¹ Muzinako za shikati Heroda kalikushandisanga abato mwi kereki. ² Kali kubburaza shi bburazo Jakobo mukura Joani. ³ Mipukali kumwana atika zuhweta zopa zatidze kawo ma Juda, kali kuyekeza, akubbura indi Pitorosi. Kali mumayiwa uzulyuwa zahata bikuwa mumena. ⁴ Pukali kumupata akumubika mwi torongo akumupa zikwata zi nnee atika zimulindire. shitwapa ni shitwapa sharana masore ba nnee. Ngatarera kumudzekawo pwi linji.mukiti puwa Likumana. ⁵ Pitorosi akulindira akyopa mwi torongo kono ikereki yakudzwera kuwuso kukambira ku Rezya. ⁶ inako yamatika hupura Heroda kumulyeta,masuku ateni, Pitorosi akukwama uturo papataka li masore babiri,bakumushimina shizisipi zi mbiri; balindizi babiri bali kwiqamina i torongo pubuso bateni. ⁷ Nilyaye,lingiroi lya Shikati lyalikuya kokuke, rumweni rwalikumwenika mwi torongo; lyali kumukumuna Pitorosi puzimpati, lyali kumutambusa, lyakutika: tambuka apani ngaho. zisipi zali kuzdwa kumanja ake. ⁸ Lingiroi lyalikutika kokukye lishimina lukanda, rara zishangu zwee. kalikupanga akyopa. Lyalikumuzira hape, atikya: ligawu inguwo aye, undiqama. ⁹ Cware Pitorosi kali kuya kudzwa lyakumutyeya atika amuraqama; kakarayizire atika zi lingiroi zatisi iziniti, kono kalikuhupura atika matimwana i pono. ¹⁰ Puwa likusiya shitwapa shitanzii indi shububiri, balikuya pumumbero bwi sipi i wwa tyenda mwinkyo, wwalikuliyazura wwahaline; balikudzwa, balikwenda shibbakanyana:shubufupi lingiroi lyali kumusiya. ¹¹ Cware Pitorosi kali kuya kokuke kali kutikya, cware kali kuyiwa atika injashamu, atika u Rezya makatuma lingiroi lyake, mi mandiyaka mu lyanja lya Heroda, indi za lyairi kurusinga rwa ma Juda. ¹² Cware pukalikulyaira,akuwara kwinjiwo a Maria, nyina Joani yamatiberuwa Mareka, mwatashangena barumeli babenji,wali kurapera. ¹³ Pukali kungongota pushugwaro shama fuli mughekwa yamatiberuwa Roda akuya kwikeke . ¹⁴ Pukali kulyemuha lyiyi lya Pitorosi,amayazure mumbero, shilibaka likwidze,akushuka kazira bamwikyo atika Pitorosi yini, ayimine pumumbero. ¹⁵ Balikutikya kuke: matitakana. miyeye akugisiza, akutika: inje, bakutikya lingiroi lyake. ¹⁶ Kono Pitorosi akudzera kuwuso ku ngongota; Puwali kuyazura balikumumwa, bakubbemuka. ¹⁷ Kali kubarawa shilyanja atika batupo, kalikuwazira mwamatamugusiza, Shikati mwi torongo. akutika: nizire Jakobo indi barumeli zihweta zopa. kali kudzwa, akakita kushuwaka shurwezi. ¹⁸ Masuku pungali kucako, kulyangana kokukuru kwali kubako ku masore; balikutika Pitorosi ikure ana?. ¹⁹ Heroda kalikumushakisisa,kono amamushangane. akuzekisa balindizi bake, akuhweta atika baka bburuwe. Pitorosi kalikudzwa mo Judeya, kalikwenda mo Sesarea kukasikamamo. ²⁰ Heroda akumenjira a bato Tire indi Sidoni. bali kuya kuke shumoyo muxiki; ati bakukwana Blasto, muvuya a Shikati, balikuringira lisuno.shulyuvu lyawo balikupara zulyuwa za shikati. ²¹ Liba lyata dxituwa, Heroda kalikurara zidzato za Shikati, katisikama murumweni rwake, kali kwi yaya abato babenji shubu shikati. ²² A bato bali kushupura kabatitikya: ldii yini kandu mutu indi Rezya. ²³ Popa ngaho lingiroi lya shikati lyali kumuzipa, Shukutika ama kambire Urezya. mavunyu ndali kumulya akufwa. ²⁴ Ldii lyu Rezya lyakudzera nikukura indi kukauhana. ²⁵ Barnabasi indi Saure bali kushuka ko Jerusalema, bakuyisa Johani yamatiberuwa Mareka.