3
1
लोकन याद करा, कि हाकिमां, ते अधिकैरी केरे आधीन रहन, ते तैन केरो हुकम मन्न, ते हर एकी रोड़े कम्मेरे लेई तियार रहन|
2
कोंची बदनाम न केरन; लड़ाके न भोंन: पण नर्म सुभावेरे भोंन, ते सैभी मैंन्हन सैहीं साथी बेड़ी नेरमी सैहीं रहन|
3
किजोकी अस भी पेहिले, बे अकल, ते हुकम न मन्ने बाले, ते धोखो खाने बाले, ते रंगा रंगा केरी खूवैशन ते एशेरे गुलैमी मां थी, ते बैर, ते जलन रखने मां ज़िन्दगी बीताते थी, ते भिटे, ते एकी होरी सैहीं बैर रखते थी|
4
ज़ैखन इषो मुक्ति देंने बालेरी कृपा, ते मैंन्हन पुड़ तैसेरो प्रेम बांदो भोव|
5
त तैने असन मुखती दिती: ते इन रोड़े कम्मन सैहीं नैइं, ज़ैना असेईं एपू पुड़ अपने दियारे मुताबिक, नोंवें ज़रमेरे निहान, ते पवित्र आत्मा सैहीं असन नावें बनाने सैहीं|
6
ज़ै तैने इशे मुक्ति देंने बाले यीशु मसीहेरे ज़िरीये सैहीं असन पुड़ आढंगी उलटाई|
7
ज़ैस सैहीं अस तैसेरे अनुग्रह सैहीं धर्मी भोतम, हमेंशरी ज़िन्दगरे उमीदी सैहीं वारस भी बनम|
8
ई गल्ल सच़्च़े, ते आंव चहताइं, कि तू इना गल्लाँ केरे बारे मां दिलेरी सैहीं ज़ोस ऐलहेरे लेई ज़ैनेइं परमेशरेरू याकीन केरू, तैना भले भले कम्मन मां लगोरो रहनेरो ध्यान रखन: ते मैंन्हू केरे फैइदेरिन|
9
पण बेवकूफां केरी बेंसी, नसबनामा, ते बैर ते खलाफत, ते तैन लड़ाइन सैहीं, ज़ैना व्यवस्थारे बारे मां भोंन बांच़ोरो रा; किजोकी तैना बेफल ते बे फैइदेन|
10
कोंची पखेण्डी एकी दुइय बार समझ़ा ते अलग केर|
11
इन बुझ़तां कि एरो मैंन्हू टेपलोव, ते अपनो आप दोषी बनेइतां पाप केरतो रहते|
12
ज़ैखन आंव तुस्न अरतिमास या तुखिकुसे भेझ़ी, त मीं कां निकुपुलिस एजनेरी कोशीश केरां: किजोकी मीं तैड़ीए हिवतड़ो कटनो थापोरोए|
13
जेनास व्यवस्थापक ते अपुल्लोसे कोशीश केरतां पुज़ा, ते हेर, कि तैन कोंची चीज़री घटी न भोए|
14
ते इशे लोक भी ज़रूरतन पूरी केरनेरे लेई रोड़े कम्मन मां लगोरू रहनू शिखन ताकि बे फल न रहन|
15
मेरे सैभी सैथी केरू नमशकार, ते ज़ै विशवासेरे वजाही सैहीं असन सैहीं प्रेम केरतन, तैन नमसकार| तुस्न सैभन पुड़ अनुग्रह भोतो राए|