¹ इह्याँ ई जुआन मुंड़ेयाँ जो बी समझाया कर कि से सबर वाळे होन् । ² सबनी गल्लां अन्दर अपु जो खरे कम्मां रा नमूना बणान। तेरे उपदेस अन्दर सफाई, ते गम्भीरता, ³ ते इदेह्ई खराई पाई जाओ कि कोई तिस जो बुरा नां बोल्ली सको, जिस कने दुस्मण असा पर कोई इल्जाम लाणे रा मोक्का नी पाई करी सरमिन्दा होन। ⁴ नोकरां जो समझा कि अपणे-अपणे मालक रे अधीन रैह्न, ते सबनी गल्लां अन्दर तिन्हा जो खुस रखन, ते हटी कोई जवाब ना देन; ⁵ चोरी चलाक्की नां करन, अपण हर तरिक्के कने पूरे विस्वासी निकळन कि से सब गल्लां अन्दर असा रे उद्धार करणे वाळे परमेश्वर रे उपदेस री सोभा बधान। ⁶ किजो कि परमेश्वर री दया साह्मणे है, जेह्ड़ा सबनी मह्णुआं रे उद्धार री वजह् है, ⁷ ते असां जो खबरदार करदा कि असी अभक्ति ते दुनियावी चाहत का मन फेरी करी इस जुग अन्दर सबर ते धरम ते भक्ति कने जीन्दगी जीन; ⁸ ते तिस धन्न आस री मतलब कि अपणे महान परमेश्वर ते उद्धार करणे वाळे यीशु मसीह जी री महिमा जाहिर होणे री भाळ करदे रैह्न। ⁹ जिनिए अपु जो असा तांई देई दित्तेया कि असां जो हर तरहा रे अधरम का छुड़ाई लेयो, ते सुद्ध करी के अपणे तांई इक इदेह्ई जात बणाई लेयो जेह्ड़ी भले-भले कम्मां अन्दर सरगरम हो। ¹⁰ पूरे हक्क कने ऐ गल्लां बोल, ते समझान्दा ते सिखान्दा रैह्। कोई तिज्जो हल्का नां समझो। ¹¹ लोक्कां जो समझा की हाकमां ते अधिकारियां रे निह्ठे रैह्ण,ते तिन्हेरे हुक्मां जो मनण, ते हर इक्क म्हणु हर खरे कम्म करणे तांई हर वेल्ले तयार रेय। ¹² कुसकी जो बदनाम ना करण, लड़ाके ना बनण; अपण नरम सभाव रे होण, ते सारे लोक्कां कने बड़ी नरमी कने रैहण। ¹³ किजो कि असी बी पैह्ल्ले नासमज,गल्ल ना मनणे वाळे, ते भरम बिच पे रे ते हर तरिक्के री इच्छा ते सुख वलास री गुलामी बिच थिये, ते नफरत करणे, ते खुन्दक खाणे बिच जिन्दगी गुजारदे थिये, ते गन्दे थिये, ते इक्क दुए कने दुस्मणी रखदे थिये। ¹⁴ अपण जां असां रे छुड़ाणे वाळे परमेश्वर री किरपा ते प्यार म्हणुआं रे सामणे आया। ¹⁵ तां तिन्हा ने असां रा छुटकारा कित्तेया; ते ए धर्म रे कम्मां री वजह कने नि होया, जे असां कित्ते, अपण अपणी दया रे मुताबक नौये जिन्दगी रे स्नान , ते पवित्रात्मा रे नौये बनाणे रे जरिए असां जो होया।