕೊಡಕ್; ಅಪ್ಪನೆ ಆಗಲಿ, ಅವ್ವೆನೆ ಆಗಲಿ ಶಾಪ ಹಾಕವನೆ ಕೊಂದಕಕ್” ಅತ್ತ ಮೋಶೆ ಕೊಟ್ಟ ಮಾತು. ¹¹ ನಿಂಗವೇ ಒಬ್ಬ ತಿಂಗ ಅಪ್ಪನಗೆ ಆಗಲಿ, ಅವ್ವೆಗೆ ಆಗಲಿ ನೋಡಿ ನಾ ನಿಂಗಗ್ ಕೊಡಲೆ ಇರದ್ನೆ “ಕೊರ್ಬಾನ್” ಅನ್ನ ಕಾಣಿಕೆನೆ ದ್ಯಾವರ್ಗು ಕೊಟ್ಟಿದೇಗೆ ಅತ್ತ ಹಾಳಿಬುಟ್ಟರೆ ಸಾಕು. ¹² ಮುಂದಕೂ ಅನ್ನ ತಂಗ ಅಪ್ಪನಗ್ ಮತ್ತೆ ಅವ್ವೆಗ್ ಇನ್ಯಾನ ಮಾಡಬಾರ್ದ್ ಅತ್ತ ಹಾಳಿತ್ತಿದ್ದೆರ್. ¹³ “ಹಿಂದವೇ ನಿಂಗ ಕಲ್ಲೋಡ್ ಬಂದ ಕಟ್ಟ್‍ಗಯಿಂದ ದ್ಯಾವರ ವಾಕ್ಯಗನೇ ದೂರ ಮಾಡಿತ್ತಿದ್ದೆರ್. ಮತ್ತೆ ಇಂಥ ಕಾರ್ಯಗನೆ ಇನ್ನೂ ಯಾಸೋ ಮಾಡಿತ್ತಿದ್ದೇರ್ ಅತ್ತ ಹಳಿದರು. ¹⁴ ಅಂಗವೇ ಯೇಸು ಜನರ್ ಗುಂಪುನೆ ತಂಗ ಅತ್ರಗ್‍ಕರ್ದು. ¹⁵ “ನಾ ಹಾಳದ್ನೆ ನಿಂಗ ಎಲ್ಲಾರ್ ಕಾಳಿ ತಿಳ್‍ದೋನು: ವರಗೆಯಿಂದ ಮನುಸನ ವಳಗೆ ವಾಗಂತದು ಅವನೇ ವಲಸು ಮಾಡದಿಲೆ. ¹⁶ ಮನುಸನ ವಳಗೆಯಿಂದ ವರೆಗೆ ಬರಂತದು ಅವನೆ ವಲಸಸು ಮಾಡಿತ್ತದೆ (ಕಾಳಲೆ ಕಿವಿಇರಂವಾ ಕಾಳಲಿ)” ಅಂದರು. ¹⁷ ಯೇಸು ಜನರ್ ಗುಂಪುನೇ ಬುಟ್ಟು ಮನೆಗೂ ಸೇರಿದ ಮೇಲೆ ಶಿಷ್ಯರ್, ಅವರ್ ಅತ್ರಗ್ ಬಂದು ಆ ಕಥೆ ಅರ್ಥಯಾನ ಅತ್ತ ಕಾಳಿದರ್. ¹⁸ ಅದ್ಕು ಅವರ್ “ನಿಂಗಗ್ ಅಸೋವೇ ಬುದ್ದಿ ಕಾಣಿ? ನಿಂಗಗ್ ಇದು ಅರ್ಥ ಆತಿಲೆ? ¹⁹ ವರಗೆಯಿಂದ ಮನುಸನ ವಳಗೆ ವಾಗದು ಯಾವುದುವೇ ಅನವೇ ವಲಸು ಮಾಡದಿಲೆ. ಅಂವಾ ತಿಂದದು ಅವನ ಮನ್ಸ್‍ಗ್ ವಾಗದೇ ಹೊಟ್ಟೆಗು ಮತ್ರ ಸೇರಿ ಮತ್ತೆ ತಡಿಯಿಂದ ವರಗೆ ವಾತದೆ (ಹಿಂಗವೇ ಯಾವುದ್ನೆ ತಿಂದರು ವಲಸ್ ಆಗದಿಲೆ ಅತ್ತ ಯೇಸು ಹಾಳಿದರ್) ²⁰ ಅಂಗವೇ ಮನ್ಸ್ ವಳಗೆಯಿಂದ ವರಗೆ ಬರದು ಅವನ ಯೇಚುನೆಗ ಅವನೆ ವಲಸು ಮಾಡಿತ್ತದೆ. ಮನುಸನ ಮನ್ಸ್‍ವಳಗೆಯಿಂದ ಕೆಟ್ಟಯೋಚುನೆ, ಸೂಳೆತನ, ಕದಿಯಾದು, ಕೊಂದಕದು, ಹಾದ್ರತನ, ದುಡ್ಡುಆಸೆ. ²¹ ಕೇಡುಮಾಡದು, ಮೋಸಮಾಡದು, ಬಂಡತನ, ಹೊಟ್ಟೆಕಿಸು, ಸಾಡಿಅಳದು. ಬಡಯಿಕೊಚ್ಚಬದು. ²² ಮತ್ತೆ ಸೊಕ್ಕು, ಬುದ್ದಿಗೇಡುತನ, ಕೆಲಿಯಾದು ಇಬೆಬೆ ಮೊದ್ಲು ವಳಗೆ ಬರಂಥದು. ²³ ಈ ಎಲ್ಲಾ ಕೇಡುಗೆ ಮನುಸನ ಮನ್ಸ್ ವಳಗೆಯಿಂದ ವರಗೆ ಬಂದು ಅವನೆ ವಲಸು ಮಾಡಿತನವೆ” ಅಂದರ್. ²⁴ ಯೇಸು ಅಲ್ಲಿಂದೆ ಹೋಗಿ ಟೈರ್ ಮತ್ತೆ ಸಿಮೋನ್ ಸೀಮೆ ಅತ್ರ ಇದ್ದ ಊರ್ಗ್ ಹೋಗಿ ಒಂದು ಮನೆಲ್ ಉಳುದೊಡರ್, ತಂಗ ಜನರೂ ಕಣ್ಣು ಕಾಣ್ಸಲೇಗ ಅತ್ತ ಅವರ್ ಹಾಳಿದರು ಅದು ಆತಿಲೆ. ²⁵ ಆಗವೇ ಒಬ್ಬ ಹೆಂಗುಸು ಅವರೂ ಸುದ್ದಿನೆ ಕಾಳಿ ವಳಗೆ ಬಂದು, ಅವರ್ ಕಾಲ್ಗು ಬುದ್ಧ. ಅಬಳ ಮಗಳಗ್ ದೆವ್ವಾ ಹಿಡ್ತೀತು. ²⁶ ಅಬ ಒಬ್ಬ ಗ್ರೀಕ್ ಹೆಂಗುಸು, ಸಿರಿಯ ಪೆನಿಷ್ಯ ಸೀಮೆಗು ಸೇರಿದವಾ. ಅಬ ತನ್ನ ಮಗಯಿಂದ ದೆವ್ವಾ ಬುಡ್ಸಕತ್ತ ಅಬ ಯೇಸುನೆ ಕಾಳಿಕೊತಾಳೆ. ²⁷ ಅಂಗೆವೆ ಯೇಸು ಅಬಳಗ್, “ಮೊದ್ಲು ಮಕ್ಕ ತಿಂದು ಹೊಟ್ಟೆ ತುಂಬಲಿ,ಮಕ್ಕ ಊಟನೇ ನಾಯಿಗಗ್ ಹಾಕದು ಸರಿಕಾಣಿ” ಅತತ ಹಾಳಿದರ್. ²⁸ ಅದುಕ್ ಅಬ, “ಅದು ನಿಜವೇ ಸಾಮಿ; ಅಮಗೆವೇ ಮಕ್ಕ ತಿಂದುಬಟ್ಟ ಚೊರ್‍ಪಾರ್‍ಗನೆ ಮೇಜು ಕಳಗೆ ಇರ ನಾಯಿಗ ತಿತ್ತವೆ ಅಲ? ಅತ್ತ ಕಾಳಿದ. ²⁹ ಅಬಳ ಮಾತುಗನೇ ಕಾಳಿ ಯೇಸು “ಸಂದಾಗಿ ಹಾಳಿದ ಬ್ಯಾಜರ ಮಾಡದೇ ಮನೆಗ್ ಹೋಗು, ದೆವ್ವಾ ನಿನ್ನ ಮಗಳನೇ ಬುಟ್ಟು ಹೋಗಿದಿಗೆ” ಅಂದರ್. ³⁰ ಅಬ ಮನೆಗ್ ವಾದಗ, ಮಗ ಹಾಸಿಗೆ ಮೇಲೆ ವಾಸೆ ಆಗಿಮಾಕಿರದ್ನೆ ಕಂಡಗ ದೆವ್ವಾ ಅಬಳನೆ ಬುಟ್ಟು ಹೋತು. ಕಿವಿಕಾಳದಂವಾನಗ್ ಕಿವಿ ಕಾಳಿದದು. ³¹ ಯೇಸು ಆ ಜಾಗನೆ ಬುಟ್ಟು ಸಿದೋನಿನ ದಾರಿಗಲೂ ದೆಕಪೋಲಿ ಊರ್ನೆ ದಾಟಿ ಗಲಿಲಾಯ ಸಮುದ್ರಗ್ ವಾದರ್. ³² ಕೂದಲೆ ಮಾತಾಡಂವಾ ಒಬ್ಬ ಕಿವುಡನೇ ಜನರೂ ಅವರ್ ಅತ್ರಗು ಕರ್ದ್‍ತಂದರ್ ಅವನ ಮೇಲೆ ಕೈಗನೆ ಮಾಡಗಕತ್ತ ಕಾಳೋಡರು. ³³ ಯೇಸು ಅವನೆ ಜನ ಗುಂಪುಯಿಂದ ಕರ್ದೋಗಿ, ತಂಗ ಬೊಟ್ಟುನೆ ಅವನ ಕಿವಿವಳಗೆ ಹಾಕಿ ತುಪ್ಪಿ, ಅವನ ನಾಲಿಗೆನೆ ಮುಟ್ಟಿದರ್. ³⁴ ಆಗ ಆಕಾಸದ ಕಡೆಗ್ ನೋಡಿ, ಉಸುರು, ಆಳ್ತ್, ಅಫಥಾ” ಅತ್ತ ಹಾಳಿದರ್ (ಎಪಥಾ ಎಂದರೆ ತೆಗಿಯಲಿ). ³⁵ ಆಗವೇ ಅವನ ಕಿವಕಾಳಿತ್ತು. ನಾಲಿಗೆ ಸಡ್ಲ್ ಆತು: ಅಂವಾ ಸಂದಾಗಿ ಮತ್ತಾಡಿತಿನ. ³⁶ ಇದ್ನೆ ಯಾರ್ಗ್ ಹಾಳಬಾರ್ದು ಅತ್ತ ಖಂಡಿತಾ ಆಗಿ ಯೇಸು ಜನರ್ಗ್ ಹಾಳಿದರ್, ಅಂಗೆವೇ ಯಾಸು ಹಾಳಿದರ್ ಕಾಳದೇ ಅವರ್ ಇದ್ದಸ್ ಈ ಕಾರ್ಯನೇ ಹಾಳಿತ್ತಿದ್ದರು. ³⁷ ಜನರ್ ನಿಜರ್‍ಲು ಆಸರ್ಯಆಗಿ, “ಯೇಸು ಎಲ್ಲನೇ ಒಳ್ಳೆ ರೀತಿಲ್ ಮಾತ್ತಾಡಿತಾನೆ; ಅಂವಾ ಕವಿಕಾಳದಂವಾನಗ್ ಕವಿ ಕಾಳಂಗ ಮಾಡಿತಾನೆ. ಮಾತು ಬರದವರ್ಗ್ ಮಾತಾಡಂಗೆ ಮಾಡಿತಾನೆ” ಅತ್ತ ಹಾಳಿದರ್.