2
1
पण तू एरी गल्लां ज़ो, ज़ैना रोड़ी तालीमारे काबलन|
2
मतलब बुडडे मड़द, प्रहेज़ केरने बाले, ते समझ़दार ते संयमी भोंन, ते तैन केरो विशवास ते प्रेम, ते सबर पक्की भोए|
3
ऐंच़रे बुडडी कौन्शां केरो चाल चालन भी पवित्र लोकां केरो ज़ेरो भोए, दोष लाने बैली, ते पीने बैल्ली नैइं; पण रोड़ी गल्लाँ शिखालने बैली भोंन|
4
ताकि तैना जवान कौंन्शन खबरदार केरती रहन, कि अपने मुन्शन ते बच्चन सैहीं प्यार केरन|
5
ते बरदाश्त केरने बैली, पवित्र, घरेरो कारोबार केरने बैल्ली, भलाई केरने बैली ते अपने अपने मुन्शाँ केरे आधीन रहने बैली भोंन, ताकि परमेशरेरे वचनेरी निन्दा न भोए|
6
ऐंच़रे जुवान मड़दन भी समझ़ेइतां, कि संयमी भोंन|
7
सैभी गल्लन मां अपनो आप रोड़े कम्मन मां नमूनो बना: तेरी तालीमी मां सफाई, ते समझ़दारी भोए|
8
ते एरी खराई भोए, कि कोई तैस बूरी न ज़ोई बटे; ज़ैस सैहीं असन कोई भी दोष न हेरतां छिथोन|
9
गुलामन समझ़ा, कि अपने अपने मालकां केरे अधीन रहन; ते सैभी गल्लन मां तैन खुश रखन, ते तैन उलटो जुवाब न देन|
10
च़ोरी न केरन; पण सैभी किसमे सैहीं पूरे विशवासी निसन, कि तैना सैभी गल्लन मां इशे मुक्ति देंने बाले परमेशरेरी तालीमरी शोभा बधान|
11
किजोकी परमेशरेरो अनुग्रह बांदोए, ज़ै सैभी मैंन्हू केरे मुक्तरी वजाहे|
12
ते असन खबरदार केरते, कि अस अभेगती ते संसारेरे खुवैइशन मां मन बेदलतां इस युगे मां सयंम, ते धर्म ते भेगती सैहीं ज़िन्दगी बीताम|
13
ते बड़े उमीदी मतलब अपने महान परमेशर, ते मुक्ति देने बाले यीशु मसीहेरी महिमा बांदी भोंने बलगते रहम|
14
ज़ैने अपनो आप इशे लेई दितो, कि असन हर किसमेरे अधर्म कैरां छुटाए, ते खास केरतां अपने लेई अक एरी कौम बनाए ज़ै भला कम्मा केरे|
15
पूरे अधीकारे सैहीं इना गल्लाँ ज़ो, ते समझ़ा ते शिखालतो रा: कोई तीं धटया न समझ़े|